ରାୟଗଡ଼ା,୧୭।୯ (ଆଶିଷ ରଞ୍ଜନ ପଣ୍ଡା) ୩ ଦଫା ଦାବି ପୂରଣ ପାଇଁ ଆନ୍ଦୋଳନ କରୁଛନ୍ତି ସାରା ରାଜ୍ୟର ଶିକ୍ଷୟିତ୍ରୀ ଶିକ୍ଷକମାନେ। ଫଳରେ ସ୍କୁଲଗୁଡ଼ିକରେ ମଧ୍ୟାହ୍ନଭୋଜନ ପ୍ରଦାନରେ ବ୍ୟାଘାତ ସୃଷ୍ଟି ହୋଇଛି। ମିଳିଥିବା ସୂଚନା ଅନୁସାରେ ଜିଲାରେ ଥିବା ୧୮୨୮ ସ୍କୁଲ ମଧ୍ୟରୁ ଶନିବାର ମାତ୍ର ୩୭୯ ସ୍କୁଲରେ ଏମ୍ଡିଏମ୍ ପ୍ରଦାନ କରାଯାଇଛି। ସେହିଭଳି ଓଡ଼ିଶା ବିଦ୍ୟାଳୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ ପତ୍ର ସଂଖ୍ୟା ୮୧୪୦ ଅନୁଯାୟୀ ପ୍ରତି ମାସରେ ଶନିବାର ହେବାକୁ ଥିବା କ୍ଲଷ୍ଟରସ୍ତରୀୟ ବୈଠକ ମଧ୍ୟ ଫସରଫାଟିଛି। ଶିକ୍ଷକଙ୍କ ଆନ୍ଦୋଳନ ଯୋଗୁ ପିଲାଙ୍କ ପାଠପଢ଼ା ଏକ ପ୍ରକାର ବାଧାପ୍ରାପ୍ତ ହୋଇପଡ଼ିଛି। ଅପରପକ୍ଷେ ଶିକ୍ଷାବର୍ଷର ନିର୍ଦ୍ଦିଷ୍ଟ ସମୟରେ ପରୀକ୍ଷା ହେଲେ ପିଲାମାନେ କିଭଳି ବିନା ଶିକ୍ଷାରେ ପରୀକ୍ଷାରେ ଉତ୍ତୀର୍ଣ୍ଣ ହେବେ ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଅନ୍ୟପକ୍ଷରେ କେତେଜଣ ଅଭିଭାବକ କହିଛନ୍ତି, ରାଜ୍ୟ ସରକାର ଶିକ୍ଷୟିତ୍ରୀ ଶିକ୍ଷକଙ୍କ ଦାବି ପୂରଣ ନ କରିବା ଯୋଗୁ ସେମାନେ ଆନ୍ଦୋଳନରେ ବସିଛନ୍ତି। ହେଲେ ଏହି ଆନ୍ଦୋଳନ ଯୋଗୁ ଆମ ପିଲାଙ୍କ ଶିକ୍ଷା ବାଧାପ୍ରାପ୍ତ ହେଉଛି। ତେଣୁ ରାଜ୍ୟ ସରକାର ଯଥାଶୀଘ୍ର ସେମାନଙ୍କ ଦାବି ପୂରଣ କଲେ ବିଦ୍ୟାଳୟଗୁଡ଼ିକ ପୁନଃ ଚାଲୁ ହୋଇ ଶିକ୍ଷାଦାନ ଆଗକୁ ବଢ଼ିପାରିବ। ନଚେତ ଆଗାମୀ ଦିନରେ ଆବଶ୍ୟକ ପଡ଼ିଲେ ଶିକ୍ଷକ ଶିକ୍ଷୟିତ୍ରୀଙ୍କ ଦାବି ପୂରଣ ପାଇଁ ଅଭିଭାବକମାନେ ମଧ୍ୟ ସମର୍ଥନ କରିବେ ବୋଲି ଆଲୋଚନା ହେଉଛି। ଏ ସମ୍ପର୍କରେ ରାୟଗଡ଼ା ବିଇଓ ସୁଦୀପ୍ତ ଦାସଙ୍କ ସୂଚନା ଅନୁଯାୟୀ, ରାୟଗଡ଼ା ବ୍ଲକ୍ ୭୦ ପ୍ରତିଶତ ବିଦ୍ୟାଳୟ ଖୋଲା ରହିଥିବା ଜଣାପଡ଼ିଛି।
