ନନ୍ଦପୁର,୩୦ା୭(ଶଙ୍କର ପୂଜାରୀ)କୋରାପୁଟ ଜିଲା ନନ୍ଦପୁର ବ୍ଳକ ଚାଟୁଆ ବୈଠକକୁ ଆନ୍ଧ୍ର-ଓଡ଼ିଶା ସୀମା ସମ୍ପର୍କିତ କୌଣସି କାଗଜପତ୍ର ଓ ମାନଚିତ୍ର ନ ଆଣି ଆସିଥିଲେ ଆନ୍ଧ୍ର ପ୍ରଶାସନିକ ଅଧିକାରୀ। ଫଳରେ ବୈଠକରେ ଆଲୋଚନା ଫଳପ୍ରଦ ହୋଇପାରି ନ ଥିଲା। ତେବେ ରାଇପାହାଡ଼ ଗ୍ରାମବାସୀଙ୍କୁ ଆନ୍ଧ୍ର ହିତାଧିକାରୀ ଓ ବିଭିନ୍ନ ଯୋଜନାରେ ସାମିଲ କରିଥିବା ପ୍ରମାଣ ଏବଂ ତାଲିକା ଦେଇ ନିଜ ଅନୁପ୍ରବେଶକୁ ସ୍ବୀକାର କରିଥିଲେ ଆନ୍ଧ୍ର ଅଧିକାରୀ। ରାଇପାହାଡ଼ ଗ୍ରାମକୁ ନିଜର ବୋଲି କହି ଆନ୍ଧ୍ର ଜୋର୍ କରୁଥିବା ଉନ୍ନୟନମୂଳକ କାର୍ଯ୍ୟ ବନ୍ଦ କରିବାକୁ ଓଡ଼ିଶା ପ୍ରଶାସନିକ ଅଧିକାରୀଙ୍କ ପ୍ରସ୍ତାବକୁ ଆମ କ୍ଷମତା ବାହାରେ କହି ଟାଳି ଦେଇଥିଲେ ଉପସ୍ଥିତ ଆନ୍ଧ୍ର ପ୍ରଶାସନିକ ଦଳର ନେତୃତ୍ୱ ନେଇଥିବା ଡୁମୁରିଗୁଡା ତହସିଲଦାର ସିଏଚ୍ ନାଗାମା। ଆନ୍ଧ୍ର ରାଇପାହାଡ଼ ଗ୍ରାମରେ ଅନୁପ୍ରବେଶକରି ଗ୍ରାମରେ ବସବାସ କରୁଥିବା ୧୮ ପରିବାରକୁ ରାଶନ, ଜବ୍କାର୍ଡ, ଭୋଟର କାର୍ଡ, ଜଙ୍ଗଲ ଜମି ପଟ୍ଟା, ଜନ୍ମ ପ୍ରମାଣପତ୍ର, ଆଧାର କାର୍ଡ, ଶିକ୍ଷା ଓ ସ୍ବାସ୍ଥ୍ୟ ସୁବିଧା, ୬ ପରିବାରଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ, ପାଣି, ବିଦ୍ୟୁତ୍ ଏଜିଏନ୍ଆର୍ଇଜିଏସ୍ରେ ସମସ୍ତ ପରିବାରକୁ କର୍ମନିଯୁକ୍ତି ଓ ଉନ୍ନୟନମୂଳକ କାର୍ଯ୍ୟର ହିତାଧିକାରୀଙ୍କ ତାଲିକା ଦେବା ଘଟଣାକୁ ଓଡ଼ିଶା ପକ୍ଷରୁ ପ୍ରତିନିଧିତ୍ୱ କରିଥିବା ଅଧିକାରୀ ଓ ବୁଦ୍ଧିଜୀବୀମାନେ ସହଜରେ କେହି ଗ୍ରହଣ କରିପାରିନାହାନ୍ତି। ଏହା ଆନ୍ଧ୍ରର ଓଡ଼ିଶା ପ୍ରଶାସନକୁ ଖୋଲା ଚ୍ୟାଲେଞ୍ଜ ବୋଲି ଆଲୋଚନା ହେଉଛି।
ଆନ୍ଧ୍ର-ଓଡ଼ିଶା ସୀମା ନିର୍ଦ୍ଧାରଣ ସମ୍ପର୍କିତ ଦ୍ୱିତୀୟ ପର୍ଯ୍ୟାୟ ବୈଠକକୁ ସମସ୍ତ କାଗଜପତ୍ର, ମ୍ୟାପ୍ ଧରି ଆସିବାକୁ ଆନ୍ଧ୍ରକୁ ଓଡ଼ିଶା ପକ୍ଷରୁ କୁହାଯାଇଥିଲେ ମଧ୍ୟ ସେମାନେ କିଛି ନ ଆଣି ଆସିଥିଲେ। କେବଳ ରାଇପାହାଡ଼ରେ ଆନ୍ଧ୍ର କରୁଥିବା କାର୍ଯ୍ୟ ଓ ସହାୟତାର ତାଲିକା ଓଡ଼ିଶା ପ୍ରଶାସନିକ ଅଧିକାରୀଙ୍କୁ ଦେଇ ବୈଠକକୁ ଅମୀମାଂସିତ ରଖି ଚାଲିଯାଇଥିଲେ ଆନ୍ଧ୍ର ଅଧିକାରୀମାନେ। ଉକ୍ତ ତାଲିକାରେ ଆନ୍ଧ୍ର ପକ୍ଷରୁ ରାଇପାହାଡ଼ରେ ବସବାସ କରୁଥିବା ୧୮ଟି ପରିବାରର ୬୫ ଜଣଙ୍କ ମଧ୍ୟରୁ ୧୬ ପରିବାରକୁ ରାଶନ କାର୍ଡ, ୧୦ ପରିବାର ନିମନ୍ତେ ଜବ୍କାର୍ଡ, ୨୫ ଜଣଙ୍କୁ ଭୋଟର କାର୍ଡ, ୧୨ ପରିବାରକୁ ଜଙ୍ଗଲ ଜମିପଟ୍ଟା, ୬୫ ଜଣଙ୍କୁ ଜନ୍ମ ପ୍ରମାଣପତ୍ର, ୬୩ ଜଣଙ୍କୁ ଆଧାର କାର୍ଡ, ୨୨ ଜଣକୁ ପ୍ରାଥମିକ ଶିକ୍ଷା ଓ ଗେମେଲି ଦଶରଥ ନାମୀ ନାମକ ଯୁବକଙ୍କୁ ଡିଗ୍ରୀ ଯାଏ ଶିକ୍ଷା ପ୍ରଦାନ କରାଯାଇଥିବା ଉଲ୍ଲେଖ ରହିଛି। ସୀମା ନିର୍ଦ୍ଧାରଣ କରିବାକୁ ଆସିଥିବା ଆନ୍ଧ୍ର ଅଧିକାରୀ ଗୋଟିଏ ପଟେ ସୀମା ସମ୍ପର୍କିତ କୌଣସି କାଗଜପତ୍ର ଓ ମାନଚିତ୍ର ଆଣି ନ ଥିବା କହି ସମୟ ମାଗିଥିଲେ। ଅନ୍ୟପଟେ ରାଇପାହାଡ଼ ଗ୍ରାମବାସୀଙ୍କୁ ନିଜ ହିତାଧିକାରୀ ବୋଲି ପ୍ରମାଣ ଓ ତାଲିକା ପ୍ରଦାନ କରିବାକୁ ସହଜରେ ଗ୍ରହଣ କରି ନ ଥିଲେ ଉପସ୍ଥିତ ଓଡ଼ିଶା ପ୍ରଶାସନିକ ଅଧିକାରୀ। ରାଇପାହାଡ଼ ଗ୍ରାମରେ ଆନ୍ଧ୍ରର ଉନ୍ନୟନମୂଳକ କାର୍ଯ୍ୟ ଜାରି ବନ୍ଦକରି ତୁରନ୍ତ ଏହି ରାଜ୍ୟର ଅନୁପ୍ରବେଶରେ ରୋକ ଲଗାଇବାକୁ ରାଜ୍ୟର ପ୍ରଶାସନିକ ଅଧିକାରୀ, ଜନପ୍ରତିନିଧିମାନେ ହସ୍ତକ୍ଷେପ କରିବାକୁ ସାଧାରଣରେ ଦାବି ହେଉଛି।
