ବାଲୁଗାଁ,୨୬।୩(ଡି.ଏନ୍.ଏ.): ଖୋର୍ଦ୍ଧା ଜିଲା ଅଧୀନ ଚିଲିକାର ହାଟବରଡ଼ିଠାରୁ ନଈରୀ ମଧ୍ୟରେ ବେଆଇନ ଭାବେ ଗଢ଼ି ଉଠିଥିବା ୧୭ ହେକ୍ଟର ପରିବ୍ୟାପ୍ତ ଚିଙ୍ଗୁଡ଼ି ଘେରିକୁ ଗୁରୁବାର ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ପ୍ରଶାସନ ପକ୍ଷରୁ ଚିଲିକାରେ ବାରମ୍ବାର ଘେରି ଉଚ୍ଛେଦ କରାଯାଉଥିଲେ ମଧ୍ୟ କେତେଜଣ ବ୍ୟକ୍ତିଙ୍କ ଦ୍ୱାରା ଉକ୍ତ ସ୍ଥାନରେ ପୁନର୍ବାର ଘେରି କରାଯାଉଛି, ଯାହାକି ମତ୍ସ୍ୟଜୀବୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇବା ସହ ଚିଲିକାକୁ ସମ୍ପୂର୍ଣ୍ଣ ଘେରିମୁକ୍ତ ନିମନ୍ତେ ପ୍ରଶାସନ ନିକଟରେ ଦାବି ହୋଇ ଆସୁଅଛି। କିଛି ଦିନ ପୂର୍ବେ ସିଡିିଏ ପକ୍ଷରୁ ଚିଲିକାରେ କେଉଁ କେଉଁ ଅଞ୍ଚଳରେ ଘେରି ରହିଛି, ସାଟେଲାଇଟ ଦ୍ୱାରା ସ୍ଥାନ ନିରୂପଣ କରାଯାଇଥିଲା। ଗୁରୁବାର ପ୍ରାଥମିକ ପର୍ଯ୍ୟାୟରେ ଚିହ୍ନଟ ହୋଇଥିବା ହାଟବରଡ଼ିଠାରୁ ନଈରୀ ମଧ୍ୟରେ ଘେରିକୁ ଉଚ୍ଛେଦ କରାଯାଇଛି। ପାଣି ଭିତରେ ଜାଲ ଏବଂ ବାଉଁଶ ଲୁକ୍କାୟିତ ଭାବେ ରହିଥିବା ବେଳେ ପ୍ରଶାସନ ପକ୍ଷରୁ ୩ଟି ଡଙ୍ଗା ମାଧ୍ୟମରେ ଉକ୍ତ ଘେରିରେ ବ୍ୟବହୃତ ଜାଲ ବାଉଁଶକୁ ଜବତ କରାଯାଇଛି। ଖୋର୍ଦ୍ଧା ଉପଜିଲାପାଳ ଅଶୋକ କୁମାର ବେହୁରିଆଙ୍କ ତତ୍ତ୍ୱାବଧାନରେ ଚିଲିକା ତହସିଲଦାର ପୁନମ ମହାପାତ୍ର, ବାଲୁଗାଁ ଏସ୍ଡିପିଓ ମାନସ ରଞ୍ଜନ ବାରିକ ଏବଂ ଟାଙ୍ଗୀ ଥାନା ଆଇଆଇସି ସରୋଜ କୁମାର ଉପାଧ୍ୟାୟଙ୍କ ଉପସ୍ଥିତିରେ ଏହି ଘେରି ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଥିଲା। ଏହି ଉଚ୍ଛେଦ କାର୍ଯ୍ୟରେ ତହସିଲ, ମତ୍ସ୍ୟ ବିଭାଗ, ସିଡିିଏ କର୍ମଚାରୀଙ୍କ ସମେତ ୨୨ଜଣ ଶ୍ରମିକ ସାମିଲ ଥିଲେ। ଶାନ୍ତିଶୃଙ୍ଖଳା ପାଇଁ ୨ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଥିଲେ। ଚିଲିକାର ଅନ୍ୟାନ୍ୟ ସ୍ଥାନରେ ଗଢ଼ି ଉଠିଥିବା ବେଆଇନ ଘେରିକୁ ଚିହ୍ନଟ କରାଯାଇ ପର୍ଯ୍ୟାୟକ୍ରମେ ଉଚ୍ଛେଦ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
