ରାୟଗଡ଼ା ଅଫିସ,୨୭ା୬: ରାୟଗଡ଼ା ଜିଲାରୁ ଶନିବାର ସର୍ବାଧିକ ୧୬ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେଥିମଧ୍ୟରୁ ଜଣେ ମହାରାଷ୍ଟ୍ରରୁ ଫେରି ରାୟଗଡ଼ା ରାଣୀଗୁଡ଼ା ଫାର୍ମରେ ହୋମ୍ କ୍ୱାରାଣ୍ଟାଇନ୍ରେ ଥିବା ବେଳେ ଅନ୍ୟ ଜଣେ ଯୁବକ ତାମିଲନାଡୁରୁ ଫେରି ବାରିଝୋଲାରେ ହୋମ୍ କ୍ୱାରାଣ୍ଟାଇନ୍ରେ ରହୁଥିଲେ। ସେହିପରି ରାମନାଗୁଡ଼ା ବ୍ଲକ ଗଗୁପାଡୁ ଅଞ୍ଚଳର ଜଣେ ଯୁବକ ଆନ୍ଧ୍ରପ୍ରଦେଶରୁ ଫେରିଥିଲେ। ଏମାନଙ୍କଠାରେ ସାମାନ୍ୟ ଲକ୍ଷଣ ଦେଖାଯିବାରୁ ସ୍ବାବ୍ ସଂଗ୍ରହ କରାଯାଇଥିଲା। ପରେ ପଜିଟିଭ୍ ଆସିଥିଲା। ଏହାବ୍ୟତୀତ ବାକି ୧୩ ଜଣ ଗୁଣୁପୁର ବ୍ଲକର ବିଜୟପୁର ଗ୍ରାମର। ଏଥିରେ ୮ ପୁରୁଷ ଏବଂ ୫ ମହିଳା କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ପୂର୍ବରୁ ଏହି ଅଞ୍ଚଳକୁ କଣ୍ଟେନ୍ମେଣ୍ଟ୍ ଜୋନ୍ ଘୋଷଣା କରାଯାଇଥିଲା। ବର୍ତ୍ତମାନ ବଫର ଜୋନ୍ ଘୋଷଣା କରାଯାଇଛି। ଏହି ଅଞ୍ଚଳରୁ ଗୋଟିଏ ପରିବାରର ସ୍ତ୍ରୀ, ସ୍ବାମୀ ଏବଂ ୪ ବର୍ଷର ଶିଶୁ ସଂସ୍ପର୍ଶରେ ଆସିଥିବା ଏହି ୧୩ ଜଣଙ୍କ କଣ୍ଟାକ୍ଟ ଟ୍ରେସିଂ ପରେ ସ୍ବାବ୍ ସଂଗ୍ରହ ହୋଇଥିଲା। ଏମାନଙ୍କର ରିପୋର୍ଟ ପଜିଟିଭ ଆସିଥିବା ବେଳେ ଏଥିରେ ଜଣେ କରୋନା ଯୋଦ୍ଧା ମଧ୍ୟ ଆକ୍ରାନ୍ତ ହୋଇଛନ୍ତି।
ସୂଚନାଯୋଗ୍ୟ, ଜିଲାରେ ମୋଟ୍ ଆକ୍ରାନ୍ତଙ୍କ ୩୮ରେ ପହଞ୍ଚିଥିବା ବେଳେ ୧୨ ଜଣ ସୁସ୍ଥ ହୋଇଛନ୍ତି। ୨୬ ଜଣ ଚିକିତ୍ସାଧୀନ ଅଛନ୍ତି।
