ଭୁବନେଶ୍ୱର, ୧୩।୩(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି) ନିର୍ବାଚନ ପାଇଁ ପ୍ରସ୍ତୁତି ଜୋର୍ଦାର ଚାଲିଛି। ଏହି ଅବସରରେ ଶନିବାର ଖୋର୍ଦ୍ଧା ଜିଲା ମୁଖ୍ୟାଳୟରୁ ଭୁବନେଶ୍ୱରକୁ ଇଭିଏମ୍ ଅଣାଯାଇଛି। ଚଳିତ ନିର୍ବାଚନରେ କର୍ପୋରେଟର ଓ ମେୟର ପଦବୀ ପାଇଁ ନିର୍ବାଚନ ହେଉଛି। ସମୁଦାୟ ୭୦୫ଟି ବୁଥ୍ରେ ଏନେଇ ମତଦାନ ହେବାକୁ ଯାଉଛି। ପ୍ରତି ବୁଥ୍ରେ ଦୁଇଟି ଲେଖାଏ ଇଭିଏମ୍ ମେଶିନ୍ ଆବଶ୍ୟକ। ତେଣୁ ୧୪୧୦ ଇଭିଏମ୍ ମେଶିନ୍ ଆବଶ୍ୟକ ହେବାକୁ ଥିବାବେଳେ ଅତିରିକ୍ତ ଭାବେ ୧୦ପ୍ରତିଶତ ଅର୍ଥାତ୍ ୧୪୦ଟି ଇଭିଏମ୍ ଆସିଥିବା ଅତିରିକ୍ତ ଜିଲାପାଳ ପ୍ରଫୁଲ୍ଲ କୁମାର ସ୍ବାଇଁ ସୂଚନା ଦେଇଛନ୍ତି। ତ୍ରୁଟିମୁକ୍ତ ନିର୍ବାଚନ ପାଇଁ ମୋଟ୍ ୧୫୫୦ ଇଭିଏମ୍ ଭୁବନେଶ୍ୱରକୁ ଆସିଛି। ନିର୍ବାଚନ ସମୟରେ କେଉଁଠାରେ ଇଭିଏମ୍ ମେଶିନ ଖରାପ ହେଲେ ବା ପରିଚାଳନାଗତ ତ୍ରୁଟି ଦେଖାଦେଲେ ତୁରନ୍ତ ଏହି ଅତିରିକ୍ତ ଇଭିଏମ୍ ମଧ୍ୟରୁ ଯୋଗାଇ ଦିଆଯିବ। ବିଜେବି ସ୍ବୟଂଶାସିତ ମହାବିଦ୍ୟାଳୟରେ ହୋଇଥିବା ଷ୍ଟ୍ରଙ୍ଗ୍ ରୁମ୍ରେ କଡ଼ା ସୁରକ୍ଷା ମଧ୍ୟରେ ରଖାଯାଇଛି। ବିଭିନ୍ନ ରାଜନୈତିକ ଦଳର ଏଜେଣ୍ଟଙ୍କ ସମ୍ମୁଖରେ ୧୭ ଓ ୧୮ ତାରିଖ ଦୁଇଦିନ ଧରି ଇଭିଏମ୍ କମିଶନିଂ କରାଯିବ। ୨୨ ତାରିଖ ପର୍ଯ୍ୟନ୍ତ ଷ୍ଟ୍ରଙ୍ଗ୍ରୁମ୍ରେ ଇଭିଏମ୍ଗୁଡିକୁ ରଖାଯିବ। ୨୩ରେ ଇଭିଏମ୍ଗୁଡିକ ମହାନଗରରେ ହୋଇଥିବା ବିଭିନ୍ନ ବୁଥ୍କୁ ସ୍ଥାନାନ୍ତର କରାଯିବ। ସେହିପରି ମହାନଗରର ବିଭିନ୍ନ ୱାର୍ଡ଼ରେ ସ୍ବାଧୀନରୁ ଏକାଧିକ ପ୍ରାର୍ଥୀ ରହିଥିବାବେଳେ ସମସ୍ତ ଚିହ୍ନ କିପରି ତ୍ରୁଟିମୁକ୍ତ ଭାବେ ଇଭିଏମ୍ରେ ସ୍ଥାନ ପାଇବ ସେନେଇ ଗୁରୁତ୍ୱ ଦିଆଯିବ। ମହାନଗର ନିର୍ବାଚନରେ ଭୋଟରମାନେ ପ୍ରଥମଥର ନୋଟା (ନନ୍ ଅଫ୍ ଦି ଏବଭ୍) ବ୍ୟବହାର ଲାଗି ସୁଯୋଗ ପାଇବେ। ୱାର୍ଡ଼ କୌଣସି ବି ପ୍ରାର୍ଥୀ ଯୋଗ୍ୟ ମନେ ନ ହେଲେ ଭୋଟର୍ ନୋଟା ବାଛିପାରିବେ। ତେବେ ଇଭିଏମ୍ ପରିଚାଳନା ଏବଂ ଭୋଟ୍ ଗଣତି ପର୍ଯ୍ୟନ୍ତ ସବୁ କିଛି କିପରି ଶାନ୍ତିଶୃଙ୍ଖଳାର ସହ ହେବ ସେନେଇ ଆନୁସଙ୍ଗିକ ବନ୍ଦୋବସ୍ତ କରାଯାଉଥିବା ଏଡିଏମ୍ କହିଛନ୍ତି। ସୂଚନାଯୋଗ୍ୟ, ଇଭିଏମର ତ୍ରୁଟିମୁକ୍ତ ପରିଚାଳନା ପାଇଁ ବିଜେବି ସ୍ବୟଂଶାସିତ ମହାବିଦ୍ୟାଳୟରେ ତାଲିମ୍ ପ୍ରଦାନ କରାଯିବ। ୧୪ ତାରିଖରୁ ୧୬ତାରିଖ ୩ ଦିନ ପର୍ଯ୍ୟନ୍ତ ପୁଲିଂ ପର୍ସନ ଟ୍ରେନିଂ ଆରମ୍ଭ ହେବ।
