ନୋଏଡା,୩୦ ।୮: ଉତ୍ତର ପ୍ରଦେଶ ନୋଏଡ଼ାର ଟ୍ୱିନ ଟାୱାର ଭଙ୍ଗାଯିବା ପରେ ଏବେ ଏହାର ବର୍ଜ୍ୟ ବସ୍ତୁକୁ ଉଠାଇବା ପ୍ରକ୍ରିୟା ଗୋଟିଏ ସପ୍ତାହ ମଧ୍ୟରେ ଆରମ୍ଭ ହୋଇଯିବ । ଏହା ପୂର୍ବରୁ ସେଠାରେ ମରାମତି ଓ ସଫାସୁତୁରା କାମକୁ ଆଗେଇ ନିଆଯାଇଛି । ଟାୱାରରୁ ବାହାରିଥିବା ପ୍ରାୟ ୮୦ ହଜାର ଟନ ଭଗ୍ନାବଶେଷ ମଧ୍ୟରୁ ୫୦ ହଜାର ଟନ ବେସମେଣ୍ଟରେ ଭରି ଦିଆଯିବ । ବାକି ୩୦ ହଜାର ଟନ ଭଗ୍ନାବଶେଷର ଅଧା ଗୋଟିଏ ମାସ ମଧ୍ୟରେ କଢାଯିବ ।
ପଦୂଷଣ ଉପରେ ଲାଗୁ ହୋଇଥିବା ଗ୍ରେଡେଡ ରେସ୍ପନ୍ସ ଆକ୍ସନ ପ୍ଲାନ(ଗ୍ରେପ) ଅନୁଯାୟୀ, ୧ ଅକ୍ଟୋବର ଭିତରେ ଯେତେ ସମ୍ଭବ ଭଗ୍ନାବଶେଷକୁ ଉଠାଇ ସେକ୍ଟର-୮୦ର କନଷ୍ଟ୍ରକଶନ ଆଣ୍ଡ ଡିମୋଲିଶନ(ସିଆଣ୍ଡଡି)ୱେଷ୍ଟ ମ୍ୟାନେଜମେଣ୍ଟ ପ୍ଲାଣ୍ଟରେ ରିସାଇକ୍ଲିଂ ପାଇଁ ପଠାଇ ଦିଆଯିବ । ଭଗ୍ନାବଶେଷକୁ ହଟାଇବା ପାଇଁ ୯୦ ଦିନ ସମୟ ନିର୍ଦ୍ଧାରଣ କରାଯାଇଛି । ଏହାକୁ ହଟାଇବାକୁ କଂକ୍ରିଟ ଓ ସିମେଣ୍ଟର ବଡ ବଡ ଖଣ୍ଡକୁ ଡ୍ରିଲ ମେଶିନ ଦ୍ୱାରା ଭଙ୍ଗାଯିବ । ଏହା ପରେ ଡମ୍ପରରେ ଭର୍ତ୍ତି କରାଯାଇ ସିଆଣ୍ଡଡି ପ୍ଲାଣ୍ଟକୁ ପଠାଇ ଦିଆଯିବ । ଏହି ପ୍ରକ୍ରିୟା ଆରମ୍ଭ କରିବାକୁ ଗୋଟିଏ ସପ୍ତାହ ଲାଗିବ । ପ୍ରାୟ ୧ ହଜାର ଡମ୍ପର ଜରିଆରେ ଭଗ୍ନାବଶେଷକୁ ସିଆଣ୍ଡଡି ପ୍ଲାଣ୍ଟକୁ ପଠାଇ ଦିଆଯିବ ।
