ଥୁଆମୂଳ ରାମପୁର, ୨୬ା୩ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ଓ କଲମପୁର ବ୍ଲକକୁ ସଂଯୋଗ କରୁଥିବା ମୁଖ୍ୟ ଜୀବନରେଖା ସଦୃଶ ସିଙ୍ଗାରି ଘାଟି ରାସ୍ତାରେ ଗୁରୁବାର ଏକ ବଡ଼ ଧରଣର ଯାନବାହନ ବିଭ୍ରାଟ ଦେଖାଦେଇଛି। ଏକ ୧୪ ଚକିଆ ଭାରିଯାନ ଘାଟି ମଝିରେ ଫସିଯିବା ଫଳରେ ଦୀର୍ଘ ୫ ଘଣ୍ଟା ଧରି ଯାତାୟତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା।
ମିଳିଥିବା ସୂଚନା ଅନୁସାରେ, ଉକ୍ତ ଗାଡ଼ି ଚାଳକ ଜଣକ ଗୁଗଲ୍ ମ୍ୟାପ୍ (Google Map) ସାହାଯ୍ୟରେ କାଶୀପୁର ଅଭିମୁଖେ ଯାଉଥିବା ବେଳେ ଏହି ଦୁର୍ଗମ ଘାଟି ରାସ୍ତା ମଧ୍ୟକୁ ପ୍ରବେଶ କରିଥିଲେ। ମାତ୍ର ଘାଟିର ଅତ୍ୟଧିକ ସଂକୀର୍ଣ୍ଣ ମୋଡ଼ରେ ଏହି ୧୪ ଚକିଆ ବିଶିଷ୍ଟ ବଡ଼ ଟ୍ରକ୍ଟି ଫସିଯାଇଥିଲା। ଫଳରେ ରାସ୍ତାର ଉଭୟ ପାର୍ଶ୍ୱରେ ଶହ ଶହ ଗାଡ଼ି ମୋଟର ଅଟକି ରହି ଯାତ୍ରୀମାନେ ଅକଥନୀୟ ହଇରାଣ ହୋଇଥିଲେ।
ସକାଳୁ ଫସି ରହିଥିବା ଗାଡ଼ିଟିକୁ ଶେଷରେ ଏକ ଜେସିବି (JCB) ସାହାଯ୍ୟରେ ବହୁ କଷ୍ଟରେ ମଧ୍ୟାହ୍ନ ପ୍ରାୟ ୨ଟା ସମୟରେ ରାସ୍ତାରୁ କଡ଼ା ଯାଇଥିଲା। ଏହାପରେ ଯାତାୟତ ସ୍ୱାଭାବିକ ହୋଇଥିଲେ ହେଁ ଘଣ୍ଟା ଘଣ୍ଟା ଧରି ଯାତ୍ରୀମାନେ ଘାଟି ମଝିରେ ଅଟକି ରହିଥିବା ଦେଖିବାକୁ ମିଳିଥିଲା।
ସିଙ୍ଗାରି ଘାଟି ରାସ୍ତା ନିଜର ବିପଦଜନକ ବାଙ୍କ ପାଇଁ ପୂର୍ବରୁ ଚର୍ଚ୍ଚାରେ ରହିଛି। ଏଭଳି ସ୍ଥିତିରେ ବଡ଼ ଭାରିଯାନଗୁଡ଼ିକ ଏହି ରାସ୍ତାକୁ ଆସି ଫସିଯିବା ଦ୍ୱାରା ଜନସାଧାରଣ ଅସୁବିଧାର ସମ୍ମୁଖୀନ ହେଉଛନ୍ତି। କଲମପୁର ଓ ଥୁଆମୂଳ ରାମପୁର ଉଭୟ ପାର୍ଶ୍ୱର ପ୍ରବେଶ ପଥରେ ରେଳୱେ ଲେଭଲ୍ କ୍ରସିଂ ଭଳି ‘ହାଇଟ୍ ବ୍ୟାରିଅର୍’ ବା ସୁରକ୍ଷା ଗେଟ୍ ଲଗାଇବାକୁ ସାଧାରଣରେ ଦୃଢ଼ ଦାବି ହୋଇଛି। ପ୍ରଶାସନ ଓ ବିଭାଗୀୟ ଅଧିକାରୀମାନେ ଏଥିପ୍ରତି ଉଦାସୀନ ରହିଥିବା ନେଇ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ତୁରନ୍ତ ଏହି ସମସ୍ୟାର ସ୍ଥାୟୀ ସମାଧାନ ନହେଲେ ଆଗକୁ ଜନ ଆନ୍ଦୋଳନର ଚେତାବନୀ ଦିଆଯାଇଛି।
