ନୂଆଦିଲ୍ଲୀ,୨୮।୭: ପେଗାସସ୍ ମାମଲାକୁ ନେଇ କେନ୍ଦ୍ର ସରକାର ହରଡ଼ଘଣାରେ ପଡ଼ିଛନ୍ତି। ଲୋକ ସଭା ଏବଂ ରାଜ୍ୟ ସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଘେରିବା ଲାଗି କଂଗ୍ରେସ ନେତୃତ୍ୱରେ ୧୪ଟି ବିରୋଧୀ ଦଳ ଏକଜୁଟ ହୋଇଛନ୍ତି। ଏହି ମାମଲାରେ କୌଣସି ବୁଝାମଣା କରାଯିବ ନାହିଁ ବୋଲି ରାହୁଲ ଗାନ୍ଧୀ ବିରୋଧୀଙ୍କ ପକ୍ଷରୁ ବୁଧବାର ଅନୁଷ୍ଠିତ ହୋଇଥିବା ବୈଠକରେ କହିଛନ୍ତି। ବିରୋଧୀ ଦଳଙ୍କ ପକ୍ଷରୁ ଏନେଇ ସରକାରଙ୍କୁ ନୋଟିସ୍ ଜାରି କରାଯିବ। ଅନୁଷ୍ଠିତ ହୋଇଥିବା ବୈଠକରେ କଂଗ୍ରେସ ସମତେ ଡିଏମ୍କେ, ଏନ୍ସିପି, ଏସ୍ଏସ୍, ଆର୍ଜେଡ଼ି, ଏସ୍ପି, ସିପିଆଇଏମ, ସିପିଆଇ, ଏନ୍ସି, ଏଏପି, ଆଇୟୁଏମ୍ଏଲ୍, ଆର୍ଏସ୍ପି, କେସିଏମ୍, ଭିସିକେ ଆଦି ରାଜନୈତିକ ଦଳର ସଦସ୍ୟମାନେ ଉପସ୍ଥିତ ରହି ରାହୁଲଙ୍କୁ ସମର୍ଥନ କରିଛନ୍ତି। କଂଗ୍ରେସ ସଦସ୍ୟ ମଲ୍ଲିକାର୍ଜୁନ ଖଡ୍ଗେ ସଂସଦରେ ପେଗାସସ୍ ଉପରେ ଆଲୋଚନା କରିବାକୁ ଦାବି କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଏହାର ତଦନ୍ତ ନିର୍ଦ୍ଦେଶ ଦେବାକୁ ସେ କହିଛନ୍ତି।
