ଭୁବନେଶ୍ୱର, ୨୨।୧(ବ୍ୟୁରୋ): ବାତ୍ୟା ‘ଫନୀ ’ରେ ପ୍ରଭାବିତ ହୋଇଥିବା ୫ଟି ଜିଲାର ୧୪୫ଟି ବେସରକାରୀ ଅନୁଦାନପ୍ରାପ୍ତ ମହାବିଦ୍ୟାଳୟର ମରାମତି ଓ ନବୀକରଣ ଲାଗି ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୩୦ କୋଟି ଟଙ୍କା ପ୍ରଦାନ କରାଯାଇଥିଲା। ହେଲେ ଏହି ଟଙ୍କା କେଉଁ ବାଟରେ କଲେଜଗୁଡ଼ିକ ଖର୍ଚ୍ଚ କଲେ ତା’ର ହିସାବ ଏଯାଏ ବିଭାଗକୁ ପ୍ରଦାନ କରାଯାଇନାହିଁ। ଏ ନେଇ ଉଚ୍ଚଶିକ୍ଷା ବିଭାଗ ପକ୍ଷରୁ କଲେଜଗୁଡ଼ିକୁ ଚିଠି କରାଯାଇ ତୁରନ୍ତ ଖର୍ଚ୍ଚ ହୋଇଥିବା ଟଙ୍କାର ହିସାବ ଦେବା ସହ ବଳକା ଟଙ୍କା ଫେରାଇବା ଲାଗି ନିର୍ଦ୍ଦେଶ ଦିଆଯାଇଛି। ବିଭାଗ ପକ୍ଷରୁ ମିଳିଥିବା ସୂଚନାନୁସାରେ, ୨୦୧୯ରେ ହୋଇଥିବା ଏହି ବାତ୍ୟାରେ କଟକ, ଖୋର୍ଦ୍ଧା, ପୁରୀ, ଜଗତ୍ସିଂହପୁର ଓ କେନ୍ଦ୍ରାପଡ଼ାର ୧୪୫ଟି ଅନୁଦାନପ୍ରାପ୍ତ କଲେଜକୁ ୩୦ କୋଟି ଟଙ୍କା ପ୍ରଦାନ କରାଯାଇଥିଲା। କିନ୍ତୁ ୩ବର୍ଷ ବିତିଯାଇଥିଲେ ମଧ୍ୟ ଅନୁଦାନ ପାଇଥିବା ସମସ୍ତ କଲେଜ ସେମାନଙ୍କ ଖର୍ଚ୍ଚର ହିସାବ ଏଯାଏ ଦେଇନାହାନ୍ତି। ୧୪୫ଟି କଲେଜ ମଧ୍ୟରୁ କେବଳ ୧୦ଟି କଲେଜ ୨ କୋଟି ଟଙ୍କାର ହିସାବ ପ୍ରଦାନ କରିଥିବାବେଳେ ବାକି ୧୩୫ଟି କଲେଜ ୨୮ କୋଟିର ହିସାବ ଦେଇନାହାନ୍ତି। ତୁରନ୍ତ ଉକ୍ତ ଟଙ୍କାର ହିସାବ (ୟୁଟିଲାଇଜେଶନ ସାର୍ଟିଫିକେଟ୍) ପ୍ରଦାନ କରିବା ଲାଗି ବିଭାଗୀୟ ପ୍ରମୁଖ ଶାସନ ସଚିବ ନିର୍ଦ୍ଦେଶ ଦେଇଛନ୍ତି।
