କୋରାପୁଟ,୨୫।୧(ସ୍ବ.ପ୍ର): ରାଜ୍ୟ ବାହାରକୁ ଚାଲାଣ ପାଇଁ ଏକ ବନ୍ଦ କୋଠରିରେ ରଖାଯାଇଥିବା ୧୨୩ କେଜି ଗଞ୍ଜେଇକୁ ପୋଲିସ ଜବତ କରିଛି। ଏହାର ବଜାର ମୂଲ୍ୟ ୧୨ ଲକ୍ଷ ଟଙ୍କା ହେବ ବୋଲି କୁହାଯାଉଛି। କୋରାପୁଟ ଜିଲା ଲମତାପୁଟ ବ୍ଲକ ମାଛକୁଣ୍ଡ ଥାନା ଅନ୍ତର୍ଗତ ବାଲେଲ ଗ୍ରାମର ତ୍ରିନାଥ ଖରାଙ୍କ ବନ୍ଦଥିବା ଘରୁ ଏତେ ପରିମାଣର ଗଞ୍ଜେଇ ମିଳିଥିବା ଜଣାପଡିଛି। ଖବରରୁ ଜଣାପଡିଛି, ରାଜ୍ୟ ବାହାରକୁ ଚାଲାଣ ପାଇଁ ତ୍ରିନାଥଙ୍କ ଏକ ବନ୍ଦ ଘର ଭିତରେ ଗଞ୍ଜେଇ ରଖାଯାଇଥିବା ସୂଚନା ପାଇ ନନ୍ଦପୁର ଏସ୍ଡିପିଓ ସଞ୍ଜୟ ମହାପାତ୍ର ମାଛକୁଣ୍ଡ ପୋଲିସକୁ ଖବର ଦେଇଥିଲେ। ମାଛକୁଣ୍ଡ ପୋଲିସ ବାଲେଲ ଗ୍ରାମକୁ ଯାଇଥିଲେ। ତେବେ ପୂର୍ବ ସୂଚନା ପାଇ ତ୍ରିନାଥ ଘରକୁ ତାଲା ପକାଇ ବନ୍ଦ କରି କେଉଁଆଡେ ଚାଲିଯାଇଥିଲେ। ସେ ଦୀର୍ଘ ସମୟ ଧରି ନ ଫେରିବାରୁ ପୋଲିସ ତାଙ୍କ ବନ୍ଦ ଘରର ତାଲା କାର୍ଯ୍ୟନିର୍ବାହୀ ମାଜିଷ୍ଟ୍ରେଟଙ୍କ ଉପସ୍ଥିତିରେ ଭାଙ୍ଗି ଘର ଭିତରେ ବସ୍ତାରେ ରଖାଯାଇଥିବା ୧୨୩ କେଜି ଗଞ୍ଜେଇକୁ ଜବତ କରିଥିଲା। ତ୍ରିନାଥ ଆନ୍ଧ୍ରର ମୁଞ୍ଚତ୍ପୁଟ ଅଞ୍ଚଳରୁ କିଣିଥିବା ଏହି ଗଞ୍ଜେଇକୁ ବିଭିନ୍ନ ରାଜ୍ୟକୁ ଚାଲାଣ କରିବାକୁ ମସୁଧା ଚଳାଇଥିଲେ। ସୂଚନାଯୋଗ୍ୟ, ପୋଲିସ ବଙ୍ଗରୁଗୁଡା ନଦୀ ଘାଟରେ ରଖାଯାଇଥିବା ଏକ ବୋଲେରୋକୁ ଯାଞ୍ଚ କରି ଦିନକ ତଳେ ୧୮୮ କେଜି ଗଞ୍ଜେଇ ଜବତ କରିଥିଲା।
