ଢେଙ୍କାନାଳ,୧୬ା୬ (ରତନ ନାୟାର): କଥା କଥାରେ ଫୁଟୁଛି ଗୁଳି। ଅପରାଧୀମାନେ ଆପରାଧିକ କାର୍ଯ୍ୟ ଘଟାଇ ଛୁ’ ମାରୁଛନ୍ତି। ସେମାନେ କେଉଁଠାରୁ ଆସୁଛନ୍ତି, କୁଆଡ଼େ ଯାଉଛନ୍ତି ତାହାର ଟେର୍ କେହି ପାଇପାରୁନାହାନ୍ତି। ଗତ ସାଢ଼େ ୪ ମାସ ମଧ୍ୟରେ ଢେଙ୍କାନାଳ ଜିଲାରୁ ୧୧ଟି ଚୋରା ପିସ୍ତଲ ଜବତ ହେବା ପରେ ଏହାକୁ ନେଇ ଚିନ୍ତାରେ ପଡ଼ିଛି ପୋଲିସ। ଏହାର ଚେର ପଡ଼ୋଶୀ ଝାଡ଼ଖଣ୍ଡ, ବିହାରକୁ ଲମ୍ବିଥିବା ଅନୁମାନ କରାଯାଉଛି।
ମହାବିରୋଡ ଥାନା ଅଞ୍ଚଳରେ ଘଟିଥିବା ଗ୍ରାମ୍ୟ ବ୍ୟାଙ୍କ ଡକାୟତି ଘଟଣା ପରେ ଚୋରା ବନ୍ଧୁକ ଧରାପଗଡ଼ ଅଭିଯାନ ଆରମ୍ଭ ହୋଇଛି। ଏସ୍ପି ଜ୍ଞାନରଞ୍ଜନ ମହାପାତ୍ରଙ୍କ ନେତୃତ୍ୱରେ ଗତ ଫେବୃୟାରୀରୁ ଅଦ୍ୟାବଧି ପୋଲିସର ଏକ ସ୍ବତନ୍ତ୍ର ଟିମ୍ ଚଢ଼ାଉ କରି ୧୧ଟି ପିସ୍ତଲ ଜବତ କରିଛି। କାମାକ୍ଷାନଗର ଉପଖଣ୍ଡ ଅଧୀନ ମହାବିରୋଡ଼ ଥାନା ଅଞ୍ଚଳରୁ ୪, କାମାକ୍ଷାନଗର ଥାନା ଅଞ୍ଚଳରୁ ୩, ଢେଙ୍କାନାଳ ଟାଉନ ଓ ସଦର ଥାନା ଅଞ୍ଚଳରୁ ୪ ଦେଶୀ ପିସ୍ତଲ ଜବତ ହୋଇଛି।
ପୋଲିସ ପକ୍ଷରୁ ହୋଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି, ଝାଡ଼ଖଣ୍ଡ, ବିହାର ଅଞ୍ଚଳରୁ ଖୋର୍ଦ୍ଧା, କଟକ, ତାଳଚେର ରାସ୍ତା ଦେଇ ଢେଙ୍କାନାଳ ଜିଲାକୁ ଏଭଳି ବିପଜ୍ଜନକ ମାରଣାସ୍ତ୍ର ଚାଲାଣ ହେଉଛି। ବୁଧବାର କାମାକ୍ଷାନଗର ଉପଖଣ୍ଡ ତୁମୁସିଙ୍ଗା ଥାନା ପଣ୍ଡୁଆ ଫାଣ୍ଡି ଅଞ୍ଚଳରୁ ଏଭଳି ଏକ ଦେଶୀ ପିସ୍ତଲ ଜବତ ହୋଇଛି। ଗ୍ରାମାଞ୍ଚଳରେ ବନ୍ଧୁକଧାରୀ ବୁଲୁଛନ୍ତି। ସେମାନେ ଅପରାଧ ଘଟାଉଛନ୍ତି। ଠିକାଦାରି କାର୍ଯ୍ୟ, ବ୍ୟବସାୟିକ ଶତ୍ରୁତା, ବଳପୂର୍ବକ ଟେଣ୍ଡର କାର୍ଯ୍ୟ ହାତେଇବାକୁ ନେଇ ଗୁଳିମାଡ଼, ବୋମାମାଡ଼, ମରଣାନ୍ତକ ଆକ୍ରମଣ ଭଳି ଅପରାଧ ବଢ଼ିବାରେ ଲାଗିଛି। ଏ ସଂକ୍ରାନ୍ତରେ ଏସ୍ପି ମହାପାତ୍ର କୁହନ୍ତି, ଝାଡ଼ଖଣ୍ଡ ଓ ବିହାର ଅଞ୍ଚଳରୁ କଟକ, ଖୋର୍ଦ୍ଧା ଓ ତାଳଚେର ଲିଙ୍କ୍ରେ ପିସ୍ତଲ ଯୋଗାଣ ହେଉଥିବା ପ୍ରାଥମିକ ତଦନ୍ତରୁ ସୂଚନା ମିଳିଛି। ଏ ସମ୍ପର୍କରେ ଖୋଳତାଡ଼ ଜାରି ରହିଛି।
