ଜଗତସିଂହପୁର ଅଫିସ,୩୦ା୫: ସାଧାରଣତଃ ଓଡ଼ିଶା ପରିବେଶ ଅଙ୍ଗୁର ଚାଷ ପାଇଁ ଅନୁକୂଳ ନୁହେଁ। କିନ୍ତୁ ଜଗତ୍ସିଂହପୁର ସଦର ମହକୁମା ନିକଟ ପାଟେଣୀ ଗାଁର ଜଣେ ପାନ ଦୋକାନୀ ଅଙ୍ଗୁର ଚାଷ କରି ସଫଳ ହୋଇଛନ୍ତି। ସେ ହେଲେ ଅକ୍ଷୟ ସ୍ବାଇଁ (୪୯)। ଫଳ ହେଉଛି କି ନାହିଁ ପରୀକ୍ଷା କରିବା ପାଇଁ ଅକ୍ଷୟ କଶ୍ମୀରରୁ ଗୋଟିଏ ଅଙ୍ଗୁର ଗଛ ମଗାଇଥିଲେ। ଘର ପାର୍ଶ୍ୱରେ ଏହି ଗଛ ଲଗାଇଥିଲେ ସୁଦ୍ଧା କୌଣସି ସାର, ଔଷଧ ବ୍ୟବହାର କରି ନ ଥିଲେ। ଗଛଟି ଝଟାର ସାହାରା ନେଇ ବଢିବା ସହ ଫଳ ଫଳିଛି। ନିକଟରେ ଏହି ଗଛରୁ ସେ ୧୦ କିଲୋଗ୍ରାମ ଅଙ୍ଗୁର ଅମଳ କରି ସାରିଲେଣି। ଆଉ ୨ରୁ ୩ କିଲୋଗ୍ରାମ ଅମଳ ଅପେକ୍ଷାରେ ରହିଛି। ଏହି ଅଙ୍ଗୁର ସ୍ବାଦ ବହୁତ ମିଠା ହୋଇଥିବାରୁ ବଜାରରେ ଏହାର ଚାହିଦା ରହୁଛି ବୋଲି ଅକ୍ଷୟ କହିଛନ୍ତି। ଅଙ୍ଗୁର ଚାଷ ପାଇଁ ତାଙ୍କ ମନରେ ଉତ୍ସାହ ଆସିଛି। ଗୋଟିଏ ଗଛରୁ ସେ ଚଳିତବର୍ଷ ପାଖାପାଖି ୧୨ରୁ ୧୩ କିଲୋଗ୍ରାମ ଅଙ୍ଗୁର ପାଇଥିବାରୁ ଅଧିକ କଲେ ଅମଳ ବଢିବା ଆଶା ରଖିଛନ୍ତି। ଚଳିତବର୍ଷ ଗୁଣ୍ଠେ ଜମିରେ ଅଙ୍ଗୁର ଚାଷ ପାଇଁ ଲକ୍ଷ୍ୟ ରଖିଥିବା ଅକ୍ଷୟ କହିଛନ୍ତି। ଏଥିରେ ସଫଳ ହେଲେ ପର୍ଯ୍ୟାୟକ୍ରମେ ଅଧିକ ଜମିରେ ଏହି ଚାଷ କରିବାକୁ ଉଦ୍ୟମ ଜାରି ରଖିବେ। ଯେହେତୁ ଏବର୍ଷ ୧୦ କିଲୋଗ୍ରାମ ଅଙ୍ଗୁର ବିକି ପାଖାପାଖି ୧,୦୦୦ ଟଙ୍କା ପାଇଛନ୍ତି ତେଣୁ ଏହାକୁ ଜୀବିକା କରିହେବ ବୋଲି ସେ ଆଶା ରଖିଛନ୍ତି।
