ନୂଆଦିଲ୍ଲୀ, ୧୪।୯: ଏମର୍ଜେନ୍ସି କ୍ରେଡିଟ ଲାଇନ ଗ୍ୟାରେଣ୍ଟି ସ୍କିମ (ଇସିଏଲଜିଏସ୍)ରେ ଦେଶର ୨୫ ଲକ୍ଷ ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଗୁଡିକୁ ୧.୧୮ ଲକ୍ଷ କୋଟି ଟଙ୍କାର ଋଣ ସହାୟତା ଯୋଗାଇ ଦିଆଯାଇଛି। ଆତ୍ମନିର୍ଭର ଭାରତ ଯୋଜନାରେ ସରକାର ଏହି ବର୍ଗରେ ୩ ଲକ୍ଷ କୋଟି ଟଙ୍କା ପ୍ରଦାନ କରାଯିବା ନେଇ ଘୋଷଣା କରିଥିଲେ। ମୋଟ ୪୨ ଲକ୍ଷ କ୍ଷୁଦ୍ର ଶିଳ୍ପ ଲାଗି ୧.୬୩ ଲକ୍ଷ କୋଟି ଟଙ୍କାର ଋଣ ମଞ୍ଜୁର କରାଯାଇଛି। କୋଭିଡ ଦ୍ୱାରା ପ୍ରଭାବିତ ଏମ୍ଏସ୍ଏମ୍ଇକୁ ସହାୟତା କରିବାକୁ ସରକାର ଏଭଳି ଘୋଷଣା କରିଥିଲେ। ସେପ୍ଟେମ୍ବର ୧୦ ସୁଦ୍ଧା ୨୩ ରାଷ୍ଟ୍ରାୟତ୍ତ ବ୍ୟାଙ୍କ ୧.୧୮ ଲକ୍ଷ କୋଟି ଋଣ ଯୋଗାଇ ଦେଇଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ ସୂଚନା ଦେଇଛନ୍ତି।
କେନ୍ଦ୍ର ସରକାରଙ୍କ ଆତ୍ମନିର୍ଭର ଭାରତରେ ଘୋଷଣା ହୋଇଥିବା ବିଭିନ୍ନ ଯୋଜନାର ଅଗ୍ରଗତି ନେଇ ସୀତାରାମନ ରବିବାର ସୂଚନା ଦେଇ କହିଛନ୍ତି, ନ୍ୟାଶନାଲ ବ୍ୟାଙ୍କ ଫର ଏଗ୍ରିକଲଚର ଆଣ୍ଡ ରୁରାଲ ଡେଭଲପମେଣ୍ଟ(ନାବାର୍ଡ) ପକ୍ଷରୁ କୃଷକଙ୍କ ଲାଗି ୩୦ ହଜାର କୋଟି ଟଙ୍କାର ପୁଞ୍ଜି ବ୍ୟବସ୍ଥା କରାଯାଇଛି। ଅତିରିକ୍ତ ଜରୁରିକାଳୀନ ପରିଚାଳନା ପୁଞ୍ଜି ବାବଦ ଏଭଳି ଅର୍ଥ ପ୍ରଦାନ କରାଯାଉଛି। ଏହା ଅଧୀନରେ ବର୍ତ୍ତମାନ ସୁଦ୍ଧା ୨୫ ହଜାର କୋଟି ଟଙ୍କା ଦିଆଯାଇଛି। ସେହିଭଳି ସ୍ପେଶାଲ ଲିକ୍ୟୁଡିଟି ଫାସିଲିଟି(ଏସ୍ଏଲ୍ଏଫ୍)ରେ ନାବାର୍ଡକୁ ବଳକା ୫ ହଜାର କୋଟି ଟଙ୍କା ମିଳିଛି। ଏହା ଏନ୍ବିଏଫ୍ସି ଏବଂ ଏନ୍ବିଏଫ୍ସି-ଏମ୍ଏଫ୍ଆଇକୁ ଯୋଗାଇ ଦିଆଯିବାର ବ୍ୟବସ୍ଥା କରାଯାଉଛି। ଏ ନେଇ ଶୀଘ୍ର ଗାଇଡ ଲାଇନ ଜାରି କରାଯିବ।
ସେହିଭଳି ପାର୍ସିଆଲ କ୍ରେଡିଟ ଗ୍ୟାରେଣ୍ଟି ସ୍କିମ ୨.୦ରେ ବର୍ତ୍ତମାନ ୨୫,୦୫୫ କୋଟି ଟଙ୍କା ମଞ୍ଜୁର ହୋଇଛି। ଅତିରିକ୍ତ ୪,୩୬୭ କୋଟି ଟଙ୍କା ମଞ୍ଜୁରୀ ଅପେକ୍ଷାରେ ରହିଛି। ଏହାବାଦ ସେପ୍ଟେମ୍ବର ୮ ସୁଦ୍ଧା ୨୭.୫୫ ଲକ୍ଷ ଟିକସଦାତାଙ୍କୁ ୧.୦୧ ଲକ୍ଷ କୋଟି ଟଙ୍କାର ଆୟକର ରିଫଣ୍ଡ ଦିଆଯାଇଛି। ସେହିଭଳି ଚାପରେ ରହିଥିବା ଏନ୍ବିଏଫ୍ସି ଏବଂ ମାଇକ୍ରୋ ଫାଇନାନ୍ସ ପ୍ରତିଷ୍ଠାନଗୁଡିକୁ ୧୦,୫୯୦ କୋଟି ଟଙ୍କା ଯୋଗାଇ ଦେବାକୁ ବ୍ୟବସ୍ଥା କରାଯାଉଛି ବୋଲି ସୀତାରାମନ ସ୍ପଷ୍ଟ କରିଛନ୍ତି। ସୂଚନା ଯୋଗ୍ୟ ଇସିଏଲ୍ଜିଏସ୍କୁ କେନ୍ଦ୍ର କ୍ୟାବିନେଟ ମେ ୨୦ରେ ମଞ୍ଜୁରୀ ପ୍ରଦାନ କରିଥିଲା। ଏହା ଦ୍ୱାରା ଏମ୍ଏସ୍ଏମ୍ଇଗୁଡିକୁ ୯.୨୫% ସୁଧ ହାରରେ ଋଣ ସହାୟତା ପ୍ରଦାନ କରିବା ଲାଗି ଯୋଜନା ରଖାଯାଇଛି।
