ନୂଆଦିଲ୍ଲୀ, ୨୨ା୩(ପି.ଟି.): ଆଦାନୀ ଗ୍ରୁପ୍ ପ୍ରସଙ୍ଗକୁ ନେଇ ବିରୋଧୀ ଦଳଗୁଡ଼ିକର ହଟ୍ଟଗୋଳ ମଧ୍ୟରେ ମଙ୍ଗଳବାର ୨୦୨୨-୨୩ ଆର୍ଥତ୍କ ବର୍ଷ ଲାଗି କେନ୍ଦ୍ର ସରକାରଙ୍କ ୧.୪୮ ଲକ୍ଷ କୋଟି ଟଙ୍କାର ଅତିରିକ୍ତ ବ୍ୟୟବରାଦ ଲୋକ ସଭାରେ ଗୃହୀତ ହୋଇଛି। ଗତ ୧୩ ତାରିଖରେ ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧରୀ ଏହି ଅତିରିକ୍ତ ଖର୍ଚ୍ଚ ଦାବି ଉପସ୍ଥାପନ କରିଥିଲେ। ଏହାକୁ ମିଶାଇ ମୋଟ ଅତିରିକ୍ତ ବ୍ୟୟ ଦାବି ୨,୭୦,୫୦୮.୮୯ କୋଟି ଟଙ୍କାରେ ପହଞ୍ଚତ୍ଛି। ସେଥିରୁ ମୋଟ ନଗଦ ଖର୍ଚ୍ଚ ଦାବି ୧,୪୮,୧୩୩.୨୩ କୋଟି ଟଙ୍କା। ଅବଶିଷ୍ଟ ବ୍ୟୟକୁ ବିଭିନ୍ନ ମନ୍ତ୍ରଣାଳୟ/ବିଭାଗ ଖର୍ଚ୍ଚ କାଟ୍ କରି କିମ୍ବା ବିଭିନ୍ନ ସୂତ୍ରରୁ ଆଦାୟ ବଢ଼ାଇ ଭରଣା କରାଯିବ ବୋଲି ଏକ ବିବୃତିରେ କୁହାଯାଇଛି। ଅତିରିକ୍ତ ବ୍ୟୟବରାଦରୁ ୩୬,୩୨୫ କୋଟି ଟଙ୍କା ସାର ସବ୍ସିଡି ବାବଦରେ ବିନିଯୋଗ ହେବ। ଏହା ବ୍ୟତୀତ ସାର୍ବଜନିକ ସେବା ଦାୟିତ୍ୱ ନିଧି (ୟୁଏସ୍ଓଏଫ୍) ପାଇଁ ୨୫,୦୦୦ କୋଟି, ପ୍ରତିରକ୍ଷା ବିଭାଗ ଓଆର୍ଓପି ବକେୟା ପ୍ରଦାନ ବାବଦ ୩୩,୭୧୮.୪୯ କୋଟି ବ୍ୟୟ ହେବ। ସେହିପରି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକ ଲାଗି ଜିଏସ୍ଟି କ୍ଷତିପୂରଣ ପାଣ୍ଠିକୁ ଅତିରିକ୍ତ ୩୩,୫୦୬ କୋଟି ଟଙ୍କା ପ୍ରଦାନ କରାଯିବ। ଏହା ପୂର୍ବରୁ ଜମ୍ମୁ-କଶ୍ମୀର କେନ୍ଦ୍ରଶାସିତ ଅଞ୍ଚଳ ଲାଗି ବିଲ୍ ଲୋକ ସଭାରେ ଧ୍ୱନି ମତରେ ଗୃହୀତ ହୋଇଥିଲା।
