ଛତ୍ରପୁର,୩୦ା୮(ଡି.ଏନ୍.ଏ.): ଖରିଫ ଧାନ ବିକିବା ପାଇଁ ଆଗୁଆ ଅନଲାଇନ୍ରେ ଚାଷୀ ପଞ୍ଜୀକରଣ ପ୍ରକ୍ରିୟା ସରିଛି। ଚଳିତବର୍ଷ ଧାନ ବିକିବା ପାଇଁ ଗଞ୍ଜାମ ଜିଲାର ୧ଲକ୍ଷ ୩୨ ହଜାର ୬୪୭ ଜଣ ଚାଷୀ ପଞ୍ଜୀକୃତ ହୋଇଛନ୍ତି। ଅନଲାଇନ୍ ପଞ୍ଜୀକରଣ ଆବେଦନ ଜୁଲାଇ ୧୫ରୁ ଆରମ୍ଭ ହୋଇ ଗତ ୨୨ତାରିଖରେ ସରିଥିଲା । ଡିଜିଟାଇଜେସନ ଅବଧି ୨୮ ତାରିଖରେ ସରିଛି । ମିଳିଥିବା ସୂଚନା ଅନୁସାରେ ଜିଲାର ୪୬୪ ପ୍ୟାକ୍ସ (ପ୍ରାଥମିକ ସେବା ସମବାୟ ସମିତି) ମଧ୍ୟରୁ ୩୭୦ ପ୍ୟାକ୍ସ ପକ୍ଷରୁ ୧ ଲକ୍ଷ ୧୨ ହଜାର ୮୭୫ ଜଣ ଚାଷୀ ପଞ୍ଜୀକୃତ ହୋଇଥିବା ବେଳେ ୯୩ଟି ମହିଳା ସଂଘ ପକ୍ଷରୁ ୧୯ ହଜାର ୬୬୫ ଜଣ ଚାଷୀ, ଗୋଟିଏ ପାଣି ପଞ୍ଚାୟତ ପକ୍ଷରୁ ୧୦୭ ଜଣ ଚାଷୀ ଧାନ ବିକିବା ପାଇଁ ପଞ୍ଜୀକୃତ ହୋଇଛନ୍ତି। ସୂଚନାଯୋଗ୍ୟ, ଗତବର୍ଷ ଜିଲାର ୧ଲକ୍ଷ ୨୪ ହଜାର ୩୦୦ ଚାଷୀ ଧାନ ବିକିବା ପାଇଁ ପଞ୍ଜୀକୃତ ହୋଇଥିଲେ । ତେବେ ସେମାନଙ୍କ ମଧ୍ୟରୁ କେବଳ ୯୬ ହଜାର ଚାଷୀଙ୍କଠାରୁ ସରକାର ଧାନ କିଣିପାରିଥିଲେ । ଗତବର୍ଷ ତୁଳନାରେ ଚଳିତଥର ଅଧିକ ଚାଷୀ ସେମାନଙ୍କ ଧାନ ବିକିବା ପାଇଁ ପଞ୍ଜୀକରଣ କରିଛନ୍ତି। ତେବେ ଗତଥର ୨୮ ହଜାରରୁ ଉର୍ଦ୍ଧ୍ୱ ଚାଷୀଙ୍କ ଧାନ କିଣାଯାଇ ପାରି ନ ଥିବାରୁ ଚଳିତବର୍ଷ ସମସ୍ତ ଚାଷୀଙ୍କ ଧାନ କିଭଳି କିଣାଯିବ ସେନେଇ ଆଶଙ୍କା ଦେଖାଦେଇଛି । ଅପରପକ୍ଷରେ ଜିଲାରେ ୪୬୪ ଟି ପ୍ୟାକ୍ସ ଥିବାବେଳେ ସେଥିରୁ ୯୪ ଟି ପ୍ୟାକ୍ସ ଧାନ କିଣା ଦାୟିତ୍ୱରୁ ନିଜକୁ ଦୂରେଇ ରଖିଛନ୍ତି। ଫଳରେ ମହିଳା ସଂଘ ଓ ପାଣି ପଞ୍ଚାୟତ ଉପରେ ଏହି ଦାୟିତ୍ୱ ଦିଆଯାଇଛି ।
