ଓ୍ବାଶିଂଟନ: ବିପଦରେ ସାମୁଦ୍ରିକ କଇଁଛଙ୍କ ସ୍ଥିତି। ଦୀର୍ଘ ୩୦ ବର୍ଷ ମଧ୍ୟରେ ପାଖାପାଖି ୧.୧ ମିଲିୟନ୍ କଇଁଛଙ୍କ ମୃତ୍ୟୁ ହୋଇଥିବା ଆରିଜୋନା ଷ୍ଟେଟ୍ ୟୁନିଭର୍ସିଟି (ଏଏସ୍ୟୁ) ବୈଜ୍ଞାନିକ ଦାବି କରିଛନ୍ତି। ୧୯୯୦ରୁ ୨୦୨୦ ପର୍ଯ୍ୟନ୍ତ ସାମୁଦ୍ରିକ କଇଁଛମାନଙ୍କ ଉପରେ ୟୁନିଭର୍ସିଟି ସାଇଣ୍ଟିଷ୍ଟମାନେ ଅଧ୍ୟୟନ ଜାରି ରଖିଥିଲେ। ଏ ନେଇ ଗ୍ଲୋବାଲ୍ ଚେଞ୍ଜ ବାୟୋଲୋଜିରେ ପ୍ରକାଶ ପାଇଥିବା ଖବର ଅନୁସାରେ ପ୍ରତିବର୍ଷ ୬୫ଟି ଦେଶରେ ୪୪ ହଜାର କଇଁଛ ମନୁଷ୍ୟକୃତ ଅତ୍ୟାଚାରର ଶିକାର ହେଉଛନ୍ତି। ଅନ୍ୟ ଦେଶ ତୁଳନାରେ ଏହି ଦେଶଗୁଡ଼ିକରେ ଅଧିକ ସଂଖ୍ୟାରେ ସାମୁଦ୍ରିକ କଇଁଛ ବସବାସ କରନ୍ତି। କିଛି ସ୍ଥାନରେ କଇଁଛ ଚୋରା ଚାଲାଣ ମଧ୍ୟ ବୃଦ୍ଧି ପାଇଛି। ବିଭିନ୍ନ ଦେଶରେ କଇଁଛଙ୍କୁ ନେଇ କରାଯାଉଥିବା ବେଆଇନ କାର୍ଯ୍ୟକଳାପକୁ ରୋକାଯିବାର ଆବଶ୍ୟକତା ଥିବା ଏଏସ୍ୟୁର ସହକାରୀ ପ୍ରଫେସର୍ ଜେସ୍ ସେଙ୍କୋ କହିଛନ୍ତି।
ମୁଖ୍ୟତଃ ମାଂସ ପାଇଁ କଇଁଛ ଶିକାର କରାଯାଉଥିଲା। କିନ୍ତୁ ଏହା ବ୍ୟତୀତ କଇଁଛଙ୍କ ଶରୀରରୁ ବିଭିନ୍ନ ପ୍ରକାର ଅଳଙ୍କାର, ଔଷଧ ସାଙ୍ଗକୁ ଏହାର ସେଲ୍ ବା ଖୋଳରୁ ମାନବନିର୍ମିତ କଳାକୃତିର ଚାହିଦା ବଢ଼ିବା କାରଣରୁ କଇଁଛଙ୍କ ଶିକାର ଦିନକୁ ଦିନ ବଢ଼ିବା ସହ ଅବୈଧ ଚାଲାଣ ମଧ୍ୟ ଅଧିକ ହୋଇଥିବା ରିପୋର୍ଟରେ ପ୍ରକାଶ ପାଇଛି। ଗାର୍ଡିଆନ୍ରେ ପ୍ରକାଶ ପାଇଥିବା ଖବର ଅନୁସାରେ କଇଁଛ ଶିକାର ଓ ବେଆଇନ୍ ଚୋରା ଚାଲାଣରୁ ବାର୍ଷିକ ୨୩ ବିଲିୟନ୍ ଡଲାର ଆୟ ହେଉଛି।
