ବ୍ରସେଲ୍ସ,୯।୬: ଜୀବନରେ ଅନେକ ସମୟରେ ବିଭିନ୍ନ ପ୍ରକାର ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ବେଳେ ବେଳେ ଏହି ସମସ୍ୟା ଆଶ୍ଚର୍ଯ୍ୟ ମଧ୍ୟ କରିଦେଇଥାଏ। କିଛି ଏଭଳି ସମସ୍ୟା ଦେଖିବାକୁ ମିଳିଛି ବେଲଜିୟମ୍ର ଏଣ୍ଟଓ୍ବର୍ପରେ। ଏଣ୍ଟଓ୍ବର୍ପରେ ରହୁଥିବା ଜଣେ ବ୍ୟକ୍ତିଙ୍କୁ ଦୀର୍ଘ ୯ବର୍ଷ ଧରି ମାଗଣାରେ ପିଜା ଡେଲିଭର ହେଉଛି। ଏହାକୁ ନେଇ ସେ ଏତେ ଅସନ୍ତୋଷ ପ୍ରକାଶ କରିଛନ୍ତି ଯେ, ଅନେକ ଥର ପୋଲିସରେ ମଧ୍ୟ ଅଭିଯୋଗ କରିଛନ୍ତି। ହେଲେ ଏହି ସମସ୍ୟାର ଅନ୍ତ ହେବାର ନାଁ ନେଉନି। ସୂଚନାଯୋଗ୍ୟ, ୬୫ବର୍ଷୀୟ ଜିନ ବେନ ଲେଣ୍ଡଘମ୍ ଏଣ୍ଟଓ୍ବର୍ପରେ ରୁହନ୍ତି। ତାଙ୍କ କହିବା ଅନୁଯାୟୀ ସେ କେବେ ବି ପିଜା ଅର୍ଡର କରିନାହାନ୍ତି। କିନ୍ତୁ ପ୍ରତିଦିନ କେହି ନା କେହି ଡେଲିଭରୀ ବୟ ତାଙ୍କ ଘରେ ପିଜା ଦେଇ କି ଯାଇଥାନ୍ତି। ସବୁଠାରୁ ବିଶେଷ କଥା ହେଲା ଉକ୍ତ ଡେଲିଭରୀର କୌଣସି ସମୟ ସୀମା ନାହିଁ। କେତେବେଳେ ଅଧା ରାତିରେ ତ କେତେବେଳେ ଦିନରେ। କେବଳ ସେତିକି ନୁହେଁ ଥରେ ଏକା ଥରକେ ୧୪ଟି ପିଜା ଡେଲିଭରି ହୋଇଥିଲା ବୋଲି ଜିନ ବେନ କହିଛନ୍ତି। ତେବେ ସେ କେବେବି ଏହି ପିଜାଗୁଡ଼ିକୁ ସ୍ବୀକାର କରି ନ ଥିବାରୁ ଏଥିପାଇଁ ଦେୟ ମଧ୍ୟ ଦେବାକୁ ପଡ଼ିନାହିଁ। ପ୍ରାୟ ସମୟରେ ଏହି ଘଟଣାକୁ ନେଇ ସେ ଚିନ୍ତିତ ଥିବା ସହ ଆଶ୍ଚର୍ଯ୍ୟ ପ୍ରକାଶ ମଧ୍ୟ କରିଥାନ୍ତି। ଏପରିକି ଘର ବାହାରେ ଯଦି କୌଣସି ସ୍କୁଟରର ଶବ୍ଦ ହୁଏ ତେବେ ତାଙ୍କୁ ଲାଗେ ପିଜା ଡେଲିଭରୀ ବୟ ଆସିଗଲାକି? ସେହିଭଳିି କିଛି ଘଟଣା ଘଟିଛି ଜିନ ବେନଙ୍କ ଅନ୍ୟଜଣେ ବନ୍ଧୁଙ୍କ ସହ। ତାଙ୍କୁ ବି ପ୍ରତିଦିନ ମାଗଣାରେ ପିଜା ଡେଲିଭରି ହେଉଛି। ଦୁହିଁିଙ୍କ ମଧ୍ୟରୁ ଯାହା ପାଖରେ ପ୍ରଥମେ ପିଜା ପହଞ୍ଚେ ସେ ଅନ୍ୟଜଣଙ୍କୁ ଏନେଇ ଜଣାଇଥାଏ ବୋଲି ଜିନ ବେନ କହିଛନ୍ତି। ତେବେ ଏହି ପିଜା କିଏ ପଠାଉଛି ଓ କ’ଣ ପାଇଁ ତାହା ଏବେ ଜଣାପଡ଼ିନାହିଁ।
