ଅନୁଗୋଳ ଅଫିସ, ୧୬ା୬
ମୌସୁମୀ ପହଞ୍ଚି ସାରିଥିବାରୁ ପାଗ ବଦଳିଯାଇଛି। ଫଳରେ ତାତିରୁ ଲୋକଙ୍କୁ ତ୍ରାହି ମିଳିଛି। ତେବେ ମୌସୁମୀ ବର୍ଷାକୁ ନେଇ ଚାଷୀମାନେ ବେଶ୍ ଖୁସି ଅଛନ୍ତି। ଠିକଣା ସମୟରେ ବର୍ଷା ଆରମ୍ଭ ହୋଇଥିବାରୁ ଚଳିତବର୍ଷ ପାଣିପାଗ ଚାଷ ପାଇଁ ଅନୁକୂଳ ରହିବ ବୋଲି ସେମାନେ ଅନୁମାନ ଲଗାଇଛନ୍ତି। ଅନ୍ୟପକ୍ଷରେ ପାଣିପାଗ ବିଭାଗ ମଧ୍ୟ ଏ ବର୍ଷ ଭଲ ବର୍ଷା ହେବ ବୋଲି ରିପୋର୍ଟ ଦେଉଛି। ତେଣୁ ଚାଷ କାର୍ଯ୍ୟ ପାଇଁ ସଜବାଜ ହେଉଛନ୍ତି ଅନୁଗୋଳ ଜିଲାର ଚାଷୀ। ଜିଲା ପ୍ରଶାସନ ମଧ୍ୟ ଖରିଫ ଚାଷ ପାଇଁ ଖସଡ଼ା ପ୍ରସ୍ତୁତ କରିବା ସହ ଚାଷୀଙ୍କ ପାଖରେ ବିହନ ଓ ସାର ପହଞ୍ଚାଇବା ଉପରେ ଗୁରୁତ୍ୱ ଦେଉଥିବା ଜଣାପଡ଼ିଛି।
କୃଷି ବିଭାଗର ସୂଚନା ମୁତାବକ, ଚଳିତ ବର୍ଷ ଅନୁଗୋଳ ଜିଲାରେ ମୋଟ୍ ୮୭ ହଜାର ୫୦ ହେକ୍ଟର ଜମିରେ ଖରିଫ ଚାଷ ହେବ। ଏଥିରୁ ୮୩ ହଜାର ୮୪୮ ହେକ୍ଟରରେ ଧାନ ଚାଷ ହେବାକୁ ଥିବାବେଳେ ୩ ହଜାର ୨୦୨ ହେକ୍ଟରରେ ହେବ ଅଣଧାନ ଚାଷ। ମୋଟ୍ ୮୭ ହଜାର ୫୦ ହେକ୍ଟରରୁ ୬୮ ହଜାର ୪୮୫ ହେକ୍ଟର ଜମିକୁ ଜଳସେଚନ ସୁବିଧା ରହିଛି। ତେଣୁ ବହୁ ଚାଷୀ ମୌସୁମୀ ବର୍ଷା ଉପରେ ନିର୍ଭର କରିବେ। ସେହିପରି ଚାଷୀଙ୍କ ପାଖରେ କିପରି ବିହନ ଓ ସାର ପହଞ୍ଚିବ ସେ ନେଇ ବିଭାଗ ଜୋରଦାର ପ୍ରସ୍ତୁତି ଚଳାଇଛି। ଜିଲାରେ ୭ ହଜାରରୁ ଅଧିକ କୁଇଣ୍ଟାଲ ଧାନ ବିହନ ଦରକାର। ଏ ପର୍ଯ୍ୟନ୍ତ ୬ ହଜାର ୯୬୧ କୁଇଣ୍ଟାଲ ଚାଷୀଙ୍କୁ ଯୋଗାଇ ଦିଆଯାଇଛି। ଆଉ ୪୮୦ କୁଇଣ୍ଟାଲ ଖୁବ୍ଶୀଘ୍ର ପହଞ୍ଚତ୍ବ। ଗତବର୍ଷ ତୁଳନାରେ ଏ ବର୍ଷ ଅଧିକ ଏକ ହଜାର କୁଇଣ୍ଟାଲ ବିହନ ଦିଆସରିଲାଣି ବୋଲି ଜିଲା ମୁଖ୍ୟ କୃଷି ଅଧିକାରୀ ଭୋଳାଶଙ୍କର ବେହେରା ସୂଚନା ଦେଇଛନ୍ତି। ସେହିପରି ଚାଷୀଙ୍କ ଚାହିଦାକୁ ଦେଖି ବିରି, ହରଡ଼, ଚିନାବାଦାମ ବିହନ ଯୋଗାଇ ଦିଆଯିବ। ଏସବୁ ଏପର୍ଯ୍ୟନ୍ତ ବିଭାଗ ନିକଟକୁ ଆସିନି। ଫାର୍ମରେ ମୁଗ ବିହନ ରହିଛି। ପରୀକ୍ଷଣ ପରେ ତାହା ଯୋଗାଇ ଦିଆଯିବ। ସେହିପରି ସାର ନେଇ କୌଣସି ସମସ୍ୟା ନାହିଁ। ଚଳିତ ଖରିଫ ଚାଷ ପାଇଁ ୧୪ ହଜାର ୨୦୦ ମେଟ୍ରିକ୍ ଟନ୍ ସାର ଦରକାର ଥିବାବେଳେ ଜିଲାରେ ଡିଏପି ଓ ପଟାସ ଯଥେଷ୍ଟ ପରିମାଣର ମହଜୁଦ ଅଛି। ୫ ଶହ କୁଇଣ୍ଟାଲ ୟୁରିଆ ସାର ଗଚ୍ଛିତ ରହିଛି। ଚଳିତ ମାସରେ ଆଉ କିଛି ୟୁରିଆ ପହଞ୍ଚତ୍ବ। କରୋନା ଯୋଗୁ ପ୍ରବାସୀ ଶ୍ରମିକ ଘରମୁହଁା ହେଉଛନ୍ତି। ସେମାନଙ୍କ ଜୀବନ ଜୀବିକାକୁ ଦୃଷ୍ଟିରେ ରଖି ଚାଷ କାର୍ଯ୍ୟରେ ସେମାନଙ୍କୁ ନିୟୋଜିତ କରିବା ସହ ସମସ୍ତ କୃଷିଭିତ୍ତିକ ଯୋଜନାକୁ ସଫଳତାର ସହ କାର୍ଯ୍ୟକାରୀ କରିବା ଉପରେ ବିଭାଗ ଗୁରୁତ୍ୱ ଦେଉଛି। ଜିଲା ମୁଖ୍ୟ କୃଷି ଅଧିକାରୀ ବେହେରା କହିଛନ୍ତି, ଏ ବର୍ଷ ଠିକ୍ ସମୟରେ ମୌସୁମୀ ଆସି ପହଞ୍ଚତ୍ଛି। ଜିଲାର ପ୍ରାୟ ୧୫ ପ୍ରତିଶତ ଜମିରେ ବୁଣାବୁଣି ସରିଲାଣି। ଏଥର ଭଲ ଚାଷ ହେବ ବୋଲି ଆଶା କରାଯାଉଛି।
