ଭବାନୀପାଟଣା/ପର୍ଲା,୨୩।୮(ଡି.ଏନ୍.ଏ.): ବଛ୍ରେ ନେଇସେ ୭ ବଛର ହେଲା ପଁଚେତ୍ରୁ ବ୍ଲକ ତକ୍ ନରଦି ନରଦି ନିହାଲ ହେଇଗଲୁଁନ, ହେଲେ ଘରବନା ପଏସା ନେଇମିଲୁଛେ। ଇ ଦୁଖର କଥା ବଖାନିଛନ୍ କଳାହାଣି ଜଲା କୋକସରା ବ୍ଲକରେ ନୂତନ୍ ହିସାବେ ଗଠିତ୍ ସୋନପୋଡ଼ାଗୁଡ଼ା ପଁଚେତ୍ ନେଗିଗୁଡ଼ା ଗଁାର ଦୁଇଝନ୍ ହିତାଧିକାରୀ।
ସୂଚନା ଅନ୍ସାରେ ସୋନପୋଡ଼ାଗୁଡ଼ା ପଁଚେତ୍ ଅଧୀନ ନେଗିଗୁଡ଼ା ଗଁାର କ୍ଷୀର ଦେଇ ଆର କ୍ଷୀର ସୁନା ଅକ୍ଟୋବର ୨୬, ୨୦୧୨ରେ ଇନ୍ଦିରା ଆବାସ ତିଆରି ଲାଗି କାର୍ଯ୍ୟାଦେଶ ପାଇଥିଲେ। ଘର ୩ ମାସ ଭିତରେ ତିଆର କରବାର ଲାଗି ବି ନିରଦେଶ ରହିଥିଲା। ସେ ହିସାବେ ଦୁଇ ହିତାଧିକାରୀ ଧାର ଉଧାର କରି ଘର ତିଆରି କଲେ। କ୍ଷୀର ସୁନା ୨ଟା କିସ୍ତିରେ ୨୬ ହଜାର ଟଁକା ପାଇଥିଲାବେଲେ କ୍ଷୀର ଦେଇକୁଁ ଗୁଟେ କିସ୍ତିରେ ୫ ହଜାର ଟଁକା ନ ମିଲିଥିଲା। ହେଲେ ୨୦୧୨-୧୩ ସାଲେ ଇନ୍ଦିରା ଆବାସ ବାବ୍ଦେ ସରକାର ୪୮ ହଜାର ୫ଶହ ଟଁକାକେ ୪ଟା କିସ୍ତିରେ ଦେଉଥିଲେ। ସେନ୍ତା ସରକାରୀ ନିୟମ ହିସାବେ ପହେଲା କିସ୍ତିରେ ୧୫ ହଜାର ଟଁକା, ଦୁତିଅ କିସ୍ତିରେ ୧୦ ହଜାର ୫ଶହ, ତୁରତିଅରେ ୧୨ ହଜାର ଆର ଚତୁରଥ କିସ୍ତିରେ ୧୧ ହଜାର ଟଁକା ଦେବାର ବେବସ୍ତା ରହିଥିଲା। ହେଲେ ଝନେ ହିତାଧିକାରୀ ୨ଟା କିସ୍ତିରେ ୨୬ ହଜାର ଟଁକା ପାଇଥିଲାବେଲେ ଆରଝନେ ଗୁଟେ କିସ୍ତିରେ ୫ ହଜାର ଟଁକା ନ ପାଇଛନ୍। ଇଥ୍ରୁ ଫଟିକ ବୁଝାପଡ଼ୁଛେ ଯେ ସରକାରୀ ନୀତି ନିୟମକେ ବେଖାତିର କରାଯାଇଛେ। ଆଏଜ୍କେ ୭ ବଛର ହେଲା ଦୁଇ ହିତାଧିକାରୀ ବକିଆ ବିଲ୍ ପାଏବାର ଲାଗି ପଁଚେତ୍ନୁ ବ୍ଲକ ତକ୍ ଦଉଡି ଦଉଡି ନିରାଶ ହେଇଛନ୍। ଶେଷେ ଦୁଇ ହିତାଧିକାରୀ ଗହନାଗଁାଠି, ବାସନକୁସନ ବିକି ଦରଖଁଡ଼ିଆ ଘରକେ ପୂରା କରିଥିବାର କହିଛନ୍। ଇ ବାବ୍ଦେ କୋକସରା ବିଡିଓ ବସନ୍ତ କୁମାର ସେଠିକୁଁ ପଚରାଲାରୁ ଫାଇଲ ଦେଖ୍ଲେ ଜନାପଡ଼ବା ବଲି ସେ କହିଥିଲେ।
