କରାଚୀ, ୫ା୯(ପି.ଟି.): ପାକିସ୍ତାନର ବେଲୁଚିସ୍ତାନ ଅନ୍ତର୍ଗତ କ୍ୱେଟ୍ଟାରେ ବୁଧବାର ସୁରକ୍ଷାକର୍ମୀଙ୍କ ଏନ୍କାଉଣ୍ଟରରେ ଜଣେ ମହିଳାଙ୍କ ସମେତ ୬ ଆଇଏସ୍ ଆତଙ୍କବାଦୀ ନିହତ ହୋଇଛନ୍ତି। ଅପରେଶନରେ ଜଣେ କର୍ମଚାରୀ ପ୍ରାଣ ହରାଇଥିବାବେଳେ ୮ ସୁରକ୍ଷାକର୍ମୀ ଆହତ ହୋଇଥିବା ଆଇଜିପି ମହସିନ୍ ହାସନ୍ ବଟ୍ଟ ପ୍ରକାଶ କରିଛନ୍ତି। ଆତଙ୍କବାଦୀମାନେ ଲୁଚିଥିବା ଖବର ମିଳିବା ପରେ ସେଠାରେ ସୁରକ୍ଷାକର୍ମୀମାନେ ଚଢାଉ କରିଥିଲେ। ଆତ୍ମଘାତୀ ଜ୍ୟାକେଟ୍ ପିନ୍ଧିଥିବା ଜଣେ ମହିଳା ଆତଙ୍କବାଦୀ ନିଜକୁ ବିସ୍ଫୋରଣରେ ଉଡ଼ାଇ ଦେଇଥିଲେ। ଆତଙ୍କବାଦୀଙ୍କୁ ଧରିବା ଲାଗି ପ୍ରାୟ ୬ ଘଣ୍ଟା ଅପରେଶନ ଚାଲିଥିଲା। ଏଥିରେ ଗୋଇନ୍ଦା ଏଜେନ୍ସି, ଆତଙ୍କ ନିରୋଧୀ ବାହିନୀ ପ୍ରମୁଖ ସାମିଲ ଥିଲେ। ନିହତ ୬ ଆଇଏସ୍ ଆତଙ୍କବାଦୀଙ୍କଠାରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରାଯାଇଥିବା ପ୍ରକାଶ। ବେଲୁଚିସ୍ତାନରେ ବିସ୍ଫୋରଣ ସହ ସିରିଜ୍ ହତ୍ୟାକାଣ୍ଡରେ ଏହି ଆତଙ୍କବାଦୀମାନେ ସମ୍ପୃକ୍ତ ଥିବା ଜଣାପଡ଼ିଛି।
