ଓଡ଼ଗାଁ,୨୬ା୯(ସ୍ବ.ପ୍ର.): ଏକକ ବ୍ୟବହୃତ ପ୍ଲାଷ୍ଟିକ ଓ ପଲିଥିନ ବ୍ୟବହାର ଉପରେ କେନ୍ଦ୍ର ଓ ରାଜ୍ୟ ସରକାର କଟକଣା ଲାଗୁ କରୁଥିବା ବେଳେ ଏନେଇ ବ୍ୟବସାୟୀ ଓ ଗ୍ରାହକମାନେ ବେଧଡକ ଏହାର ବ୍ୟବହାର କରୁଥିବା ଦେଖିବାକୁ ମିଳିଛି । ଏପରିସ୍ଥଳେ ଓଡ଼ଗାଁରେ ବିଜେ ଶ୍ରୀରଘୁନାଥଜୀଉଙ୍କ ମନ୍ଦିର ଭିତରକୁ ପ୍ଲାଷ୍ଟିକ ଓ ପଲିଥିନ ପ୍ରବେଶ ନିଷେଧ କରିବା ସହିତ ସ୍ଥାନୀୟ ବିଜ୍ଞାପିତ ଅଞ୍ଚଳ ପରିଷଦକୁ ପଲିଥିନ ମୁକ୍ତ କରିବାକୁ ପ୍ରଥମେ ସ୍ଥାନୀୟ ଓ ଲର୍ନିଂ ଏବଂ ଧରିତ୍ରୀ ତରଫରୁ ମନ୍ଦିର ନିକଟରୁ ହିଁ ସଚେତନତା ଶୋଭାଯାତ୍ରା ଆରମ୍ଭ ହୋଇଥିଲା। ଫଳସ୍ବରୂପ ମନ୍ଦିର ଭିତରକୁ ପଲିଥିନ ମୁଣା ବଦଳରେ ବାଉଁଶ ଡାଲାର ବ୍ୟବହାର ଆରମ୍ଭ ହୋଇଥିଲା। ହେଲେ ଏନaଏସି ତରଫରୁ ସଚେତନତା କରାଯାଇଥିବା ବେଳେ କେତେକ ଅସାଧୁ ବ୍ୟବସାୟୀ ଏହାର କାରବାର ବନ୍ଦ କରିନଥିଲେ । ମଙ୍ଗଳବାର ଏନଏସି ତରଫରୁ ସମସ୍ତଙ୍କୁ ପ୍ଲାଷ୍ଟିକ ଓ ପଲିଥିନ ବିକ୍ରି ଓ ବ୍ୟବହାର ନ କରିବାକୁ ମାଇକ ମାଧ୍ୟମରେ ଚେତାବନୀ ଦିଆଯାଇଥିଲା। ନିର୍ବାହୀ ଅଧିକାରୀ ପ୍ରଫୁଲ କୁମାର ମହାପାତ୍ର ସ୍ଥାନୀୟ ପୋଲିସ ସହାୟତାରେ କଦମ ବଜାର, ଲକ୍ଷ୍ମୀ ବଜାର, ଗଣେଶ ବଜାର ଆଦିରେ ଥିବା ଗୋଟିଏ ଗୋଦାମ ସହିତ ୧୬ ଦୋକାନ ଉପରେ ଚଢାଉ କରିଥିଲେ । ନିର୍ବାହୀ ଅଧିକାରୀ ସେମାନଙ୍କଠାରୁ ସମୁଦାୟ ୫୫ କିଗ୍ରା ୩୨୦ ଗ୍ରାମ୍ର ଥରେ ମାତ୍ର ବ୍ୟବହାର ହେଉଥିବା ପ୍ଲାଷ୍ଟିକ, ପଲିଥିନ ଓ ଥର୍ମକୁଲ ପ୍ଲେଟ, ଗ୍ଲାସ ଓ ଦନା ଆଦି ଜବତ କରିଥିଲେ । ସେମାନଙ୍କୁ ଚେତାବନୀ ଦେବା ସହିତ ପ୍ରାଥମିକ ସ୍ତରରେ ମାତ୍ର ୫୫୦ ଟଙ୍କା ଫାଇନ ସ୍ବରୂପ ଆଦାୟ କରିଥିଲେ । ଆଗାମୀ ଦିନରେ ଏହିପରି ଚଢାଉ ଜାରି ରହିବ ବୋଲି ନିର୍ବାହୀ ଅଧିକାରୀ ସୂଚନା ଦେଇଛନ୍ତି । ଏହି ଚଢାଉରେ ଏନଏସି ଷ୍ଟାଫ୍ଙ୍କ ସହିତ ପୋଲିସ ଏଏସଆଇ ଯୁଗଳ କିଶୋର ନାୟକ ଓ ହାବିଲଦାର ବିରେନ୍ଦ୍ର ମହାପାତ୍ର ସାମିଲ ହୋଇଥିଲେ ।
