ବିରିଡି,୨୦।୩ (ଡି.ଏନ୍.ଏ.): ଗ୍ରାମାଞ୍ଚଳରେ ଲୋକମାନଙ୍କୁ ଉପଯୁକ୍ତ ସ୍ବାସ୍ଥ୍ୟସେବା ଯୋଗାଇ ଦେବା ସହ ସ୍ବାସ୍ଥ୍ୟକେନ୍ଦ୍ରଗୁଡ଼ିକର ଭିତ୍ତିଭୂମି ସୁଧାରିବା ପାଇଁ ସରକାର ବିଭିନ୍ନ ଯୋଜନା ପ୍ରଣୟନ କରିଛନ୍ତି। ଏଥିପାଇଁ ବିଭିନ୍ନ ଯୋଜନା ମାଧ୍ୟମରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଉଛି। ବିପୁଳ ଟଙ୍କା ବ୍ୟୟରେ ବିିରିଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଉନ୍ନତୀକାରଣ କରାଯାଇଥିବା ବେଳେ ଆବଶ୍ୟକ ସଂଖ୍ୟକ ଡାକ୍ତର ଓ କର୍ମଚାରୀ ନିଯୁକ୍ତ କରାଯାଉ ନ ଥିବାରୁ ଲୋକମାନଙ୍କୁ ଆବଶ୍ୟକ ସ୍ବାସ୍ଥ୍ୟସେବା ମିଳିପାରୁନାହିଁ।
ପ୍ରାୟ ୯ ବର୍ଷ ହେବ ପ୍ରତିଷ୍ଠା କରାଯାଇଥିବା ବରିଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ବିରିଡ଼ି ବ୍ଲକର ୨୧ ପଞ୍ଚାୟତର ଲୋକେ ସ୍ବାସ୍ଥ୍ୟସେବା ପାଇଁ ନିର୍ଭର କରନ୍ତି। ସ୍ବାସ୍ଥ୍ୟକେନ୍ଦ୍ର ପରିସରରେ ଫୁଲ କୁଣ୍ଡ ଲଗାଯାଇଥିବା ବେଳେ ଗାଡି ପାର୍କିଂ ପାଇଁ ସ୍ବତନ୍ତ୍ର ବ୍ୟବସ୍ଥା, ପାର୍କ ପାଇଁ ଜାଗା, ଫାଟକରେ ସିକ୍ୟୁରିଟି ଗାର୍ଡ ବ୍ୟବସ୍ଥା ସହ କାନ୍ଥରେ ରଙ୍ଗବେରଙ୍ଗର ବିଭିନ୍ନ ଚିତ୍ର ଅଙ୍କାଯାଇଛି। ହେଲେ ଡାକ୍ତରଖାନାରେ ୧୬ ଶଯ୍ୟା ପରିବର୍ତ୍ତେ ମାତ୍ର ୬ ଶଯ୍ୟା ରହିଛି। ସେହିପରି ଏଠାରେ କେବଳ ମେଡିକାଲ ସୁପରିଣ୍ଟେଣ୍ଡେଣ୍ଟ ଥିବା ବେଳେ ବ୍ଲକ ପ୍ରୋଗ୍ରାମ ହେଲ୍ଥ ଅଫିସର ନାହାନ୍ତି। ସ୍ତ୍ରୀ ଓ ପ୍ରସୂତି ବିଭାଗ, ଭେଷଜ ବିଭାଗ, ଶିଶୁ ରୋଗ ବିଭାଗ, ଅସ୍ଥିଶଲ୍ୟ ବିଶେଷଜ୍ଞ ପଦବୀ ଖାଲି ପଡ଼ିଛି। ଫଳରେ ସ୍ଥାନୀୟ ଲୋକେ ଆବଶ୍ୟକ ସ୍ବାସ୍ଥ୍ୟସେବା ପାଇପାରୁନାହାନ୍ତି। ସାମାନ୍ୟ ରୋଗ ହେଲେ ବି ଲୋକମାନେ ଜଗତ୍ସିଂହପୁର ବା କଟକ ବଡ଼ ମେଡିକାଲକୁ ଯାଇ ଅଯଥାରେ ଖର୍ଚ୍ଚାନ୍ତ ହେଉଛନ୍ତି। ୫ ଜଣ ଆସିଷ୍ଟାଣ୍ଟ ସର୍ଜନ ପଦବୀ ଥିଲେ ବି ଗୋଟିଏ ପଦବୀ ଖାଲି ପଡ଼ିଛି। ୬ ଜଣ ଷ୍ଟାଫ ନର୍ସ ରହିବା ନିୟମ ରହିଥିଲେ ବି ଜଣେ ହେଲେ ନର୍ସଙ୍କୁ ନିଯୁକ୍ତି ଦିଆଯାଇନାହିଁ। ୧୨ ପୁରୁଷ ସ୍ବାସ୍ଥ୍ୟକର୍ମୀ ପଦବୀରେ ୯ ଜଣ, ମହିଳା ସ୍ବାସ୍ଥ୍ୟକର୍ମୀ ୧୯ ପଦବୀରେ ୧୬ ଜଣ ଓ ଆଟେଣ୍ଡାଣ୍ଟ ୪ ପଦବୀରେ ୨ ଜଣ କାମ ଚଳାଉଛନ୍ତି। ସେହପରି ୩ ସୁଇପର ରହିବାର ନିୟମ ଥିବା ବେଳେ ଜଣେ ହେଲେ ନିଯୁକ୍ତି ପାଇନହାନ୍ତି। ଏକମାତ୍ର ରୋଷେୟା ପଦବୀ ମଧ୍ୟ ଖାଲି ପଡ଼ିଛି। ଫଳରେ ରେଗୀଙ୍କୁ ରନ୍ଧା ଖାଦ୍ୟ ଦିଆଯାଇପାରୁନାହିଁ।
ଅନ୍ୟପଟେ ଆଉଟଡୋର ଗୃହଟି ଟିଣ ଛପର ଥିବା ବେଳେ ଛୋଟ ଘର ଯୋଗୁ ରୋଗୀ ଓ ଡାକ୍ତର ବସିବାରେ ସମସ୍ୟା ଉପୁଜୁଛି। ମେଡିକାଲ ପରିସରରେ ସାଧାରଣତଃ ମିଟିଂ ହଲଟିଏ ନାହିଁ। କୌଣସି ମିଟିଂ ହେଲେ ବ୍ଲକ କିମ୍ବା ଆଇସିଡିଏସ୍ ମିଟିଂ ହଲ୍କୁ ଯିବାକୁ ପଡୁଛି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭଲ ଓଟି ବି ନାହିଁ। ସେହିପରି ଷ୍ଟାଫ୍ମାନଙ୍କ କ୍ୱାର୍ଟର୍ସ ଜରାଜୀର୍ଣ୍ଣ ହୋଇପଡ଼ିରହିଛି। ଫଳରେ ଅଧିକାଂଶ ଷ୍ଟାଫ ନିଜ ନିଜ ଘରୁ ଯାତାୟାତ କରୁଥିବା ଦେଖାଯାଉଛି। ଏ ସମ୍ପର୍କରେ ଜଗତ୍ସିଂହପୁର ସିଡିଏମ୍ଓ ବିଜୟା ପଣ୍ଡାଙ୍କୁ ପଚାରିବାରେ, ବିରିଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ବିଭିନ୍ନ ଅସୁବିଧା ସମ୍ପର୍କରେ ଅବଗତ ଅଛି। ବାସ୍ତବରେ ଆବଶ୍ୟକ ସଂଖ୍ୟକ ସ୍ପୋଶାଲିଷ୍ଟ, ଡାକ୍ତର, ଷ୍ଟାଫ ନର୍ସ ନ ଥିବା ବେଳେ ମିଟିଂ ହଲ ନାହିଁ। ଆଉଟଡୋର ଘର ଟିଣ ହୋଇଥିବାରୁ ଡାକ୍ତର ଓ ରୋଗୀମାନେ ଅସୁବିଧା ଭୋଗୁଛନ୍ତି। ଏଗୁଡ଼ିକର ସମାଧାନ ପାଇଁ ସରକାରଙ୍କୁ ଚିଠି ଲେଖାଯାଇଛି। ଅନୁମତି ମିଳିଲେ ମେଡିକାଲରେ ସମସ୍ତ ସୁବିଧା ଯୋଗାଇ ଦିଆଯିବ ବୋଲି ସିଡିଏମ୍ଓ ପଣ୍ଡା କହିଛନ୍ତି।
