ନୂଆଦିଲ୍ଲୀ,୧୯।୬: କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ରାହୁଲ ଗାନ୍ଧୀ ବୁଧବାର ୪୯ ବର୍ଷରେ ପାଦ ଦେଇଛନ୍ତି। ସେ ୧୯୭୦ ଜୁନ୍ ୧୯ରେ ଦିଲ୍ଲୀରେ ଜନ୍ମଗ୍ରହଣ କରିଥିଲେ। ରାହୁଲଙ୍କ ବୟସ ବଢ଼ିବା ସହିତ କଂଗ୍ରେସର ସ୍ଥିତି ଧୀରେ ଧୀରେ ସଙ୍କଟ ଦେଇ ଗତି କରୁଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ୨୦୧୪ ଲୋକ ସଭା ନିର୍ବାଚନରେ କଂଗ୍ରେସ ୪୪ ଆସନରେ ସୀମିତ ରହିଥିବାବେଳେ ୨୦୧୯ରେ ଏହା ୫୨ ଆସନ ହାତେଇବାକୁ ସକ୍ଷମ ହୋଇଛି। ଗତ ଲୋକ ସଭା ନିର୍ବାଚନରେ ରାହୁଲଙ୍କ ଚୌକିଦାର ଚୋର୍ ହୈ ସ୍ଲୋଗାନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାଲାକୋଟ ଷ୍ଟ୍ରାଇକ୍ ଆଗରେ ଫିକା ପଡ଼ିଯାଇଥିଲା। ଫଳରେ କଂଗ୍ରେସ ଦଳ ୨୦୧୪ ତୁଳନାରେ ମାତ୍ର ୮ଟି ଆସନ ଅଧିକ ପାଇଥିଲା। ରାଜନୈତିକ ସମୀକ୍ଷକଙ୍କ ଅନୁସାରେ ରାହୁଲଙ୍କ ନିର୍ବାଚନ ପ୍ରଚାରରେ ପାରମ୍ପରିକ ଧାରାରେ ହେବାରୁ ଦଳର ସ୍ଥିତି ଏଭଳି ହେଲା। ଭାଜପା ଆମେରିକା ରାଷ୍ଟ୍ରପତି ନିର୍ବାଚନ ଭଳି ସୋସିଆଲ୍ ମିଡ଼ିଆକୁ ଅଧିକ ପ୍ରାଧାନ୍ୟ ଦେବାରୁ ଘରେ ଘରେ ବିକାଶର ବାର୍ତ୍ତା ପହଞ୍ଚିଥିଲା। ଫଳରେ ଦଳର ପ୍ରଦର୍ଶନ ଭଲ ରହିଥିଲା। ମୋଦି ଏବଂ ଶାହଙ୍କ ଭଳି ଅଭିଜ୍ଞ ରାଜନେତାଙ୍କ ସମ୍ମୁଖରେ ରାହୁଲଙ୍କ ପାରମ୍ପରିକ ପ୍ରଚାର କାମ ଦେଇ ନ ଥିବା କୁହାଯାଉଛି। ଅପର ପକ୍ଷରେ କଂଗ୍ରେସ ନେତା ଏକଜୁଟ ହୋଇ ପରବର୍ତ୍ତୀ ନିର୍ବାଚନରେ ଲଢ଼ିବାର ଆବଶ୍ୟକତା ରହିଛି। ତୃଣମୂଳସ୍ତରରେ ସଂଗଠନକୁ ସୁଦୃଢ଼ କରିବା ଉପରେ ରାହୁଲ ଏବେ ଗୁରୁତ୍ୱଦେବା ଆରମ୍ଭ କରିଛନ୍ତି। ୨୦୨୪ ଲୋକ ସଭା ନିର୍ବାଚନ ବେଳକୁ ରାହୁଲଙ୍କୁ ୫୪ ବର୍ଷ ହୋଇଥିବ। ଯଦି କଂଗ୍ରେସ ସେତେବେଳକୁ ଭଲ ପ୍ରଦର୍ଶନ କରିବ ତେବେ ହୁଏତ ରାହୁଲ ପ୍ରଧାନମନ୍ତ୍ରୀ ଭାବେ ଦେଶର ମଙ୍ଗ ଧରିବାକୁ ସକ୍ଷମ ହେବେ ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।
