ଯୋଡା/କେନ୍ଦୁଝର,୧୪।୬(ଡି.ଏନ.ଏ.)(ସ୍ବ.ପ୍ର)-କେନ୍ଦୁଝର ଜିଲା ଚମ୍ପୁଆ ରେଞ୍ଜ ଯୋଡ଼ା ଫରେଷ୍ଟ ସେକ୍ସନ ଅଧିନସ୍ଥ ବୈତରଣୀ ରିଜର୍ଭ ଫରେଷ୍ଟରେ ରବିବାର ଦୁଇଟି ହାତୀଙ୍କ ମୃତଦେହ ଠାବ କରାଯାଇଛି। ମୃତହାତୀଙ୍କ ମଧ୍ୟରେ ଗୋଟିଏ ମାଈ ଓ ଅନ୍ୟଟି ଦନ୍ତାହାତୀ ବୋଲି ଜଣାପଡିଛି। ଖବରପାଇ ଯୋଡା ବନପାଳ ପିଅନ ନାଏକଙ୍କ ସମେତ ବନକର୍ମଚାରୀ ଅପରାହ୍ନରେ ଘଟଣାସ୍ଥଳରେ ପହଞ୍ଚିଥିଲେ। ହାତୀ ମୃତ୍ୟୁର କାରଣ ଜଣାପଡ଼ି ନ ଥିବାବେଳେ ମୃତ ଦନ୍ତା ହାତୀର ଦାନ୍ତ କାଟି ନିଆଯାଇଛି। ସେହିପରି ମାଈ ହାତୀର ଶୁଣ୍ଢକୁ କାଟି ନିଆଯାଇଥିବା ବନପାଳ କହିଛନ୍ତି। ପ୍ରାଥମିକ ତଦନ୍ତରୁ ହାତୀଦ୍ୱୟଙ୍କୁ ହତ୍ୟା କରାଯାଇଥିବା ବନପାଳ ପିଅନ ସୂଚନା ଦେଇଛନ୍ତି। ସା ହୋଇଯାଇଥିବାରୁ ସୋମବାର ମୃତହାତୀଙ୍କ ବ୍ୟବଚ୍ଛେଦ କରାଯିବ ବୋଲି ଯୋଡା ବନପାଳ ପିଅନ ନାଏକ ସୂଚନା ଦେଇଛନ୍ତି। ଅନ୍ୟପଟେ କେନ୍ଦୁଝର ଏସଟିଏଫ ଅଶୋକ ସାମଲ, କେନ୍ଦୁଝର ଡିଏଫଓ ସନ୍ତୋଷ ଯୋଶୀ, ଚମ୍ପୁଆ ବନପାଳ କାଶିନାଥ ହେମ୍ବ୍ରମ ଅଧିକ ତଦନ୍ତ ପାଇଁ ଘଟଣାସ୍ଥଳ ଅଭିମୁଖେ ଯାଇଥିବା ଜଣାପଡ଼ିଛି।
