ପିଲାବେଳେ ବାପାଙ୍କୁ ଦୋକାନରେ ସହଯୋଗ କରୁଥିଲେ। ତାଙ୍କଠାରୁ ସ୍ବାଦିଷ୍ଟ ଜଳଖିଆ ତିଆରି କରିବା ଶିଖିଥିଲେ। ଟିକେ ବଡ଼ ହେବା ପରେ ନିଜେ ଏହି ବ୍ୟବସାୟ ଆରମ୍ଭ କଲେ। ସେତେବେଳେ ସେ ଏକା ଜଳଖିଆ ପ୍ରସ୍ତୁତ ସହ ବିକ୍ରି କରୁଥିଲେ। ଏବେ ତାଙ୍କୁ ସହଯୋଗ କରୁଛନ୍ତି ସ୍ତ୍ରୀ ଓ ପୁଅ। ସେଥିପାଇଁ ପୂର୍ବାପେକ୍ଷା ଭଲ ଚାଲୁଛି ତାଙ୍କ ଜଳଖିଆ ଦୋକାନ। ଗ୍ରାହକଙ୍କ ସଂଖ୍ୟା ବଢ଼ୁଥିଲେ ବି ଅଧିକ ଲାଭ ଆଶାରେ ସେ ଖାଦ୍ୟର ମାନ ବା ସ୍ବାଦରେ କୌଣସି ଫରକ ଆଣିନାହାନ୍ତି। କେବଳ ସକାଳ ବେଳା ଦୋକାନ ଖୋଲୁଥିବାରୁ ଗ୍ରାହକଙ୍କ ବେଶ୍ ଭିଡ଼ ଲାଗିଥାଏ ତାଙ୍କ ନିକଟରେ। ମାତ୍ର ୨ ଘଣ୍ଟା ମଧ୍ୟରେ ପ୍ରସ୍ତୁତ ଜଳଖିଆ ଶେଷ ହୋଇଯାଏ ଓ ତାଙ୍କ ବେପାର ବି ସାରିଯାଏ ବୋଲି କହିଛନ୍ତି ଅନୁଗୋଳ ବ୍ଲକ ବନ୍ତଳା ରେଞ୍ଜ ଅଫିସ ନିକଟରେ ଦୋକାନ ଦେଇଥିବା ଗିରିଆ ସାହୁ।
ଗିରିଆଙ୍କ ବୟସ ଏବେ ୫୨ ଛୁଇଁଲାଣି। ତାଙ୍କ ଶିକ୍ଷାଗତ ଯୋଗ୍ୟତା ମଧ୍ୟ ବେଶୀ ନୁହେଁ। ୮ ଭଉଣୀ ଭାଇଙ୍କ ମଧ୍ୟରୁ ସେ ୪ର୍ଥ। ବଡ଼ ପରିବାର ହୋଇଥିବାରୁ ବାପା ଅଧିକ ପଢ଼ାଇ ପାରି ନ ଥିଲେ। ତେଣୁ ପିଲାବେଳେ ବନ୍ତଳା ଛକରେ ଥିବା ବାପାଙ୍କ ଛୋଟ ଜଳଖିଆ ଦୋକାନରେ ସେ ବହୁ ସମୟ ବିତାଉଥିଲେ। ଛୋଟ ମୋଟ କାମ କରିବା ସହ ସେଠାରେ ବାପାଙ୍କ ଠାରୁ ଜଳଖିଆ ପ୍ରସ୍ତୁତି ଶିଖିଥିଲେ। ୧୫ ବର୍ଷ ବୟସରେ ସେ ନିଜେ ବନ୍ତଳା ଛକରେ ଏକ ଜଳଖିଆ ଦୋକାନ ଆରମ୍ଭ କରିଥିଲେ। ବ୍ୟବସାୟ କରିବାର ୫ ବର୍ଷ ପରେ ଖିଣ୍ଡା ଗ୍ରାମର ମଳେଇ ସାହୁଙ୍କ ଝିଅ କବିତାଙ୍କୁ ବିବାହ କରିଥିଲେ। ପରେ ରେଞ୍ଜ ଅଫିସ ନିକଟରେ ଜଳଖିଆ ଦୋକାନ ଦେଲେ। ଦୀର୍ଘ ୩୫ ବର୍ଷ ଧରି ସେ ଏହି ବ୍ୟବସାୟ ଚଳାଇଛନ୍ତି। ତାଙ୍କର ହାତ ତିଆରି ଇଟିଲି, ବରା ଓ ପରିବା ତରକାରୀ ଭାରି ସ୍ବାଦିଷ୍ଟ। ଏଥିସହିତ ପୁରୀ ଓ ଆଳୁଚପ ମଧ୍ୟ ତାଙ୍କ ପ୍ରସ୍ତୁତ ଜଳଖିଆ ମଧ୍ୟରେ ଥାଏ। ସକାଳେ ଦୁଇ ଘଣ୍ଟା ମଧ୍ୟରେ ଦୁଇଶହରୁ ଊଦ୍ଧର୍ବ ଗରାଖ ତାଙ୍କ ଦୋକାନରୁ ଜଳଖିଆ ଖାଇଥାନ୍ତି। ଏହି ବ୍ୟବସାୟ କରି ସେ ପକ୍କା ଘରଟିଏ କରିବା ସହିତ ବଡ଼ ଝିଅ ମଧୁସ୍ମିତା (୨୫)ଙ୍କୁ ପାଠ ପଢ଼ାଇ ଭଲ ଘରେ ବିବାହ ଦେଇପାରିଛନ୍ତି। ସାନ ପୁଅ ସତ୍ୟମ ମାଟ୍ରିକ ପାସ ପରେ ଏବେ ଜଳଖିଆ ଦୋକାନରେ ସାହାଯ୍ୟ କରୁଛନ୍ତି। ସ୍ବାଦିଷ୍ଟ ଜଳଖିଆ ପ୍ରସ୍ତୁତିରେ ତାଙ୍କ ସ୍ତ୍ରୀଙ୍କ ଅବଦାନ ମଧ୍ୟ କିଛି କମ୍ ନୁହେଁ। ରାତିରେ ବତୁରା ଯାଇଥିବା ବିରି ଓ ଚାଉଳକୁ ଶୀଳରେ ବାଟି ସ୍ତ୍ରୀ କବିତା ପିଠଉ ପ୍ରସ୍ତୁତ କରିଥାନ୍ତି। ଆଉ ଶୀଳରେ ବଟାଯାଉଥିବାରୁ ଅନ୍ୟମାନଙ୍କ ଅପେକ୍ଷା ତାଙ୍କ ଦୋକାନର ବରା, ଇଟିଲି ଗ୍ରାହକଙ୍କୁ ଆକୃଷ୍ଟ କରୁଥିବା ଗିରିଶ କହିଛନ୍ତି।
