ମୁମ୍ବାଇ,୨୯।୫: ଦେଶର ଅଗ୍ରଣୀ ଅନଲାଇନ ଟିକେଟ ବୁକିଂ ପ୍ଲାଟଫର୍ମ ବୁକ୍ ମାଇଁ ସୋ ତା’ର ୨୭୦ ନିୟମିତ କର୍ମଚାରୀଙ୍କୁ ଛଟେଇ କରିଛି। କରୋନା ମହାମାରୀ କାରଣରୁ ଦେଶରେ ଲକଡାଉନ ପର୍ଯ୍ୟାୟ ଜାରି ରହିଛି। ଯାହାର ପ୍ରଭାବ ଏହି ଅନଲାଇନ ସେବା ପ୍ରଦାନକାରୀ ସଂସ୍ଥା ଉପରେ ପଡିଛି । ସଂକ୍ରମଣର ଭୟାବହତା ଯୋଗୁ ସରକାର ବିଭିନ୍ ସଂସ୍ଥା ପାଇଁ ନାନା କଟକଣା ଜାରି କରିଛନ୍ତି। ସରକାରଙ୍କ ଉକ୍ତ କଟକଣା ଫଳରେ ଦେଶରେ ସବୁ କିଛି ବନ୍ଦ ରହିଛି । ଫଳରେ ବିଭିନ୍ନ ସେବା ପାଇଁ ଅନଲାଇନ ମାଧ୍ୟମରେ ଗ୍ରାହକମାନେ ନିଜ ନିଜର ଆବଶ୍ୟକତା ଅନୁସାରେ ଆଉ ଟିକେଟ ବୁକ୍ କରୁନାହାନ୍ତି । ଅତ୍ୟାଧୁନିକ ଅନଲାଇନ ଟିକେଟ ବୁକିଂ ଆପ ବୁକ୍ ମାଇଁ ସୋ’ରେ ଅଗ୍ରୀମ ବୁକିଂ କରିଥାନ୍ତି । ଗତ ୩ମାସ ରୁ ଉର୍ଦ୍ଧ ସମୟ ହେବ ଦେଶର ସବୁ କିଛି ବନ୍ଦ ରହିଛି ବୋଲି କମ୍ପାନୀର ସିଇଓ ଆଶିଷ ପେମରଜନୀ ସୂଚନା ଦେଇଛନ୍ତି । ସେ କହିଛନ୍ତି ଯେ, କମ୍ପାନୀର ଆର୍ଥିକ ମାନ୍ଦାବସ୍ଥା ଓ ରାଜସ୍ବ କ୍ଷତି କାରଣରୁ ସଂସ୍ଥାର ଭାରତ ବଜାର ଓ ଗ୍ଲୋବାଲ ମାର୍କେଟର ମୋଟ ୧୪୫୦ଜଣ ରୁ ୨୭୦ଜଣ କର୍ମଚାରୀଙ୍କୁ ସଂସ୍ଥା ଛଟେଇ କରିଛି । ମହାମାରୀ କାରଣରୁ କମ୍ପାନୀର ବାଣିଜି୍ୟକ କାରବାର ଏକ ପ୍ରକାରର ବନ୍ଦ ହୋଇ ଯାଇଛି । ଫଳରେ ସଂସ୍ଥାର ସମସ୍ତ କର୍ମଚାରୀଙ୍କୁ ମେଲ ଓ ଟ୍ୟୁଟି ଜରିଆରେ ଅବଗତ କରାଇ ଦିଆଯାଇଛି ଯେ ଆସନ୍ତା ୬ମାସ ପର୍ଯ୍ୟନ୍ତ ବିଭିନ୍ନ ବର୍ଗର କର୍ମଚାରୀଙ୍କର ମୂଳ ବେତନରୁ ୧୦ରୁ ୫୦ ପ୍ରତିଶତ ବେତନ ହ୍ରାସ କରାଯିବ । ଏହି ମହାମାରୀ ଯୋଗୁ ବହୁ ଅନଲାଇନ ସେବା ପ୍ରଦାନକାରୀ ସଂସ୍ଥା ଯେପରି ଓଲା, ଉବର, ସ୍ବିଗି, ଜମାଟୋ ଭଳି କମ୍ପାନୀ ମଧ୍ୟ ସେମାନଙ୍କର ୫ରୁ ୨୫% କର୍ମଚାରୀଙ୍କୁ ଛଟେଇ କରିଛନ୍ତି।
