ଖଣ୍ଡପଡ଼ା,୧୬ା୪(ସ୍ବ.ପ୍ର.): ଖଣ୍ଡପଡ଼ା ଥାନା ଅଧୀନ ଗଡ଼ିଆସାହି ପଞ୍ଚାୟତର ପଥରଖଣ୍ଡ ଗାଁରେ ଗତ ୧୨ତାରିଖ ରାତିରେ ନିର୍ବାଚନ ପରବର୍ତ୍ତୀ ହିଂସା ଘଟିଥିଲା। ଏହି ଘଟଣାରେ ପୋଲିସ ଉଭୟ ପକ୍ଷର ଏତଲାକ୍ରମେ ୨୧ ଜଣଙ୍କ ନାମରେ ମାମଲା ରୁଜୁ କରିଛି। ତନ୍ମଧ୍ୟରୁ ଘଟଣାରେ ଲିପ୍ତ ସୁଦର୍ଶନ ନାୟକ ଓରଫ ସୁନ୍ଦରଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିବା ଆଇଆଇସି ବିଶ୍ୱଜିତ୍ ରାଉତରାୟ କହିଛନ୍ତି। ପଞ୍ଚାୟତ ନିର୍ବାଚନ ସମୟରେ ୨ଗୋଷ୍ଠୀ ମୁହାଁମୁହିଁ ହୋଇଥିଲେ। ପୂର୍ବ ଶତ୍ରୁତାକୁ କେନ୍ଦ୍ରକରି ପୂର୍ବତନ ସରପଞ୍ଚ ଦେବରାଜ ସାହୁ ଓ ପୁଅ ସୁଶାନ୍ତଙ୍କୁ ଘରେ ପଶି କେତେଜଣ ବ୍ୟକ୍ତି ଆକ୍ରମଣ କରିଥିବା ନେଇ ଥାନାରେ ଅଭିଯୋଗ ହୋଇଥିଲା। ଏଥିରେ ସ୍ଥାନୀୟ ଅଞ୍ଚଳର ଟିକିନା ନାୟକ, ସୁଦର୍ଶନ ନାୟକ, ଗତଥରର ସରପଞ୍ଚ ବିପିନ ସାମଲ, ସ୍ତ୍ରୀ ପ୍ରବୀଣା, ପୁଅ ଚିନ୍ମୟ, ସିପନ, ବାବୁଲା ବେହେରା, ସୁଶାନ୍ତ ବେହେରା, ଗଙ୍ଗା ନାୟକ, ସନ୍ତୋଷ ବରାଡ଼ଙ୍କ ନାମରେ ମାମଲା ରୁଜୁ ହୋଇଛି। ଅପରପକ୍ଷେ ୨ୟ ଗୋଷ୍ଠୀର ସନ୍ତୋଷ ନାୟକଙ୍କ ଅଭିଯୋଗକ୍ରମେ ପ୍ରକାଶ ସାହୁ, ତାଙ୍କ ବାପା ଦେବରାଜ, ନବଘନ ସାହୁ, ଶିଶିର ସାହୁ, ଖଣ୍ଡପଡ଼ା ବ୍ଲକ ଯୁବ ବିଜେଡି ସଭାପତି ମନୋରଞ୍ଜନ ବେହେରା, ଲକ୍ଷ୍ମୀଧର ସାହୁ ଓ ଲଡୁକିଶୋର ସାହୁ ପ୍ରମୁଖ ୧୧ଜଣଙ୍କ ନାମରେ ପୋଲିସ ମାମଲା ରୁଜୁ କରଥିବା ଜଣାପଡ଼ିଛି।
