ବିଶୋଇ, ୬।୬(ଡି.ଏନ.ଏ): ମୟୁରଭଞ୍ଜ ଜିଲା ବିଶୋଇ ସ୍ଥିତ ୪୯ ନଂ ଜାତୀୟ ରାଜପଥ ନିକଟରେ ଗୁରୁବାର ଏକ ଟ୍ରକ ଭାରସାମ୍ୟ ହରାଇ ୨୦ ଫୁଟ ପୋଲ ତଳକୁ ଖସିପଡିଛି। ଉକ୍ତ ଟ୍ରକର ଡ୍ରାଇଭର ଓ ହେଲପର ଫେରାର ଥିବାବେଳେ ସେହି ଗାଡ଼ିରେ ଥିବା ଅନ୍ୟ ଏକ ଟ୍ରକର ଡ୍ରାଇଭର ଓ ହେଲପର ଆହତ ହୋଇଛନ୍ତି। ଆହତ ୨ଜଣ ହେଲେ ପଶ୍ଚିମବଙ୍ଗର ଛୋଟୁ ଯାଦବ(୨୨) ଓ ସରୋଜ ରୟ(୨୮)। ସୂଚନାଯୋଗ୍ୟ, ସକାଳ ପ୍ରାୟ ୫ଟାରେ ଏକ ପ୍ଲାଷ୍ଟିକ ଦାନା ବଝେଇ ଟ୍ରକ କୋଲକାତାରୁ ପୁନେ ଅଭିମୁଖେ ଯାଉଥିବା ସମୟରେ ଭାରସାମ୍ୟ ହରାଇ ବିଶୋଇଠାରେ ଥିବା ଏକ ଗ୍ରୀଡ଼ ୱାଲ ବିହୀନ ଭଗ୍ନ ପୋଲର ପ୍ରାୟ ୨୦ ଫୁଟ ତଳକୁ ଖସି ପଡ଼ିଥିଲା। ଏହା ଦେଖି ସ୍ଥାନୀୟ ଲୋକେ ଗାଡି ମଧ୍ୟରେ ଥିବା ଛୋଟୁ ଓ ସରୋଜଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବିଶୋଇ ପ୍ରାଥମିକ ଚିକିତ୍ସାଳୟ ପରେ ବାରିପଦା ପିଆରଏମ ମେଡିକାଲକୁ ସ୍ଥାନାନ୍ତରିତ କରିଥିଲେ। ଏହି ୨ ଜଣ ଆହତ ପୂର୍ବରୁ କାଞ୍ଜିପାଣି ଘାଟିରେ ସେମାନଙ୍କର ନିଜ ଟ୍ରକ ଖରାପ ହୋଇଯାଇଥିଲା। ଟ୍ରକର ମରାମତି ପାଇଁ ଏହି ଦୁର୍ଘଟଣାଗ୍ରସ୍ତ ଟ୍ରକରେ ଛୋଟୁ ଓ ସରୋଜ ଯାଉଥିଲେ ବୋଲି ଜଣାପଡ଼ିଛି। ।
