ନୂଆଦିଲ୍ଲୀ,୮-୨: ୨୦୨୩ ସେପ୍ଟେମ୍ବର ସୁଦ୍ଧା ତାଳଚେର ଫର୍ଟିଲାଇଜର୍ସ ଲିମିଟେଡ(ଟିଏଫ୍ଏଲ୍) କାର୍ଯ୍ୟକ୍ଷମ ହେବ। କେନ୍ଦ୍ର ସାର ଓ ରସାୟନ ମନ୍ତ୍ରୀ ଡି.ଭି.ସଦାନନ୍ଦ ଗୌଡା ଶୁକ୍ରବାର ରାଜ୍ୟ ସଭାରେ ଏହି ସୂଚନା ଦେଇଛନ୍ତି। ଏ ସଂକ୍ରାନ୍ତ ଏକ ପ୍ରଶ୍ନର ଉତ୍ତରରେ ଗୌଡା କହିଛନ୍ତି ଯେ, ବନ୍ଦ ହୋଇ ପଡିଥିବା ଭାରତୀୟ ସାର ନିଗମ ଲିମିଟେଡ(ଏଫ୍ସିଆଇଏଲ୍ )ର ତାଳଚେର ୟୁନିଟକୁ କାର୍ଯ୍ୟକ୍ଷମ କରାଇବା ଲାଗି ଭାରତ ସରକାର ଏକାଧିକ ପ୍ରସ୍ତାବକୁ କ୍ୟାବିନେଟ ଜରିଆରେ ମଞ୍ଜୁରୀ ଦେଇଛନ୍ତି। ଏହି ୟୁରିଆ ୟୁନିଟକୁ ପୁନଃ କାର୍ଯ୍ୟକ୍ଷମ କରାଇବା ଦିଗରେ ସରକାର ପଦକ୍ଷେପ ଗ୍ରହଣ କରିଛନ୍ତି। ମେସର୍ସ ପିଡିଆଇଏଲ୍କୁ ସାର କାରଖାନା କାର୍ଯ୍ୟକାରୀ କରିବା ଲାଗି ପରିଚାଳନା ପରାମର୍ଶଦାତା ଭାବେ ନିଯୁକ୍ତି ଦିଆଯାଇଛି। ୨୦୧୭ରେ ପେଟ୍ କୋକ୍ ଯୋଗାଣ ଲାଗି ଇଣ୍ଡିଆନ ଅଏଲ ସହ ବୁଝାମଣାପତ୍ର ସ୍ବାକ୍ଷରିତ ହୋଇଛି। ୨୦୧୮ରେ ଏହି ପ୍ରକଳ୍ପ ପରିବେଶ ମଞ୍ଜୁରୀ ଲାଭ କରିଥିବା ସେ ସ୍ପଷ୍ଟ କରିଛନ୍ତି।
ସୂଚନା ଯୋଗ୍ୟ, ୨୦୧୮ ସେପ୍ଟେମ୍ବରରେ ଆର୍ଥତ୍କ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟି ଆର୍ସିଏଫ୍ ଇକ୍ୱିଟି ଯୋଗଦାନ ଲାଗି ମଞ୍ଜୁରୀ ଦେଇଥିଲା। ସେହିଭଳି ୨୦୧୮ ଡିସେମ୍ବରରେ କ୍ୟାପ୍ଟିଭ କୋଇଲା ଖଣି ଲାଗି ଖଣି ଆବଣ୍ଟନ ଚୁକ୍ତି ସ୍ବାକ୍ଷରିତ ହୋଇଛି। ପ୍ରମୋଟରଙ୍କଠାରୁ ଅନୁମୋଦନ ଲାଭ କରିବା ପରେ ଟିଏଫ୍ଏଲ୍ ବୋର୍ଡ ପକ୍ଷରୁ ପ୍ରକଳ୍ପ ଲାଗି ନିବେଶ ମଞ୍ଜୁରୀ ଦିଆଯାଇଥିଲା। କୋଇଲା ବାଷ୍ପୀକରଣ ଏବଂ ଆମୋନିଆ, ୟୁରିଆ ପ୍ଲାଣ୍ଟ ପାଇଁ ଏଲ୍ଏସ୍ଟିକେ ଚୁକ୍ତି ଗତ ବର୍ଷ ସେପ୍ଟେମ୍ବରରେ ସ୍ବାକ୍ଷିତ ହୋଇଛି। ଓଡିଶା ସରକାରଙ୍କ ରାଜ୍ୟ ସ୍ତରୀୟ କ୍ଲିୟରାନ୍ସ କର୍ତ୍ତୃପକ୍ଷଙ୍କ ଦ୍ୱାରା ଗତ ବର୍ଷ ୩୧ ଅଗଷ୍ଟରେ ବିଏଫ୍ଏଲ୍ ପ୍ରକଳ୍ପକୁ ମଞ୍ଚୁରୀ ମିଳି ସାରିଥିବା ସେ ମତ ପ୍ରକାଶ କରିଛନ୍ତି।
