କଲମ୍ବୋ, ୧୮ା୬ (ପି.ଟି.)- ବିଶ୍ୱକପ୍ ୨୦୧୧ ଫାଇନାଲ ତାଙ୍କ ଦେଶ ଭାରତକୁ ବିକ୍ରି କରିଥିବା ଅଭିଯୋଗ କରିଛନ୍ତି ଶ୍ରୀଲଙ୍କାର ପୂର୍ବତନ କ୍ରୀଡ଼ା ମନ୍ତ୍ରୀ ମହିନ୍ଦାନନ୍ଦ ଅଲୁଥ୍ଗାମେଜ। ତେବେ ପୂର୍ବତନ ଅଧିନାୟକ କୁମାର ସଙ୍ଗକାରା ଓ ମାହେଲା ଜୟବର୍ଦ୍ଧନେ ତାଙ୍କଠାରୁ ଉପଯୁକ୍ତ ପ୍ରମାଣ ଦାବି କରିଛନ୍ତି। ଏକ ଟିଭି ଚ୍ୟାନେଲକୁ ସାକ୍ଷାତ୍କାର ଦେଇ ଅଲୁଥ୍ଗାମେଜ କହିଛନ୍ତି, ଫାଇନାଲ ଫିକ୍ସ ହୋଇଯାଇଥିଲା। ଫାଇନାଲ ମ୍ୟାଚରେ ଶ୍ରୀଲଙ୍କା ୨୭୫ରନ ବିଜୟ ଲକ୍ଷ୍ୟ ଧାର୍ଯ୍ୟ କରିଥିଲା। ଗୌତମ ଗମ୍ଭୀର(୯୭) ଓ ତତ୍କାଳୀନ ଅଧିନାୟକ ମହେନ୍ଦ୍ର ସିଂ ଧୋନୀ (୯୧)ଙ୍କ ଚମତ୍କାର ବ୍ୟାଟିଂ ଯୋଗୁ ଭାରତ ବିଜୟ ସହ ଟ୍ରଫି ହାସଲ କରିନେଇଥିଲା। ମୁଁ ସେତେବେଳେ କ୍ରୀଡ଼ାମନ୍ତ୍ରୀ ଥିଲି। ଦେଶର ସମ୍ମାନ ଦୃଷ୍ଟିରୁ ଏହା ପ୍ରକାଶ କରିବାକୁ ଚାହିଁ ନ ଥିଲି। କିନ୍ତୁ ଆମେ ଏହି ମ୍ୟାଚରେ ବିଜୟ ଲାଭ କରିପାରିଥାନ୍ତୁ ବୋଲି ରାଜନେତା ଜଣକ କହିଛନ୍ତି। ଅଲୁଥ୍ଗାମେଜ ବର୍ତ୍ତମାନର କାମଚଳା ସରକାରରେ ଶକ୍ତି ରାଷ୍ଟ୍ରମନ୍ତ୍ରୀ ଅଛନ୍ତି। ଆସନ୍ତା ଅଗଷ୍ଟ ୫ରେ ହେବାକୁଥିବା ନିର୍ବାଚନ ପର୍ଯ୍ୟନ୍ତ ସେ ଏହି ଦାୟିତ୍ୱରେ ରହିବେ। ଅଲୁଥ୍ଗାମେଜ କହିଛନ୍ତି ମୁଁ ଜାଣେ ଲୋକମାନେ ସେତେବେଳେ ଏ ବିଷୟରେ ଚିନ୍ତା କରିଥିବେ। ଏହି ପ୍ରସଙ୍ଗରେ ଯଦି କୌଣସି ବିତର୍କ ହୁଏ ସେଥିରେ ମୁଁ ଭାଗ ନେବାଲାଗି ପ୍ରସ୍ତୁତ ଅଛି। ଅନ୍ୟପକ୍ଷରେ ସେ ସମୟରେ ଶ୍ରୀଲଙ୍କା ଅଧିନାୟକ ଥିବା ସଙ୍ଗକାରା ମନ୍ତ୍ରୀଙ୍କୁ ଦୁର୍ନୀତି ନିବାରଣ ତଦନ୍ତ ପାଇଁ ଆବଶ୍ୟକ ପ୍ରାମାଣିକ ତଥ୍ୟ ଦାଖଲ କରିବା ଲାଗି କହିଛନ୍ତି। ଜୟବର୍ଦ୍ଧନେ ମଧ୍ୟ ଜଣେ ପୂର୍ବତନ ଅଧିନାୟକ। ସେ ଏହି ମ୍ୟାଚ୍ରେ ଏକ ଶତକ ହାସଲ କରିଥିଲେ। ମନ୍ତ୍ରୀଙ୍କ ଅଭିଯୋଗକୁ ନେଇ ସେ ଉପହାସ କରିଛନ୍ତି। ଆଗକୁ ନିର୍ବାଚନ ହେବାକୁ ଥିବାରୁ ଅଲୁଥ୍ଗାମେଜ ଏଭଳି ବୟାନବାଜି କରୁଛନ୍ତି। ଯଦି ସେ ଫିକ୍ସିଂ କଥା କହିଛନ୍ତି ତେବେ ଏହାର ପ୍ରମାଣ ଦିଅନ୍ତୁ ଏବଂ ଏଥିରେ ସମ୍ପୃକ୍ତ ଥିବା ବ୍ୟକ୍ତିଙ୍କ ନାମ ପ୍ରକାଶ କରନ୍ତୁ। ଗେମ୍ରେ ଫିକ୍ସିଂ ହୋଇଥିବା ଅଲୁଥ୍ଗାମେଜ୍୍ ଏହା ପୂର୍ବରୁ ମଧ୍ୟ ଥରେ କହିଥିଲେ। ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଏହି ମ୍ୟାଚ ଖେଳାଯାଇଥିଲା। ଏଥିପାଇଁ ଅଲୁଥଗାମେଜ ଓ ତତ୍କାଳୀନ ରାଷ୍ଟ୍ରପତି ମହିନ୍ଦା ରାଜପାକ୍ସାଙ୍କୁ ଆମନ୍ତ୍ରଣ କରାଯାଇଥିଲା। ୨୦୧୧ ବିଶ୍ୱକପ୍ ଫାଇନାଲରେ ମ୍ୟାଚ ଫିକ୍ସିଂ ହୋଇଥିବା ଯେଉଁ ଅଭିଯୋଗ ହୋଇଛି ତାହାର ଏକ ତଦନ୍ତ କରାଯିବା ଲାଗି ପୂର୍ବତନ ବିଶ୍ୱକପ୍ ବିଜୟୀ ଅଧିନାୟକ ଅର୍ଜୁନ ରଣତୁଙ୍ଗା ଦାବି କରିଥିଲେ।
