ମୁମ୍ବାଇ, ୧୨।୯(ପି.ଟି.)- ୨୦୨୦ ସେପ୍ଟେମ୍ବର ୨୧ରୁ ଅକ୍ଟୋବର ୪ ପର୍ଯ୍ୟନ୍ତ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ଅନୁଷ୍ଠିତ ହେବ। ଏଥିପାଇଁ ବିଶ୍ୱରେ ଫୁଟବଲ ପରିଚାଳନାର ସର୍ବୋଚ୍ଚ ସଂସ୍ଥା ଫିଫା ପକ୍ଷରୁ ଭୁବନେଶ୍ୱର ସମେତ ମୋଟ ୫ଟି ସହରକୁ ଅନୁଧ୍ୟାନ କରାଯାଇଛି। ଟୁର୍ନାମେଣ୍ଟ ଆୟୋଜନ ଦୌଡ଼ରେ ଥିବା ଅନ୍ୟ ସହର ଗୁଡ଼ିକ ହେଲା କୋଲକାତା, ଅହମ୍ମାଦାବାଦ, ଗୋଆ ଓ ନଭି ମୁମ୍ବାଇ। ୨୦୨୦ରେ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ଭାରତରେ ଆୟୋଜନ ହେବ ବୋଲି ଗତ ମାର୍ଚ୍ଚରେ ଫିଫା ସଭାପତି ଜିଆନି ଇନ୍ଫାଣ୍ଟିନୋ ଘୋଷଣା କରିଥିଲେ।
ବର୍ତ୍ତମାନ ସୁଦ୍ଧା ଆମେ ୫ଟି ସହରର ଭିତ୍ତିଭୂମିକୁ ଅନୁଧ୍ୟାନ କରିଛୁ। ଅନ୍ୟ କେତେକ ସହର ମଧ୍ୟ ଏହି ସମ୍ମାନଜନକ ପ୍ରତିଯୋଗିତା ଆୟୋଜନ ପାଇଁ ଆଗ୍ରହ ପ୍ରକାଶ କରିଛନ୍ତି ବୋଲି ଟୁର୍ନାମେଣ୍ଟ ନିର୍ଦ୍ଦେଶକ ରୋମା ଖାନ୍ନା ପ୍ରକାଶ କରିଛନ୍ତି। ”ଗତ ମାସରେ ଆମେ ଭୁବନେଶ୍ୱରର ଭିତ୍ତିଭୂମି ଅନୁଧ୍ୟାନ କରି ବିଶ୍ୱକପ ପାଇଁ ପ୍ରାରମ୍ଭିକ ପର୍ଯ୍ୟାୟରେ ଅନୁମତି ପ୍ରଦାନ କରିଛୁ। ଆଉ ତିନୋଟି ଭେନ୍ୟୁକୁ ଆମେ ଆସନ୍ତା ମାସରେ ବାଛିବୁ। ଆସନ୍ତା କିଛିମାସ ମଧ୍ୟରେ ଏହି ବିଶ୍ୱସ୍ତରୀୟ ଟୁର୍ନାମେଣ୍ଟ ଆୟୋଜନ ଚିତ୍ର ସ୍ପଷ୍ଟ ହୋଇଯିବ“ ବୋଲି ରୋମା କହିଛନ୍ତି। ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପର ସ୍ଥାନୀୟ ଆୟୋଜକ କମିଟି ଟୁର୍ନାମେଣ୍ଟ ଆୟୋଜନ ପାଇଁ ଘରୋଇ ସହର ଗୁଡ଼ିକୁ ପ୍ରାରମ୍ଭିକ ଚୟନ କରିବାପରେ ଫିଫା ତାହାକୁ ଅନୁଧ୍ୟାନ କରିବ ବୋଲି ସେ କହିଛନ୍ତି। ” ଆମେ ଏପର୍ଯ୍ୟନ୍ତ ଭେନ୍ୟୁ ପାଇଁ ସହର ଗୁଡ଼ିକ ସମ୍ପର୍କରେ ସ୍ପଷ୍ଟ ହୋଇ ପାରିନାହୁଁ। ଭୁବନେଶ୍ୱରରେ ଟୁର୍ନାମେଣ୍ଟ ଆୟୋଜନ ପାଇଁ କ’ଣ କରିବାକୁ ହେବ ସେ ସମ୍ପର୍କରେ ଆଲୋଚନା କରି ସାରିଛୁ। ନିର୍ଦ୍ଧିଷ୍ଟ ସମୟସୀମା ମଧ୍ୟରେ କାର୍ଯ୍ୟ ସମ୍ପନ୍ନ ହୋଇପାରିଲେ ଆମେ ଭୁବନେଶ୍ୱରକୁ ଭେନ୍ୟୁଭାବେ ସ୍ପଷ୍ଟ କରିବୁ। ସେହିପରି ଆମେ ଏବେ ଅନ୍ୟ ସହର ଗୁଡ଼ିକୁ ଯାଇ ସେଠାକାର ଭିତ୍ତିଭୂମି ଦେଖିବୁ ଏବଂ ସନ୍ତୋଷ ଜନକ ମନେ ହେଲେ ପ୍ରାରମ୍ଭିକ ପର୍ଯ୍ୟାୟରେ ଅନୁମତି ଦେବୁ। ଏହାପରେ ଆମେ ଫିଫାକୁ ସବୁକିଛି ଜଣାଇବୁ ବୋଲି ସେ ପ୍ରକାଶ କରିଛନ୍ତି। ଚଳିତ ବର୍ଷ ଶେଷ ଭାଗରେ ଆୟୋଜନ ଦୌଡ଼ରେ ଥିବା ସହର ଗୁଡ଼ିକର ଭିତ୍ତିଭୂମିକୁ ଫିଫା ପକ୍ଷରୁ ଆଉଥରେ ଅନୁଧ୍ୟାନ କରାଯିବ। ଆୟୋଜକ ଦେଶଭାବେ ଭାରତ ଏହି ସମ୍ମାନଜନକ ଟୁର୍ନାମେଣ୍ଟ ଖେଳିବା ପାଇଁ ସିଧାସଳଖ ଏଣ୍ଟ୍ରି ପାଇଛି।
