ନୂଆଦିଲ୍ଲୀ, ୧୨ା୯ (ପି.ଟି.): ରାଜ୍ୟ ସଭା ସଦସ୍ୟମାନେ ବେଳେବେଳେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା ନ କରି ସିଧା ପାର୍ଲାମେଣ୍ଟକୁ ଯାଇଥାନ୍ତି। ଏମିତିକି ରାଜନୈତିକ ସ୍ବାର୍ଥସାଧନ ଲାଗି ଏହି ଆସନ ବିକ୍ରି ମଧ୍ୟ କରାଯାଉଥିବା ଅଭିଯୋଗ ହୋଇଛି। ପାର୍ଲାମେଣ୍ଟକୁ ଆସିବା ପରେ ଏହି ସଦସ୍ୟଙ୍କ ପକେଟ୍ ଗରମ ହେଇଯାଉଛି। ଏନେଇ ନ୍ୟାଶନାଲ ଇଲେକ୍ସନ ଓ୍ବାଚ୍ଡଗ୍ ‘ଏଡିଆର୍’( ଆସୋସିଏଶନ୍ ଫର୍ ଡେମୋକ୍ରାଟିକ୍ ରିଫର୍ମ) ୨୧୩ ରାଜ୍ୟ ସଭା ସଦସ୍ୟଙ୍କ ଆୟ ସମ୍ପର୍କରେ ତଥ୍ୟ ପ୍ରଦାନ କରିଛି। ଏଡିଆର୍ ରିପୋର୍ଟରେ ଦର୍ଶାଯାଇଛି ଯେ, ୪୧.୮% ଅର୍ଥାତ୍ ୮୯ ସଦସ୍ୟଙ୍କ ଘୋଷଣା ଅନୁଯାୟୀ ପାରିଶ୍ରମିକ ଭିତ୍ତିରେ ନିର୍ଦ୍ଦେଶକ, ନିୟମିତ ପାରିଶ୍ରମିକ ଗତିବିଧି, ନିୟନ୍ତ୍ରଣକାରୀ ଅଂଶୀଦାର, ପ୍ରଦତ୍ତ ପରାମର୍ଶ ଦେବା କିମ୍ବା ପେସାଦାର ନିଯୁକ୍ତି ନେଇ ସେମାନଙ୍କ ଆର୍ଥତ୍କ ସ୍ବାର୍ଥ ଜଡ଼ିତ ଥାଏ। ତେବେ ୧୨୪ (୫୨.୨%) ଏମ୍ପି ଏଭଳି କୌଣସି ତଥ୍ୟ ଦେଇ ନ ଥିବା ରିପୋର୍ଟରେ ଦର୍ଶାଯାଇଛି। ୨୪ ଏମ୍ପି (୧୧.୩%) ଏମ୍ପି କମ୍ପାନୀର ପାରିଶ୍ରମିକ ନିର୍ଦ୍ଦେଶକ ହୋଇ ଆର୍ଥିକ ସ୍ବାର୍ଥ ସହ ଜଡ଼ିତ ଥିବା ଦର୍ଶାଇଛନ୍ତି। କର୍ନାଟକର ଜେଡିଏସ୍ ଏମ୍ପି ଡି. କୁପେନ୍ଦ୍ର ରେଡ୍ଡୀ ପାରିଶ୍ରମିକ ନିର୍ଦ୍ଦେଶକ ଭାବେ ସର୍ବାଧିକ ଅର୍ଥ (ବାର୍ଷିକ ୪୦.୬୮ କୋଟି ଟଙ୍କା) ପାଉଥିବା ଘୋଷଣା କରିଛନ୍ତି। ତାଙ୍କ ପଛକୁ ଅଛନ୍ତି, ଭାଜପାର ରାଜୀବ ଚନ୍ଦ୍ରଶେଖର (୭.୦୩ କୋଟି) ଓ କେରଳର ଅବ୍ଦୁଲ ଓ୍ବାହାବ୍ (୩.୩୪ କୋଟି)।
୩୦ ଏମ୍ପି(୧୪.୧%) ନିୟମିତ ପାରିଶ୍ରମିକ ଗତିବିଧିରେ ଆର୍ଥିକ ସ୍ବାର୍ଥ ଜଡ଼ିତ ଥିବା ପ୍ରକାଶ କରିଛନ୍ତି। ଏଭଳି ଅର୍ଥ ଉତ୍ସରେ ଭାଜପାର ଝାଡ଼ଖଣ୍ଡ ଏମ୍ପି ମହେଶ ପୋଦ୍ଦାର (ବାର୍ଷିକ ୩.୧୧ କୋଟି) ସର୍ବାଗ୍ରେ ରହିଛନ୍ତି। ତାଙ୍କ ପଛକୁ ରହିଛନ୍ତି ମାରୀ କମ୍(୨.୫୦ କୋଟି), ସ୍ବପନ୍ ଦାସଗୁପ୍ତା(୬୬.୬୦ ଲକ୍ଷ ଟଙ୍କା)। ସେହିଭଳି ୪୪ ଏମ୍ପି(୨୦.୭%) ନିୟନ୍ତ୍ରଣକାରୀ ଅଂଶୀଦାର ସେମାନଙ୍କର ଆର୍ଥିକ ସ୍ବାର୍ଥ ଜଡ଼ିତ। ଏ କ୍ଷେତ୍ରରେ ସର୍ବାଧିକ କମ୍ପାନୀ ଶେୟାରହୋଲ୍ଡିଂ ରେକର୍ଡ ରହିଛି ବିହାରର ଭାଜପା ଏମ୍୍ପି ରବୀନ୍ଦ୍ର କିଶୋର ସିହ୍ନା(୭୪୭ କୋଟି)ଙ୍କ ନାମରେ। ତାଙ୍କ ପଛରେ କଂଗ୍ରେସ ସଭ୍ୟ ଅଭିଷେକ ମନୁ ସିଙ୍ଗ୍ଭି(୩୮୬ କୋଟି) ଓ ସ୍ବାଧୀନ ଏମ୍ପି ସଞ୍ଜୟ ଦତ୍ତାତ୍ରେୟ(୨୬୨ କୋଟି)। ମାତ୍ର ୨ (୦.୯%)ଏମ୍ପି ପ୍ରଦତ୍ତ ପରାମର୍ଶ ଦେବାଭଳି ନିଯୁକ୍ତିରେ ଅର୍ଥ କମାଉଥିବା ଦର୍ଶାଇଛନ୍ତି। ଏହି ଶ୍ରେଣୀରେ ଭାଜପା ମନୋନୀତ ଏମ୍ପି କେ.ଟି.ଏସ୍. ତୁଲସୀ (୨୭.୫୦ କୋଟି), ବିକାଶ ହରିଭାଉ ମହାତ୍ମେ(୫.୬୦ ଲକ୍ଷ) ରହିଛନ୍ତି। ଅନ୍ୟପକ୍ଷରେ ୪୦(୧୮.୮%) ଏମ୍ପି ପେସାଦାର ନିଯୁକ୍ତି ମାଧ୍ୟମରେ ଆୟ ବୃଦ୍ଧି କରିଥିବା କହିଛନ୍ତି। ଏହି ଶ୍ରେଣୀରେ ଅଛନ୍ତି, କଂଗ୍ରେସର ଅଭିଶେକ୍ ମନୁ ସିଙ୍ଗ୍ଭି(୧୭୭ କୋଟି), ପି. ଚିଦାମ୍ବରମ୍ ଓ କେ.ଟି.ଏସ୍. ତୁଲ୍ସୀ। ଆଶ୍ଚର୍ଯ୍ୟଜନକଭାବେ ୧୦୪ ଏମ୍ପି କୋଟିପତି ହୋଇଥିଲେ ହେଁ ସେମାନଙ୍କ ଆର୍ଥିକ ସ୍ବାର୍ଥ ସମ୍ପର୍କରେ କିଛି ଦର୍ଶାଇ ନ ଥିବା ଜଣାପଡ଼ିଛି। ଏମାନେ ହେଲେ କଂଗ୍ରେସର ଟି. ସୁବାରାମି ରେଡ୍ଡୀ (୪୨୨.୪୪ କୋଟିର ସମ୍ପତ୍ତିି), ଟିଡିପି ଏମ୍ପି ସି.ଏମ୍. ରମେଶ (୨୫୮.୨୦ କୋଟିର ସମ୍ପତ୍ତିି), ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟ୍ଲୀ(୧୧୧.୪୨ କୋଟିର ସମ୍ପତି) ଏବଂ ଅମ୍ବିକା ସୋନି(୧୦୫.୮୨ କୋଟିର ସମ୍ପତ୍ତି)। ସେହିଭଳି ୧୭ ଏମ୍ପି ରଖିଥିବା ସମ୍ପତ୍ତିି ବିଷୟରେ ଆଦୌ ତଥ୍ୟ ଦେଇନାହାନ୍ତି। ଏମାନେ ହେଲେ ଆର୍ଜେଡିର ମିଶା ଭାରତୀ, ଟିଏମ୍ସିର ଦୋଳା ସେନ୍, ଜେଡିୟୁର ମlହେନ୍ଦ୍ର ପ୍ରସାଦ, କଂଗ୍ରେସର ରାଜମଣି ପଟେଲ, ଭାଜପାର ରାକେଶ ସିହ୍ନା ପ୍ରମୁଖ। ସ୍ବଚ୍ଛତା ରକ୍ଷା ପରିବର୍ତ୍ତେ କେତେକ ନେତା ଆର୍ଥତ୍କ ତଥ୍ୟ ଲୁଚାଉଥିବା ନେଇ ଏଡିଆର୍ ମୁଖ୍ୟ ମେଜର ଜେନେରାଲ ଅନିଲ ବର୍ମା କ୍ଷୋଭ ପ୍ରକାଶ କରିଛନ୍ତି।
