ସିମୁଳିଆ,୧୧।୧(ଡି.ଏନ୍.ଏ.): ବାଲେଶ୍ୱର ଜିଲା ସିମୁଳିଆ ବ୍ଲକ ମଇତାପୁର ଅଞ୍ଚଳରୁ ୧୫ ଗ୍ରାମ ୭୦୦ ମିଲିଗ୍ରାମ ବ୍ରାଉନ ସୁଗାରକୁ ପୋଲିସ ଜବତ କରିଛି। ଉକ୍ତ ଅଞ୍ଚଳର ଉପେନ୍ଦ୍ର ସୂତାର ଓରଫ ପେଟୁ (୫୦) ନାମକ ଜଣେ ପରିବା ଦୋକାନୀଙ୍କ ନିକଟରୁ ଏହି ବ୍ରାଉନ ସୁଗାର ଜବତ କରାଯିବା ସହ ପୋଲିସ ତାଙ୍କୁ ଗିରଫ କରିଛି । ଉପେନ୍ଦ୍ର ବାଉନ୍ ସୁଗାର କାରବାର କରୁଥିବା ପୋଲିସ ସୂଚନା ପାଇଥିଲା। ପରେ ଶୁକ୍ରବାର ରାତିରେ ଡିଏସ୍ପି ମନୋଜ କୁମାର ରାଉତଙ୍କ ସମେତ ସିମୁଳିଆ ପୋଲିସ ଚଢ଼ାଉ କରି ମଇତାପୁର ଛକରୁ ଉପେନ୍ଦ୍ରଙ୍କୁ ଧରିଥିଲା । ତାଙ୍କ ନିକଟରୁ ବ୍ରାଉନ ସୁଗାର ସମେତ ନଗଦ ୧୪ ହଜାର ୨୭୦ ଟଙ୍କା ଓ ଏକ ମୋବାଇଲ ମଧ୍ୟ ଜବତ ହୋଇଛି । ଶନିବାର ମାଜିଷ୍ଟ୍ରେଟ୍ ରୂପେ ତହସିଲଦାର ରବିନାରାୟଣ ସାହୁ ଥାନାରେ ପହଞ୍ଚି ଅଭିଯୁକ୍ତଙ୍କ ବୟାନ ସଂଗ୍ରହ କରିଥିଲେ । ତେବେ ତାଙ୍କୁ ଜଣେ ମହିଳା ଏହା ଯୋଗାଉଥିବାର ଉପେନ୍ଦ୍ର ସୂଚନା ଦେଇଛନ୍ତି। ପୋଲିସ କେସ୍ ନଂ.୧୦/୨୦ରେ ଏକ ମାମଲା ରୁଜୁ କରି ତଦନ୍ତ ଚଳାଇଥିବା ଥାନା ଅଧିକାରୀ ପର୍ଶୁରାମ ସାହୁ ସୂଚନା ଦେଇଛନ୍ତି ।
