ବେଙ୍ଗାଲୁରୁ,୪ା୧୨: ଘରୋଇ ଲିଷ୍ଟ ଏ’ ଓ ଟି୨୦ କ୍ରିକେଟ ମ୍ୟାଚ୍ ବର୍ଷା ଦ୍ୱାରା ବାଧା ପ୍ରାପ୍ତ ହେଲେ ଫଳାଫଳ ନିଣ୍ଣୟ କରିବା ପାଇଁ ଦେଶରେ ଭିଜେଡି ନିୟମ ବ୍ୟବହାର କରାଯାଏ। ଏହି ନିୟମକୁ ପ୍ରସ୍ତୁତ କରିଥିଲେ ଭି. ଜୟଦେବନ। ହେଲେ ଭିଜେଡି ନିୟମ ବ୍ୟବହାର କରିବା ଲାଗି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଗତ ୧୦ ବର୍ଷ ହେଲା ଜୟଦେବନଙ୍କୁ କୌଣସି ଆର୍ଥିକ କ୍ଷତିପୂରଣ ଦେଉନାହିଁ। କେରଳର ସିଭିଲ ଇଞ୍ଜିନିୟର ୨୦୦୭ରେ ଏହି ନିୟମ ପ୍ରସ୍ତୁତ କରିଥିଲେ। ସେ କହିଛନ୍ତି, କେବଳ ୨୦୦୯ରେ ବୋର୍ଡ ପକ୍ଷରୁ ନିୟମକୁ ଆହୁରି ଉନ୍ନତର କରିବା ପାଇଁ ଆର୍ଥିକ ସହୟତା ପାଇଥିଲେ। ସୁନିଲ ଗାଭାସ୍କରଙ୍କ ନେତୃତ୍ୱାଧୀନ ଟେକନିକାଲ କମିଟିର ସୁପାରିସ କ୍ରମେ ୧୨ ବର୍ଷ ତଳେ କାର୍ଯ୍ୟକାରୀ କରାଯାଇଥିଲା। ସୌରଭ ଗାଙ୍ଗୁଲି ମଧ କମିଟିର ସଦସ୍ୟ ଥିଲେ। ସେ ଭିଜେଡି ନିୟମକୁ ଆଇପିଏଲରେ ଲାଗୁ କରିବାକୁ ପ୍ରସ୍ତାବ ଦେଇଥିଲେ। ଗତ ୧୨ ବର୍ଷ ହେଲା ଭିଜେଡି ନିୟମ ବ୍ୟବହାର କରାଯାଇ ୫୦୦ରୁ ଅଧିକ ଘରୋଇ ମ୍ୟାଚ୍ର ସନ୍ତୋଷଜନକ ଫଳାଫଳ ବାହାରିଛି। ରାଜ୍ୟର ଟି୨୦ ଲିଗ୍ କେପିଏଲ ଓ ଟିଏନ୍ପିଏଲ ମଧ୍ୟ ଏହା ଫଳପ୍ରଦ ସାବ୍ୟସ୍ତ ହେଉଛି। ଏଥିନେଇ ମୁଁ କୌଣସି ସମ୍ମାନ କିମ୍ବା ଆର୍ଥିକ ସହାୟତା ପାଇନାହିଁ ବୋଲି ସେ କହିଛନ୍ତି। ଏବେ ସେ ନୂଆ ନିୟମ ବାହର କରିଛନ୍ତି, ଯାହାର ନାମ ‘ମେକ ଅପ୍ ଫ୍ୟାକ୍ଟର’ ରଖିଛନ୍ତି। ଏହା ଦ୍ୱାରା କୌଣସି ଦଳକୁ ଫାଇଦା କିମ୍ବା କ୍ଷତି ହେବ ନାହିଁ। ତେବେ ଏହା ଟି୨୦ ଫର୍ମାଟରେ ବେଶ ସହାୟକ ହେବ। ଏହା ଉପରେ କାର୍ଯ୍ୟ କରିବା ପାଇଁ ମୋତେ ଅର୍ଥର ଆବଶ୍ୟକ ଅଛି। ତାଙ୍କୁ ବିସିସିଆଇ ସାଧାରଣ ସମ୍ପାଦକ (କ୍ରିକେଟ ଅପରେଶନ୍ସ) ସାବା କରିମ ଆଶ୍ୱସନା ଦେଇଛନ୍ତି।
