ପୁରୀ ଅଫିସ, ୧୦ା୮: ଶ୍ରୀକ୍ଷେତ୍ରର ଅଗ୍ରଣୀ ନାଟ୍ୟଅନୁଷ୍ଠାନ ରଙ୍ଗଶାଳା ଆନୁକୂଲ୍ୟରେ ୧୨ତମ ଜାତୀୟ ନାଟକ ମହୋତ୍ସବ ଆସନ୍ତା ୧୧ତାରିଖରୁ ଅନୁଷ୍ଠିତ ହେବ। ଅନ୍ନପୂର୍ଣ୍ଣା ରଙ୍ଗମଞ୍ଚରେ ୫ଦିନ ଧରି ଅନୁଷ୍ଠିତ ହୋଇ ୧୫ତାରିଖରେ ସମାପ୍ତ ହେବ। ଏହି ଅବସରରେ ଚଳିତ ବର୍ଷ ରାଉରକେଲାର ନ୍ୟୁ କ୍ବେଷ୍ଟ ରିପୋଟ୍ରି ନାଟ୍ୟ ସଂସ୍ଥାର ମୁଖ୍ୟ ତଥା ବିଶିଷ୍ଟ ନାଟ୍ୟ ପ୍ରତିଭା ବିସ୍ମିଲ୍ଲା ଖାନ୍ ସମ୍ମାନରେ ସମ୍ମାନିତ ନଳିନୀ ନିହାରୀ ନାୟକଙ୍କୁ ନାଟ୍ୟ ସଞ୍ଜୀବନୀ ବ୍ୟୋମକେଶ ସମ୍ମାନରେ ସମ୍ମାନିତ କରାଯିବ। ଏଥିରେ ଜାତୀୟସ୍ତରର ପ୍ରତିଷ୍ଠିତ ନାଟ୍ୟ ଅନୁଷ୍ଠାନମାନେ ଅଂଶଗ୍ରହଣ କରିବେ ବୋଲି ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ରଙ୍ଗଶାଳାର ନିର୍ଦ୍ଦେଶକ ତଥା ନାଟ୍ୟକାର ବିକ୍ରମ ସାହୁ କହିଛନ୍ତି।
ପ୍ରଥମ ଦିବସରେ ଭୁବନେଶ୍ୱର ମନନ ନାଟ୍ୟ ସଂସ୍ଥା ପକ୍ଷରୁ ନାଟମଣ୍ଡପ, ୨ୟ ଦିନରେ ଜୀବନରେଖା ଅନୁଷ୍ଠାନ ପକ୍ଷରୁ ଚୁପ! କୋର୍ଟ ଚାଲିଛି, ୩ୟ ଦିନରେ କଲିକତାର କୋଲକାତା ନାଟ୍ୟସଭା ପକ୍ଷରୁ ବଙ୍ଗାଳା ନାଟକ ଜଟିଲେଶ୍ୱର, ୪ର୍ଥରେ ଭୁବନେଶ୍ୱର ଏକ୍ସପ୍ରେସନ୍ ଅନୁଷ୍ଠାନ ପକ୍ଷରୁ ବୋତଲ ଭୂତ ଏବଂ ଶେଷ ରଜନୀରେ ଶତାବ୍ଦୀର କଳାକାରଙ୍କ ଦ୍ୱାରା ନାଟକ ବାଞ୍ଛାର ବଗିଚା ପରିବେଷିତ ହେବ ବୋଲି ସୂଚନା ଦିଆଯାଇଛି। ଏହି ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଐତିହ୍ୟ ଗବେଷକ ଦେବୀ ନନ୍ଦ, ଯୁବ ସଙ୍ଗଠକ ବିଶ୍ୱରଞ୍ଜନ ମିଶ୍ର, ନାଟ୍ୟକାର ଭରତ ନାୟକ, ବଲରାଜ ତ୍ରିପାଠୀ, ରବି ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।
