ନୂଆଦିଲ୍ଲୀ,୨୪ା୮: ପାର୍ଲାମେଣ୍ଟର ଉଭୟ ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରାଯିବା ଇତିମଧ୍ୟରେ ୧୦ ଦିନ ବିତିଥିଲେ ମଧ୍ୟ ଏହାକୁ ଆନୁଷ୍ଠାନିକ ଭାବେ ବନ୍ଦ କରାଯାଇନାହିଁ। ଫଳରେ ସରକାର ନିର୍ବାଚନମଣ୍ଡଳୀ ସୀମା ପୁନଃ ନିର୍ଦ୍ଧାରଣ (ଡିଲିମିଟେଶନ୍) ବିଲ୍ ଆଲୋଚନା ପାଇଁ ଆଣିପାରନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି। ପାର୍ଲାମେଣ୍ଟକୁ ଆନୁଷ୍ଠାନିକ ଭାବେ ବନ୍ଦ କରାଯିବାରେ ବିଳମ୍ବକୁ ନେଇ କଂଗ୍ରେସ ପ୍ରଶ୍ନ ଉଠାଇଛି। ଏକ ସ୍ବତନ୍ତ୍ର ଅଧିବେଶନରେ ନିର୍ବାଚନମଣ୍ଡଳୀ ସୀମା ନିର୍ଦ୍ଧାରଣ ସମ୍ବିଧାନ ସଂଶୋଧନ ବିଲ୍ ଗୃହୀତ କରାଇବା ନିମନ୍ତେ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ଦୁଇ-ତୃତୀୟାଂଶ ସଂଖ୍ୟାଗରିଷ୍ଠତା ହାସଲ ଲାଗି ଏବେବି କଳୁଷିତ ଉଦ୍ୟମ ଚଳାଇଛନ୍ତି କି ବୋଲି କଂଗ୍ରେସ ଜାଣିବାକୁ ଚାହିଁଛି।
ଅଗଷ୍ଟ ୧୩ରେ ରାଜ୍ୟ ସଭା ଓ ଲୋକ ସଭାକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରାଯାଇଥିଲା। ସାଧାରଣତଃ ମୁଲତବୀ ଘୋଷଣାର ଅଳ୍ପଦିନ ମଧ୍ୟରେ ଅଧିବେଶନକୁ ପ୍ରୋରୋଗ ବା ଆନୁଷ୍ଠାନିକ ଭାବେ ବନ୍ଦ ଘୋଷଣା କରାଯାଇଥାଏ। ତେବେ ରବିବାର ସକାଳ ସୁଦ୍ଧା ଏନେଇ କୌଣସି ବିଜ୍ଞପ୍ତି ଜାରି ହୋଇନାହିଁ। ବଜେଟ ଅଧିବେଶନ ଏପ୍ରିଲ ୧୮ରେ ଶେଷ ହେବାକୁ ଥିବାବେଳେ ଏହାର ୨ ଦିନ ପୂର୍ବରୁ ପ୍ରୋରୋଗ କରାଯାଇଥିଲା। ସାମ୍ବିଧାନିକ ବ୍ୟବସ୍ଥା ଅନୁଯାୟୀ, ସରକାରଙ୍କ ସୁପାରିସକ୍ରମେ ରାଷ୍ଟ୍ରପତି ପାର୍ଲାମେଣ୍ଟ ଅଧିବେଶନ ଡାକିଥାନ୍ତି ଓ ଏହାକୁ ବନ୍ଦ କରିଥାନ୍ତି। ତେବେ ପ୍ରୋରୋଗ ଘୋଷଣା କରିବାରେ ବିଳମ୍ବ ହେଉଥିବାରୁ ସରକାର ମହିଳା ସ୍ଥାନ ସଂରକ୍ଷଣ ଆଇନକୁ ୨୦୨୯ ଲୋକ ସଭା ନିର୍ବାଚନ ପୂର୍ବରୁ ଲାଗୁ କରିବା ପାଇଁ ସମ୍ବିଧାନ ସଂଶୋଧନ ବିଲ୍ ଗୃହୀତ କରାଇବା ସମ୍ଭାବନା ଥିବା ନେଇ ଚର୍ଚ୍ଚା ଜୋର୍ ଧରିଛି।
ସରକାର ବଜେଟ୍ ଅଧିବେଶନରେ ଉକ୍ତ ବିଲ୍ ଗୃହୀତ କରାଇବାକୁ ଉଦ୍ୟମ କରି ସଂଖ୍ୟା ଯୋଗାଡ଼ କରିବାରେ ବିଫଳ ହୋଇଥିଲେ। ଜନସଂଖ୍ୟା ଆଧାରିତ ନିର୍ବାଚନମଣ୍ଡଳୀ ସୀମା ପୁନଃ ନିର୍ଦ୍ଧାରଣକୁ ନେଇ ବିରୋଧୀ ଦଳ ଶାସିତ ଦକ୍ଷିଣ ଭାରତୀୟ ରାଜ୍ୟଗୁଡ଼ିକ ଚିନ୍ତାବ୍ୟକ୍ତ କରିଥିଲେ। ଏଭଳି ଡିଲିମିଟେଶନ କାର୍ଯ୍ୟକାରୀ ହେଲେ ଲୋକ ସଭାରେ ଉକ୍ତ ରାଜ୍ୟଗୁଡ଼ିକର ଆସନ ସଂଖ୍ୟା ହ୍ରାସ ପାଇପାରେ ବୋଲି ସେମାନେ ଆଶଙ୍କା ବ୍ୟକ୍ତ କରିଥିଲେ।
କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି, ସାଧାରଣତଃ ପାର୍ଲାମେଣ୍ଟ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା ହେବାର ୨ରୁ ୪ ଦିନ ମଧ୍ୟରେ ପ୍ରୋରୋଗ କରାଯାଇଥାଏ। ଏପରିକି ଗୋଟିଏ ଦିନରେ ମଧ୍ୟ ମୁଲତବୀ ଓ ପ୍ରୋରୋଗ ହୋଇଥିବାର ଉଦାହରଣ ରହିଛି। ତେବେ ଲୋକ ସଭା ମୁଲତବୀ ଘୋଷଣା ହେବାର ୧୦ ଦିନ ବିତିଥିଲେ ବି ପ୍ରୋରୋଗ ସମ୍ପର୍କରେ କୌଣସି ସୂଚନା ନ ଥିବାରୁ ଜୟରାମ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସେ କହିଛନ୍ତି, ୨୦୧୫ ଏବଂ ୨୦୨୧ରେ ଲୋକ ସଭା ମୁଲତବୀ ଓ ପ୍ରୋରୋଗ ମଧ୍ୟରେ ଯଥାକ୍ରମେ ୨୮ ଦିନ ଓ ୨୦ ଦିନ ବ୍ୟବଧାନ ରହିଥିଲା। ତେବେ ସେତେବେଳେ କୌଣସି କପଟପୂର୍ଣ୍ଣ ଯୋଜନା ଚାଲି ନ ଥିଲା। ଗତ ୨୧ ତାରିଖରେ ଶାହାଙ୍କ ଅଧ୍ୟକ୍ଷତାରେ ମହାବଳୀପୁରମ୍ଠାରେ ଅନୁଷ୍ଠିତ ଦକ୍ଷିଣ ଜୋନାଲ ପରିଷଦ ବୈଠକରେ ଡିଲିମିଟେଶନ୍କୁ ନେଇ ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ଉଦ୍ବେଗ ପ୍ରକାଶ କରିଥିବାରୁ ସରକାରଙ୍କ ଯୋଜନାକୁ ନେଇ କଳ୍ପନାଜଳ୍ପନା ଜାରି ରହିଛି।
