ଲକ୍ଷ୍ନୌ, ୨୨ା୮(ପି.ଟି.): ଉତ୍ତରପ୍ରଦେଶ(ୟୁପି)ର ସଇଫାଇଠାରେ ଥିବା ମେଡିକାଲ ସାଇନ୍ସ ବିଶ୍ୱବିଦ୍ୟାଳୟରେ ନବାଗତ ୧୫୦ ମେଡିକାଲ ଛାତ୍ରଙ୍କୁ ର଼୍ୟାଗିଂ କରାଯାଇଛି। ବରିଷ୍ଠ ଛାତ୍ରମାନଙ୍କ ନିର୍ଦ୍ଦେଶ କ୍ରମେ ପ୍ରଥମ ବର୍ଷର ଏହି ଛାତ୍ରମାନେ ଲଣ୍ଡାହୋଇ ରାସ୍ତାରେ ମୁଣ୍ଡ ନୁଆଇଁ ମାର୍ଚ୍ଚ କରିଛନ୍ତି। ଏହାର ଭିଡିଓ ଭାଇରାଲ ହେବା ପରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ଚେତା ପଶିଛି। ଭିଡିଓରେ ପ୍ରଥମ ବର୍ଷର ଛାତ୍ରମାନେ ଲଣ୍ଡା ହେବା ସହ ଧଳା ପୋଷାକ ପରିଧାନ କରି ମୁଣ୍ଡ ନୁଆଁଇ ରାସ୍ତାରେ ମାର୍ଚ୍ଚ କରୁଥିବା ଦେଖାଯାଇଛି। ଦ୍ୱିତୀୟ ଭିଡିଓରେ ବରିଷ୍ଠ ଛାତ୍ରଙ୍କୁ ଏମାନେ ସାଲ୍ୟୁଟ୍ ମାରୁଥିବାର ଦୃଶ୍ୟ ଦେଖାଯାଇଛି। ତୃତୀୟ ଭିଡିଓରେ ଜଣେ ସୁରକ୍ଷାକର୍ମୀ ଛାତ୍ରଙ୍କ ପାଖରେ ଛିଡ଼ା ହୋଇଥିବାର ଦୃଶ୍ୟ ରହିଥିବାବେଳେ ଏଭଳି କାର୍ଯ୍ୟକୁ ବିରୋଧ କରି ନ ଥିଲେ। ଏହି ଭିଡିଓକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବିଶ୍ୱବିଦ୍ୟାଳୟର କୁଳପତି ଡ. ରାଜକୁମାର ଏନେଇ ତଦନ୍ତ କରାଯାଇ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି। ର଼୍ୟାଗିଂ ରୋକିବା ଲାଗି ସ୍ବତନ୍ତ୍ର ସ୍କ୍ବାଡ୍ ସହ ଏକ କମିଟି ଗଠନ କରାଯାଇଛି ।
ଏନେଇ ଛାତ୍ରମାନେ କମିଟି ଆଗରେ ଅଭିଯୋଗ କରିପାରିବେ ବୋଲି ସେ କହିଛନ୍ତି। ର଼୍ୟାଗିଂକୁ ନେଇ ପୂର୍ବରୁ ବହୁ ଛାତ୍ରଙ୍କୁ ନିଲମ୍ବିତ କରାଯାଇଥିବା ମଧ୍ୟ କୁଳପତି କହିଛନ୍ତି। ନବାଗତମାନେ ଏନେଇ ଡ଼ରିବାର କିଛି ନାହିଁ ବୋଲି ସେ ସାନ୍ତ୍ୱନା ଦେଇଛନ୍ତି। ପ୍ରକାଶଥାଉ କି, ସଇଫାଇ ହେଉଛି ଏସ୍ପି ନେତା ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମୁଲାୟମ୍ ସିଂ ଯାଦବଙ୍କ ନିଜ ଗାଁ। ମୁଲାୟମ ମୁଖ୍ୟମନ୍ତ୍ରୀ ଥିବା ସମୟରେ ଏହି ବିଶ୍ୱବିଦ୍ୟାଳୟ ଗଠନ କରାଯାଇଥିଲା। ଗତ ମାସରେ ହାଇଦ୍ରାବାଦର ଜଣେ ଛାତ୍ରଙ୍କୁ ଏଠାରେ ର଼୍ୟାଗିଂ କରାଯିବା ପରେ ସେ ଆତ୍ମହତ୍ୟା ଲାଗି ଉଦ୍ୟମ କରିଥିଲେ। ଗତ ମାର୍ଚ୍ଚରେ ତାମିଲନାଡ଼ୁର ୨ ଛାତ୍ର ର଼୍ୟାଗିଂ ଲାଗି ଆତ୍ମହତ୍ୟା କରିଥିଲେ। ଏହାସତ୍ତ୍ୱେ ର଼୍ୟାଗିଂକୁ ରୋକାଯାଇ ନ ପାରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
