ରୂପସା, ୧୩ା୩(ବାଞ୍ଛାନିଧି ଦେ)-ବାଲେଶ୍ୱର ଜିଲା ବସ୍ତା ବ୍ଲକ ରାଉତପଡା ପଞ୍ଚାୟତର କାନ୍ଥି ବସ୍ତିରେ ରହିଛି ପ୍ରସିଦ୍ଧ ସୟଦ ହାତିମଶାହା ପୀରବାବାଙ୍କ ପୀଠ। ହିନ୍ଦୁ ଓ ମୁସଲମାନମାନଙ୍କ ବିଶ୍ୱାସର ମିଳନସ୍ଥଳ ପାଲଟିଛି ଏହି ଭକ୍ତି ପୀଠ। ଭକ୍ତମାନେ ଧୂପ, କଦଳୀ, ଭୋଗ ଓ ମାଟି ଘୋଡାଦାନ କରି ପୂଣ୍ୟ ଅର୍ଜନ କରନ୍ତି। ତାଙ୍କ ଆଶିଷରେ ବିପଦମୁକ୍ତ ହୋଇଯାନ୍ତି।
ଜନଶ୍ରୁତି ଅନୁଯାୟୀ, ୧୬୦୦ରୁ ୧୭୦୦ ଖ୍ରୀଷ୍ଟାବ୍ଦରେ କାବୁଲର ସୈନ୍ୟ ଭାବେ କେହି ଜଣେ ବାଦଶାହା ଏହି ରାସ୍ତା ଦେଇ ଫେରୁଥିଲେ। କୌଣସି ଯୁଦ୍ଧରୁ ଫେରୁଥିବାରୁ ସେ କ୍ଳାନ୍ତି ଅନୁଭବ କରୁଥିଲେ। ଜଙ୍ଗଲଭରା ରାସ୍ତାରେ ସୂର୍ଯ୍ୟାସ୍ତ ସମୟ ହୋଇଯିବାରୁ ସେ ସେଠାରେ ବିଶ୍ରାମ ନେଲେ। ନିଜ ଘୋଡାକୁ ଜଙ୍ଗଲରେ ବାନ୍ଧି ଦେଇଥିଲେ। ଏହି ସମୟରେ ଦକ୍ଷିଣ କଳିଙ୍ଗର ରାଜା ବାସୁଦେବ ଗୟାରୁ ତୀର୍ଥ ସାରି ଫେରୁଥିବା ବେଳେ ସେଠାରେ ପହଞ୍ଚି ରାତ୍ରିଯାପନ କଲେ। ଏଠାରେ ପୀରବାବା ଆବିର୍ଭାବ ହୋଇଛନ୍ତି ବୋଲି ସେ ସ୍ବପ୍ନରେ ଦେଖିଲେ। ତାଙ୍କର ସେବା ଶୁଶ୍ରୂଷା ପାଇଁ କେତେକ ଲୋକଙ୍କୁ ନିଯୁକ୍ତି ପୂର୍ବକ ସେମାନଙ୍କୁ ଜମିଦାରୀ ପ୍ରଦାନ କର ବୋଲି ରାଜାଙ୍କୁ ସ୍ବପ୍ନାଦେଶ ହୋଇଥିଲା। ଏହାକୁ ସତ ଭାବି ରାଜା ବାସୁଦେବ ନିଜର କର୍ତ୍ତବ୍ୟ ସମ୍ପାଦନ କରିଥିଲେ। ଏହି ପୀରବାବା ଆଉ କେହି ନୁହନ୍ତି, ଘୋଡା ଚଢି ଆସିଥିବା କାବୁଲର ସେହି କ୍ଳାନ୍ତ ବାଦଶାହା ହାତିମଶାହା ପୀରବାବା ଆବିର୍ଭାବ ହୋଇ ସେହିଦିନଠାରୁ ପୂଜା ପାଇ ଆସୁଛନ୍ତି। ରାତିରେ ବାବା ଘୋଡା ପିଠିରେ ବସି ଗାଁ ପରିକ୍ରମା କରୁଥିବା ବିଶ୍ୱାସ ରହିଛି। ଆରୋଗ୍ୟ ହେବା ସହ ମନସ୍କାମନା ପୂରଣ ପାଇଁ ଭକ୍ତମାନେ ସେଠାରେ ଭିଡ ଜମାନ୍ତି। ବାସ୍ତବରେ ଏହି ଭକ୍ତି ପୀଠ ହିଁ ହିନ୍ଦୁ-ମୁସଲମାନଙ୍କ ମିଳନ ସ୍ଥଳ ବୋଲି ସମସ୍ତେ କୁହନ୍ତି।
ଏମାନେ କୁହନ୍ତିି
ଗାଁ ମୁଖିଆ ସେକ୍ ମଡିଆ, ଲାଲା ଶାହା, କୁଦରତ ଶାହାଙ୍କ କହିବା ଅନୁଯାୟୀ ଗାଁରେ ବସନ୍ତ, ମିଳିମିଳା, ଝାଡାବାନ୍ତି ଆଦି ବ୍ୟାପିଲେ ରାତିରେ ବାବା ଘୋଡା ପିଠିରେ ବସି ଗାଁ ପରିକ୍ରମା କରନ୍ତି । ତାଙ୍କ ଘୋଡା ଟାପୁ ଶବ୍ଦ ଲୋକେ ଶୁଣିଛନ୍ତି। ବାବା ଗାଁରେ ବୁଲିଲେ ଗ୍ରାମବାସୀ ରୋଗମୁକ୍ତ ହୋଇଯାନ୍ତି।
ଅବସରପ୍ରାପ୍ତ ଶିକ୍ଷକ ଜଗନ୍ନାଥ ପାଣିଗ୍ରାହୀ କୁହନ୍ତି, ବାବା କେବଳ ମୁସଲମାନଙ୍କର ନୁହନ୍ତି। ସେ ହିନ୍ଦୁଙ୍କର ମଧ୍ୟ। ସମସ୍ତେ ମିଶି ପ୍ରତି ଗୁରୁବାର କଲ୍ୟାଣ ଲଭିବା ପାଇଁ ଏଠାରେ ପୂଜାର୍ଚ୍ଚନା କରିଥାନ୍ତି। ଏହି ପୀଠ ଇତିହାସର କିମ୍ବଦନ୍ତୀ ବହନ କରିଥିବାରୁ ସମସ୍ତେ ବିଶ୍ୱାସର ସହ ଏଠାକୁ ଆସିଥାନ୍ତି।
ଉର୍ସ କମିଟି କର୍ମକର୍ତ୍ତା ଜୁମନ ଖାଁ, ମନସୁର ଶାହା, ସେକରିଆଜ କହନ୍ତି ପ୍ରତିବର୍ଷ ଏହି ପୀଠରେ ଉର୍ସ ପର୍ବ ପାଳନ ହୁଏ। ଓଡିଶା, କଲିକତା, ବିହାରରୁ ଆସି ଶ୍ରଦ୍ଧାଳୁମାନେ ପୂଜାର୍ଚ୍ଚନା କରିଥାନ୍ତି। ପୀର ବାବାଙ୍କ ଗୋସଲ, କୁର୍ବାନଖାନ, ଚାଦର ଚଢା ସହ ବିରାଟ କବାଲିର ଆୟୋଜନ ହୁଏ।
ଏହି ଭକ୍ତି, ନୈବେଦ୍ୟର ପୀଠ ଏବେ ଭାଇଚାରା, ଏକତାର ବାର୍ତ୍ତା ବହନ କରିବା ସହ ସଭିଙ୍କୁ ବିଶ୍ୱାସ ଡୋରିରେ ବାନ୍ଧି ରଖିଥିବାରୁ ସ୍ଥାନୀୟ ଲୋକେ ଏହାର ସାମଗ୍ରିକ ବିକାଶ ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି।
