ହାମିଲଟନ,୧।୧୨- ସ୍ଥାନୀୟ ସେଡନ ପାର୍କରେ ଚାଲିଥିବା ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଭ୍ରମଣକାରୀ ଇଂଲଣ୍ଡ ଓପନର ରୋରି ବନର୍ସ ଓ ଅଧିନାୟକ ଜୋ ରୁଟଙ୍କ ଶତକ ସହୟତାରେ ଦୃଢ଼ ଜବାବ ଦେଇଛି। ତେବେ ଶସ୍ତାରେ କେତୋଟି ଉଇକେଟ ହରାଇବା ଫଳରେ ଇଂଲଣ୍ଡ ନ୍ୟୁଜିଲାଣ୍ଡକୁ ପ୍ରତ୍ୟାବର୍ତ୍ତନ କରିବାର ସୁଯୋଗ ଦେଇଛି। ଟସ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ନ୍ୟୁଜିଲାଣ୍ଡ ପ୍ରଥମ ଇନିଂସରେ ଓପନର ଟମ୍ ଲଥାମଙ୍କ ଶତକ, ରସ ଟେଲର, ବିଜେ ଓ୍ବାଟଲିଂ ଓ ଡାରିଲ ମିଚେଲଙ୍କ ଅର୍ଦ୍ଧଶତକ ସହାୟତାରେ ୧୨୯.୧ ଓଭରରେ ୩୭୫ ରନ କରି ଅଲଆଉଟ ହୋଇଥିଲା। ଜବାବରେ ପ୍ରଥମ ଇନିଂସ ଆରମ୍ଭ କରି ଇଂଲଣ୍ଡ ରବିବାର ତୃତୀୟ ଦିବସ ଖେଳ ଶେଷ ସୁଦ୍ଧା ୯୯.୪ ଓଭରରେ ୫ ଉଇକେଟ ହରାଇ ୨୬୯ ରନ ସଂଗ୍ରହ କରିଛି। ମ୍ୟାଚ୍ ଆଉ ଦୁଇ ଦିନ ବାକିଥିବା ବେଳେ ଇଂଲଣ୍ଡ ୫ ଉଇକେଟ ହାତରେ ରଖି ୧୦୬ ରନ ପଛରେ ରହିଛି। ଷ୍ଟମ୍ପ ଅପସାରଣ ବେଳକୁ ରୁଟ୍ ୧୧୪ ରନର ଶତକୀୟ ପାଳି ଖେଳି ଓ ଉଇକେଟକିପର ବ୍ୟାଟ୍ସମ୍ୟାନ ଓଲି ପୋପ୍ ୪ ରନ କରି ଅପରାଜିତ ରହିଛନ୍ତି। ଅନ୍ତିମ ସେସନରେ ଅବଶ୍ୟ ବର୍ଷା ଯୋଗୁ ଖେଳ ବାଧାପ୍ରାପ୍ତ ହୋଇଥିଲା।
ଅସମାପ୍ତ ପ୍ରଥମ ଇନିଂସ ସ୍କୋର ୩୯/୨ରୁ ଇଂଲଣ୍ଡ ଖେଳ ଆରମ୍ଭ କରିଥିଲା। ଦୁଇ ଓଭରନାଇଟ ବ୍ୟାଟ୍ସମ୍ୟାନ ବନର୍ସ ଓ ରୁଟ୍ ଯଥାକ୍ରମେ ୨୪ ଓ ୬ ରନରୁ ଖେଳ ଆରମ୍ଭ କରି ଶତକ ହାସଲ କରିଥିଲେ। ବନର୍ସ ୨୦୯ଟି ବଲ ଖେଳି ୧୫ ଚୌକା ସହ ୧୦୧ ରନ କରି ଶତକ ହାସଲ କରିବା ପରେପରେ ଦୁର୍ଭାଗ୍ୟଜନକ ଭାବେ ରନ୍ ଆଉଟ ହୋଇଥିଲେ। ଦ୍ୱିତୀୟ ରନ ନେବାକୁ ପ୍ରୟାସ କରୁଥିବା ବେଳେ ମିଡ୍ ଉଇକେଟରୁ ଜିତ୍ ରାଭାଲ ଥ୍ରୋ କରିଥିଲେ ଓ ଉଇକେଟକିପର ବିଜେ ଓ୍ବାଟିଲିଂ ରନ୍ ଆଉଟ କରିଥିଲେ। ସେହିପରି ରୁଟ୍ ରବିବାର ଦିନ ସାରା ବ୍ୟାଟିଂ କରିଥିଲେ। ୨୭୮ଟି ବଲର ସମ୍ମୁଖୀନ ହୋଇ ୧୪ଟି ଚୌକା ସହ ୧୧୪ ରନ କରି ସେ ଅପରାଜିତ ରହିଛନ୍ତି। ଖରାପ୍ ଫର୍ମ ଦେଇ ଗତି କରିଆସୁଥିବା ରୁଟ୍ ଏଥିସହିତ ଫର୍ମକୁ ଫେରିଛନ୍ତି। ତୃତୀୟ ଉଇକେଟରେ ରୁଟ୍ ଓ ବନର୍ସ ୧୭୭ ରନ ସଂଗ୍ରହ କରିଥିଲେ। ଏକଦା ୨ ଉଇକେଟ ହରାଇ ୨୦୧ ରନ କରି ଇଂଲଣ୍ଡ ସୁବିଧାଜନକ ସ୍ଥିତିରେ ଥିଲା। ତେବେ ନ୍ୟୁଜିଲାଣ୍ଡ ବୋଲ ଆଉ ୩ଟି ଉଇକେଟ ଅକ୍ତିଆର କରି ପ୍ରତ୍ୟାବର୍ତ୍ତନ କରିଥିଲେ। ବନର୍ସଙ୍କ ପରେ ବେନ୍ ଷ୍ଟୋକ୍ସ ୨୬ ରନ କରି ଟିମ୍ ସୌଦିଙ୍କ ବଲ୍ରେ ରସ ଟେଲରଙ୍କୁ ଜ୍ୟାକ କ୍ରଲି ୧ ରନ କରି ନିଲ ଓ୍ବାଗନରଙ୍କ ବଲ୍ରେ ଓ୍ବାଟଲିଂଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଶନିବାର ଡୋମ ସିବ୍ଲି ଓ ଜୋ ଡେନଲି ୪ରନ ଲେଖାଏ କରି ଆଉଟ ହୋଇଥିଲେ। ବୋଲିଂରେ ନ୍ୟୁଜିଲାଣ୍ଡ ତରଫରୁ ସୌଦି ୨ଟି, ମ୍ୟାନ ହେନରୀ ଓ ଓ୍ବାଗନର ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ। ପ୍ରଥମ ଟେଷ୍ଟରେ ନ୍ୟୁଜିଲାଣ୍ଡ ଏକ ଇନିଂସ ଓ ୬୫ ରନରେ ବିଜୟ ହାସଲ କରି ସିରିଜରେ ୧-୦ରେ ଅଗ୍ରଣୀ ହାସଲ କରିଥିଲା।
ସଂକ୍ଷିପ୍ତ ସ୍କୋର:
ନ୍ୟୁଜିଲାଣ୍ଡ ପ୍ରଥମ ଇନିଂସ- ୧୨୯.୧ ଓଭରରେ ୩୭୫ ଅଲଆଉଟ
ଇଂଲଣ୍ଡ ପ୍ରଥମ ଇନିଂସ- ୯୯.୪ ଓଭରରେ ୨୬୯/୫
(ବନର୍ସ- ୧୦୧, ରୁଟ୍-୧୧୪*, ସୌଦି- ୨/୬୩, ହେନରୀ- ୧/୫୬, ଓ୍ବାଗନର- ୧/୭୬)।
