ଭୋଗରାଇ, ୩ା୪(ଡି.ଏନ.ଏ.) – କରୋନା ଭୂତାଣୁ ସଂକ୍ରମଣ ରୋକିବା ଲାଗି ଏବେ ସମଗ୍ର ଦେଶ ଲକ୍ଡାଉନରେ ରହିଛି। ଏହାର ପ୍ରତିକୂଳ ପ୍ରଭାବ ପାନ ଚାଷ ଉପରେ ପଡିଛି। ଏହି ଚାଷ ଉପରେ ନିର୍ଭର କରୁଥିବା ବାଲେଶ୍ୱର ଜିଲା ଭୋଗରାଇ ଓ ବାଲିଆପାଳ ଅଞ୍ଚଳର ହଜାର ହଜାର ପାନ ଚାଷୀ ଓ ବ୍ୟବସାୟୀ ପ୍ରତ୍ୟକ୍ଷ, ପରୋକ୍ଷ ଭାବେ ଜୀବିକା ହରାଇ ଘରେ ହାତ ବାନ୍ଧି ବସିଛନ୍ତି।
ପାନ ଏକ ଅର୍ଥକାରୀ ଫସଲ। ଏହି ଚାଷ କରି ଦୁଇ ବ୍ଲକ ଅଞ୍ଚଳର ଲୋକେ ଆର୍ଥିକ ସ୍ଥିତିକୁ ଦୃଢ କରିପାରିଛନ୍ତି। ଭୋଗରାଇ ଓ ବାଲିଆପାଳ ଅଞ୍ଚଳର ପାନ ମୁମ୍ବାଇ, ଦିଲ୍ଲୀ, ବନାରସ, ଅଜମଗଡ, ବାଲିଆ, ନାଗପୁର, ଟାଟା ଓ ବାଙ୍ଗାଲୋର ଆଦି ଅଞ୍ଚଳକୁ ବିକ୍ରି ପାଇଁ ପଠାଯାଇଥାଏ। ଲକ୍ଡାଉନ ଯୋଗୁ ବ୍ଲକର ସମୁଦ୍ର ଉପକୂଳବର୍ତ୍ତୀ ଅଞ୍ଚଳରେ ୨୪ ହଜାରରୁ ଊର୍ଦ୍ଧ୍ୱ ପାନଚାଷୀ ପ୍ରଭାବିତ ହୋଇଛନ୍ତି। ଏବେ ବଜାରରେ ପାନ କିଣା ବିକା ବନ୍ଦ ହୋଇଯିବାରୁ ଚାଷୀଙ୍କ ଉପରେ କରୋନା ଚଡକ ପଡିଛି। ଏହି ଦୁଇ ଅଞ୍ଚଳର ପାନଚାଷୀ ବାହାର ରାଜ୍ୟକୁ ପାନ ପଠାଇ ନ ପାରି ବାଧ୍ୟ ହୋଇ ବାଡି ବଗିଚାରେ ଫୋପାଡୁଛନ୍ତି। କାରବାର ବନ୍ଦ ହେବା ଯୋଗୁ ପାନଚାଷୀମାନେ ଦୁର୍ଦ୍ଦିନ ମଧ୍ୟରେ କାଳାତିପାତ କରୁଛନ୍ତି। ଏହି ଚାଷ ଉପରେ ନିର୍ଭର କରୁଥିବା ଚାଷୀମାନେ ଶ୍ରମ ହରାଇ ପରିବା ଚଳାଇବା କଷ୍ଟକର ହୋଇପଡିଛି। ଏହାବ୍ୟତୀତ ପାନଚାଷରେ ବ୍ୟବହାର ହେଉଥିବା ଖଡି ଓ ଇକଡ ଚାଷ ମଧ୍ୟ ଗଭୀର ଭାବେ ପ୍ରଭାବିତ ହୋଇଛି। ଏତଦ୍ଭିନ୍ନ ପାନ ରପ୍ତାନୀ ପାଇଁ ବ୍ୟବହାର ହେଉଥିବା ବାଉଁଶ ତିଆରି ଟୋକେଇ ବା ଝୁଡି ପ୍ରସ୍ତୁତକାରୀମାନେ ଜୀବନଜୀବିକା ହରାଇ ବେରୋଜଗାର ହୋଇପଡିଛନ୍ତି। ଦୀର୍ଘଦିନ ଧରି ଏହି ଲକ୍ଡାଉନ ସମସ୍ୟା ଲାଗି ରହିଲେ ପାନବ୍ୟବସାୟୀଙ୍କ ମେରୁଦଣ୍ଡ ଦୋହଲିଯିବାର ଆଶଙ୍କା ଦେଖାଦେଇଛି।
