ବାଲେଶ୍ୱର ଅଫିସ, ୯ା୯-ବାଲେଶ୍ୱର ଜିଲା ରେମୁଣା ବ୍ଲକ ହଳଦିଆ ଗ୍ରାମ ଦେଇ ପ୍ରବାହିତ ବୁଢାବଳଙ୍ଗ ନଦୀର ହଳଦିଆ ଘାଟରେ ରବିବାର ସନ୍ଧ୍ୟା ପ୍ରାୟ ୭ଟା ୪୦ ମିନିଟ୍ ଏକ ଯାତ୍ରୀବାହୀ ଡଙ୍ଗା ବୁଡିଯାଇଥିଲା। ଏଥିରେ ଥିବା ୩୦ରୁ ଊର୍ଦ୍ଧ୍ୱ ଯାତ୍ରୀଙ୍କ ମଧ୍ୟରେ କେତେକ ଯାତ୍ରୀ ପହଁରି ପହଁରି କୂଳ ଆସିଥିବା ଜଣାପଡିଛି। ଏହି ଖବର ପ୍ରଚାରିତ ହେବା ପରେ ରେମୁଣା ପୋଲିସ ଓ ଦମକଳ ବାହିନୀ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ଏପର୍ଯ୍ୟନ୍ତ କୌଣସି ଯାତ୍ରୀଙ୍କ ମୃତ କିମ୍ବା ଆହତଙ୍କ ସମ୍ପର୍କରେ କିଛି ସ୍ପଷ୍ଟ ସୂଚନା ମିଳିନାହିଁ।
ଏହି ଡଙ୍ଗାରେ ୫ଟି ସାଇକେଲ ସହ ୩୦ରୁ ଊର୍ଦ୍ଧ୍ୱ ଯାତ୍ରୀ ଥିଲେ। ଡଙ୍ଗା କୂଳ ଛାଡିବାର ମାତ୍ର ୩୦ ଫୁଟ ଯିବା ପରେ ଏକ ଅର୍ଦ୍ଧନିର୍ମିତ ପୋଲରେ ପିଟି ହଠାତ୍ ଓଲଟି ପଡିଥିଲା। କେତେକ ଯାତ୍ରୀ ଜୀବନ ବିକଳରେ ପହଁରି ପହଁରି କୂଳକୁ ଆସି ସ୍ଥାନୀୟ ଲୋକଙ୍କୁ ଜଣାଇଥିଲେ। ଲୋକେ ପୋଲିସ ଓ ଦମକଳ ବାହିନୀକୁ ଖବର ଦେଇଥିଲେ। ଏହି ଡଙ୍ଗାରେ କୌଣସି ମହିଳା ଯାତ୍ରୀ ନ ଥିବା ଜଣାପଡିଛି। ଡଙ୍ଗାରେ ଯାଉଥିବା ଯାତ୍ରୀମାନେ ଲାଇଫ ଜ୍ୟାକେଟ ବ୍ୟବହାର କରୁ ନ ଥିବାରୁ ଏଭଳି ବାରମ୍ବାର ଦୁର୍ଘଟଣା ଘଟୁଥିବା ସ୍ଥାନୀୟ ଲୋକେ କହିଛନ୍ତି। ଉଲ୍ଲେଖଯୋଗ୍ୟ ଯେ, ଅଗଷ୍ଟ ୩ରେ ଏଭଳି ଡଙ୍ଗାବୁଡି ଘଟଣା ଘଟିଥିଲା। ଏଥିରେ ଜଣେ ଯାତ୍ରୀଙ୍କର ମୃତ ହୋଇଥିଲା।
