ବାସୁଦେବପୁର, ୨୯।୮ (ଡି.ଏନ.ଏ.) – କେନ୍ଦ୍ର ଓ ରାଜ୍ୟ ସରକାରଙ୍କ ସ୍ବଚ୍ଛ ଭାରତ ମିଶନ(ଗ୍ରାମୀଣ)ରେ ଭଦ୍ରକ ଜିଲା ବାସୁଦେବପୁର ବ୍ଲକରେ ଲକ୍ଷ୍ୟ ଧାର୍ଯ୍ୟ ଥିବା ୩୯,୫୫୫ଟି ପାଇଖାନା ମଧ୍ୟରୁ ୨୦,୩୯୪ଟି ନିର୍ମାଣ ସରିଛି। ୧୯,୧୬୧ ପାଇଖାନା ନିର୍ମାଣାଧୀନ ରହିଥିବା ବେଳେ ସେଥିମଧ୍ୟରୁ ୧୦,୪୦୦ର ନିର୍ମାଣ କାର୍ଯ୍ୟ ଅନ୍ତିମ ପର୍ଯ୍ୟାୟରେ ପହଞ୍ଚିଥିବା ଜଣାପଡ଼ିଛି। କେନ୍ଦ୍ର ଓ ରାଜ୍ୟ ସରକାର ଏହି ମିଶନକୁ ସର୍ବାଧିକ ଗୁରୁତ୍ୱ ଦେଇ ଗ୍ରାମ ଓ ପଞ୍ଚାୟତକୁ ସମ୍ପୂର୍ଣ୍ଣ ମଳମୁକ୍ତ କରିବା ଉଦ୍ଦେଶ୍ୟରେ ଚଳିତବର୍ଷ ଗାନ୍ଧୀ ଜୟନ୍ତୀରେ ଶତ ପ୍ରତିଶତ ସଫଳତା ହାସଲ ପାଇଁ ଲକ୍ଷ୍ୟ ଧାର୍ଯ୍ୟ ରଖିଛନ୍ତି।
ଉଲ୍ଲେଖନୀୟ ଯେ, ବାସୁଦେବପୁର ବ୍ଲକର ୩୬ ପଞ୍ଚାୟତ ଥିବାବେଳେ ଲୋକଙ୍କ ଆବଶ୍ୟକତାକୁ ଆଧାର କରି ୩୯୫୫୫ ପାଇଖାନା ନିର୍ମାଣ ସକାଶେ ଲକ୍ଷ୍ୟ ଧାର୍ଯ୍ୟ କରାଯାଇଛି। ପାଇଖାନା ନିର୍ମାଣ ବାବଦକୁ ଜିଲା ଜଳ ପରିମଳ ମିଶନ ପକ୍ଷରୁ ଗ୍ରାମ୍ୟ ଜଳ ଯୋଗାଣ ପରିମଳ ବିଭାଗ ତତ୍ତ୍ବାବଧାନରେ ୧୨ ହଜାର ଟଙ୍କା କରି ସରକାର ପ୍ରୋତ୍ସାହନ ରାଶି ହିତାଧିକାରୀଙ୍କୁ ପ୍ରଦାନ କରୁଛନ୍ତି। ବର୍ତ୍ତମାନ ସୁଦ୍ଧା ବ୍ଲକରେ ସମ୍ପୂର୍ଣ୍ଣ ହୋଇସାରିଥିବା ପ୍ରକଳ୍ପ ବାବଦକୁ ୨୩.୭୮ କୋଟି ଟଙ୍କାର ପ୍ରୋତ୍ସାହନ ରାଶି ହିତାଧିକାରୀଙ୍କ ଆକାଉଣ୍ଟକୁ ପଠାଯାଇ ସାରିଛି। ଅସମ୍ପୂର୍ଣ୍ଣ ପାଇଖାନା ନିର୍ମାଣ କାର୍ଯ୍ୟକୁ ଅଧିକ କ୍ରିୟାଶୀଳ କରିବା ଲକ୍ଷ୍ୟରେ ବିଭାଗ ପକ୍ଷରୁ ବ୍ଲକରେ ୫୫ଟି ସ୍ବୟଂ ସହାୟକ ଗୋଷ୍ଠୀଙ୍କୁ ନିର୍ମାଣ ଓ ତଦାରଖ ଦାୟିତ୍ୱ ଦିଆଯାଇଛି। ସ୍ବୟଂ ସହାୟକ ଗୋଷ୍ଠୀର ମହିଳାମାନେ ଗାଁ ଗାଁ ବୁଲି କିପରି ସ୍ବଚ୍ଛ ଭାରତ ମିଶନ ସଫଳ ହୋଇପାରିବ ସେ ନେଇ ସଚେତନତା ସୃଷ୍ଟି କରିବେ ବୋଲି ଗ୍ରାମ୍ୟ ଜଳ ଯୋଗାଣ ପରିମଳ ବିଭାଗର କନିଷ୍ଠ ଯନ୍ତ୍ରୀ ସୁବ୍ରତ କୁମାର ପାଢୀ କହିଛନ୍ତି। ଏହି ବ୍ଲକରେ ପାଇଖାନା ନିର୍ମାଣର ଧାର୍ଯ୍ୟ ଲକ୍ଷ୍ୟ ପୂରଣ କରି ୫ ପଞ୍ଚାୟତ ବ୍ରାହ୍ମଣଗାଁ, ନରସିଂହପୁର, ଆରୁହା, ଜଗନ୍ନାଥପୁର, ବରଣ୍ଡୁଆ ସମ୍ପୂର୍ଣ୍ଣ ମଳମୁକ୍ତ ପଞ୍ଚାୟତ ଭାବେ ଜିଲାସ୍ତରରେ ପୁରସ୍କୃତ ହୋଇଛନ୍ତି। ବ୍ରାହ୍ମଣଗାଁରେ ୧୬୧୬, ନରସିଂହପୁରରେ ୧୨୦୬, ଜଗନ୍ନାଥପୁରରେ ୧୨୯୮, ଆରୁହାରେ ୧୩୧୧ ଓ ବରଣ୍ଡୁଆରେ ୧୪୮୧ ପାଇଖାନା ନିର୍ମାଣ ସରି ଅନ୍ୟ ପଞ୍ଚାୟତ ପାଇଁ ଉଦାହରଣ ସୃଷ୍ଟି କରିଛନ୍ତି ବୋଲି ଗ୍ରାମ୍ୟ ଜଳ ଯୋଗାଣ ପରିମଳ ବିଭାଗର ଅନ୍ୟତମ ଯନ୍ତ୍ରୀ ଭରତ ସାହୁଙ୍କ ସୂତ୍ରରୁ ପ୍ରକାଶ। ପାଇଖାନା ନିର୍ମାଣ କ୍ଷେତ୍ରରେ ରାଜଘରପୋଖରୀ, ବିଦେଇପୁର, ଗୁଆଗଡିଆ ପଛୁଆ ପଡ଼ିଥିବା ବିଭାଗ ସୂତ୍ରରୁ ଜଣାଯାଇଛି। ଏ ସମ୍ପର୍କରେ ବିଡିଓ ବୀରକିଶୋର ପାଣିଗ୍ରାହୀ କହିଛନ୍ତି, ବାସୁଦେବପୁରକୁ ସମ୍ପୂର୍ଣ୍ଣ ମଳମୁକ୍ତ ବ୍ଲକ ଭାବେ ପରିଗଣିତ କରିବା ଲାଗି ଜନସଚେତନତା ସହ ମାଇକ ପ୍ରଚାର ମାଧ୍ୟମରେ ହିତାଧିକାରୀଙ୍କୁ ସଚେତନ କରାଯାଉଛି। ତେବେ ସରକାରଙ୍କର ଏହି ପାଇଲଟ୍ ପ୍ରକଳ୍ପକୁ ସଫଳ କରିବା ପାଇଁ ସରକାରୀ କର୍ମଚାରୀଙ୍କୁ ତାଗିଦ୍ କରାଯାଉଛି ବୋଲି ସେ କହିଛନ୍ତି।
