ଚେନ୍ନାଇ/ମୁମ୍ବାଇ,୧୨।୭(ପି.ଟି.): ଶେଲଡନ ଜ୍ୟାକ୍ଶନ ସୌରାଷ୍ଟ୍ର ଦଳ ଛାଡିଛନ୍ତି। ସୌରାଷ୍ଟ୍ରକୁ ଗତ ରଣଜୀ ସେସନରେ ଚାମ୍ପିୟନ କରାଇଥିବା ଏହି ତାରକା ବ୍ୟାଟ୍ସମ୍ୟାନ ଆଗାମୀ ଘରୋଇ ସେସନରେ ଏବେ ପୁଡୁଚେରୀ ପକ୍ଷରୁ ଖେଳିବେ। ଏ ନେଇ ଜ୍ୟାକଶନ ସୂଚନା ଦେଇଛନ୍ତି। ଏହି ନିଷ୍ପତ୍ତି ନିଶ୍ଚିତ ଭାବେ କଷ୍ଟକର ଥିଲା ବୋଲି ସେ କହିଛନ୍ତି। ତେବେ ବର୍ତ୍ତମାନ ହିଁ ଏହି ନିଷ୍ପତ୍ତି ନେବାର ଉଚିତ୍ ସମୟ ବୋଲି ସେ କହିଛନ୍ତି। ସୌରାଷ୍ଟ୍ର କ୍ରିକେଟ ଆସୋସିଏଶନ (ଏସ୍ସିଏ) ଦ୍ୱାରା ଜାରି କରାଯାଇଥିବା ପ୍ରେସ୍ ବିଜ୍ଞପ୍ତିରେ ସେ ଏହି କଥା କହିଛନ୍ତି। ୨୦୧୯-୨୦ ସେସନରେ ସେ ୧୦ ମ୍ୟାଚ୍ ଓ ୧୮ଟି ଇନିଂସ ଖେଳି ୫୦.୫୬ ରନ ହାରରେ ୮୦୯ ରନ ସଂଗ୍ରହ କରିଥିଲେ।
ପୂର୍ବତନ ଟେଷ୍ଟ ବୋଲର ପଙ୍କଜ ସିଂ ଗତ ସେସନରେ ଇଞ୍ଜୁରି ଯୋଗୁ ଖେଳିପାରି ନ ଥିଲେ ଓ ଏଥର ସେ ପୁଡୁଚେରୀକୁ ପ୍ରତ୍ୟାବର୍ତ୍ତନ କରିଛନ୍ତି। ସେହିପରି ଘରୋଇ କ୍ରିକେଟର ଅନ୍ୟତମ ତାରକା ବ୍ୟାଟ୍ସମ୍ୟାନ ପାରସ ଡୋଗ୍ରା ମଧ୍ୟ ପୁଡୁଚେରୀ ତରଫରୁ ପୁଣି ଖେଳିବେ ବୋଲି କ୍ରିକେଟ ଆସୋସିଏଶନ ଅଫ୍ ପୁଡୁଚେରୀ ସମ୍ପାଦକ ଭି. ଚନ୍ଦ୍ରନ କହିଛନ୍ତି। ଜ୍ୟାକ୍ଶନ ୨୦୧୧ରେ ସୌରାଷ୍ଟ୍ର ତରଫରୁ ପଦାର୍ପଣ କରିଥିଲେ ଓ ପ୍ରଥମ ଶ୍ରେଣୀ କ୍ରିକେଟରରେ ୪୯.୪୨ ହାରରେ ୫୬୩୪ ରନ ସଂଗ୍ରହ କରିଛନ୍ତି। ଏଥିରେ ୧୯ଟି ଶତକ ଓ ୨୭ଟି ଅର୍ଦ୍ଧଶତକ ସାମିଲ ରହିଛି। ଏସ୍ସିଏ ତରଫରୁ ଜ୍ୟାକ୍ଶନ ନୋ ଅବଜେକ୍ସନ ସାର୍ଟିଫିକେଟ (ଏନ୍ଓସି) ମଧ୍ୟ ହାସଲ କରିଛନ୍ତି। ସୌରାଷ୍ଟ୍ର ପକ୍ଷରୁ ଖେଳିବାର ଅଭିଜ୍ଞତା ଚମତ୍କାର ଥିଲା। ଖରାପ୍ ଓ ଭଲ ସମୟରେ ଦଳ ତରଫରୁ ଯଥେଷ୍ଟ ସହଯୋଗ ମିଳିଥିଲା ବୋଲି ୩୩ ବର୍ଷୀୟ ଜ୍ୟାକଶନ କହିଛନ୍ତି। ଏସ୍ସିଏ ସମ୍ପାଦକ ନିରଞ୍ଜନ ଶାହା, ଅଧ୍ୟକ୍ଷ ଜୟଦେବ ଶାହଙ୍କୁ ସେ କୃତଜ୍ଞତା ଜଣାଇଛନ୍ତି। ପୁଡୁଚେରୀ ଆସୋସିଏଶନ ତରଫରୁ ମଧ୍ୟ ଜ୍ୟାକ୍ଶନଙ୍କୁ ସ୍ବାଗତ କରାଯାଇଛି।
