ସୋରଡା, ୧ା୧୧(ଡି.ଏନ୍.ଏ.)- ରାଜ୍ୟ ସରକାର ଗରିବ ମେଧାବୀ ଛାତ୍ରୀଛାତ୍ରଙ୍କୁ ଇଂରାଜୀ ମାଧ୍ୟମରେ ଶିକ୍ଷା ଦେବାକୁ ପଛୁଆ ବ୍ଲକରେ ଆଦର୍ଶ ବିଦ୍ୟାଳୟ ପ୍ରତିଷ୍ଠା କରିଥିଲେ। ମାତ୍ର ବିଭିନ୍ନ ସ୍ଥାନରେ ଶିକ୍ଷକ ଅଭାବ ସହ ଅନ୍ୟାନ୍ୟ ଅବ୍ୟବସ୍ଥା ଯୋଗୁ ସରକାରଙ୍କ ଉଦ୍ଦେଶ୍ୟ ସାଧିତ ହୋଇ ପାରୁନାହିଁ। ଅଭିଭାବକମାନେ ମଧ୍ୟ ସେମାନଙ୍କ ପିଲାମାନଙ୍କୁ ଇଂରାଜୀ ମାଧ୍ୟମରେ ପଢାଇବାର ସ୍ବପ୍ନ ଧୂଳିସାତ୍ ହୋଇଛି। ଏପରି ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲା ସୋରଡା ଆଦର୍ଶ ବିଦ୍ୟାଳୟରେ। ଏଠାରେ ଶିକ୍ଷକ ଅଭାବ ପ୍ରତିବାଦରେ ୨ ଦିନ ହେଲା ଅଭିଭାବକମାନେ ସେମାନଙ୍କ ପିଲାମାନଙ୍କୁ ବିଦ୍ୟାଳୟକୁ ଛାଡୁ ନାହାନ୍ତି। ପ୍ରକାଶ ଯେ, ସୋରଡା ଆଦର୍ଶ ବିଦ୍ୟାଳୟରେ ୪ ମାସ ହେଲା ଶିକ୍ଷକ ମରୁଡି ଲାଗି ରହିଛି। ଏଠାରେ ଷଷ୍ଠରୁ ୧୦ମ ପର୍ଯ୍ୟନ୍ତ ୩୩୪ ଛାତ୍ରୀଛାତ୍ର ପଢୁଛନ୍ତି। ଶିକ୍ଷକ, ଅଣ ଶିକ୍ଷକଙ୍କୁ ମିଶାଇ ମୋଟ ୨୨ ଜଣ ରହିବା କଥା, ମାତ୍ର ଅଛନ୍ତି କେବଳ ୧୪ଜଣ। ଅଧ୍ୟକ୍ଷ ପଦ ସହ ପିଜିଟି ଇଂଲିଶ, ଫିଜିକ୍ସ, ବାୟୋଲୋଜି, କେମେଷ୍ଟ୍ରି, ଟିଜିଟି ଇଂଲିଶ, ଟିଜିଟି ଗଣିତ, କଳା ଶିକ୍ଷକ ମୋଟ ୮ଟି ପଦବୀ ଖାଲି ପଡିଛି। ଅଗଷ୍ଟ ମାସରୁ ଶିକ୍ଷକ ଅଭାବ ସମସ୍ୟା ରହିଥିବାବେଳେ ଇଂଲିଶ ଶିକ୍ଷକ ନ ଥିବା ଅଧିକ ସମସ୍ୟା ସୃଷ୍ଟି କରୁଛି। ଅଭିଭାବକମାନେ ବାରମ୍ବାର ଅବଗତ କରାଇଲେ ମଧ୍ୟ କେହି କର୍ଣ୍ଣପାତ କରୁ ନାହାନ୍ତି। ଶତାଧିକ ଅଭିଭାବକ ବୁଧବାର ବିଦ୍ୟାଳୟକୁ ଯାଇ ସମସ୍ୟା ସମାଧାନ ପାଇଁ ଆଲୋଚନା କରିଥିଲେ। ୨ ଦିନ ହେଲା ପିଲାମାନଙ୍କୁ ଅଭିଭାବକମାନେ ବିଦ୍ୟାଳୟକୁ ଛାଡୁ ନାହାନ୍ତି। ଗୁରୁବାର ମଧ୍ୟ ଅଭିଭାବକମାନେ ବିଦ୍ୟାଳୟରେ ପହଞ୍ଚତ୍ଥିଲେ। ଖବର ପାଇ ବିଡିଓ ସୀମାଞ୍ଚଳ ପ୍ରଧାନ ପହଞ୍ଚତ୍ ଅଭିଭାବକ, ବିଦ୍ୟାଳୟ କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ। ଜିଲାପାଳ ଆସିଲେ ସମସ୍ୟା ବୁଝିବେ ଓ ତୁରନ୍ତ ଦାବିରେ ଅଭିଭାବକମାନେ ଅଡି ବସିଥିଲେ।
