ନୂଆଦିଲ୍ଲୀ,୨୨ା୬(ପି.ଟି./ଆଇଏଏନ୍ଏସ୍) : ସମୟ ସହ ତାଳ ଦେଇ ପରିବର୍ତ୍ତିତ ପରିସ୍ଥିତିରେ ଆଭିମୁଖ୍ୟ ବଦଳାଇଛି ଭାରତ। ଗଲଓ୍ବାନ ଉପତ୍ୟକାରେ ଚାଇନା ସୈନ୍ୟଙ୍କ ସହ ସଂଘର୍ଷରେ ୨୦ ଭାରତୀୟ ଯବାନ ଶହୀଦ ହେବା ପରେ ଏବେ ସୀମାନ୍ତ ପ୍ରକୃତ ନିୟନ୍ତ୍ରଣରେଖା (ଏଲ୍ଏସି)ରେ ଭାରତ ପକ୍ଷରୁ ରୁଲ୍ସ ଅଫ୍ ଏନ୍ଗେଜ୍ମେଣ୍ଟ (ଆର୍ଓଇ)ରେ ପରିବର୍ତ୍ତନ କରାଯାଇଛି। ୩,୫୦୦ କି.ମି. ବିସ୍ତୃତ ଏଲ୍ଏସିରେ ଭାରତୀୟ ସଶସ୍ତ୍ର ବଳ ଏଣିକି ଅସ୍ତ୍ର ବ୍ୟବହାର କରିପାରିବେ ବୋଲି ନୂଆ ନିୟମ କରାଯାଇଛି। ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ସୈନ୍ୟମାନେ କୌଣସି ପ୍ରକାର ଦୁଃସାହସିକତା ଦେଖାଇଲେ ସେମାନଙ୍କୁ ମୁହଁତୋଡ଼ ଜବାବ ଦେବା ପାଇଁ ସଶସ୍ତ୍ର ବଳକୁ ଅସ୍ତ୍ର ବ୍ୟବହାରର ସମ୍ପୂର୍ଣ୍ଣ ସ୍ବାଧୀନତା ଦିଆଯାଇଛି। ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ରବିବାର ୩ ସେନାର ମୁଖ୍ୟଙ୍କ ସହ ବୈଠକ କରି ଲଦାଖ ସ୍ଥିତି ସମୀକ୍ଷା କରିବା ପରେ ଏହି ନିଷ୍ପତ୍ତି ନିଆଯାଇଛି।
ଲଦାଖର ଗଲଓ୍ବାନ ଉପତ୍ୟକାସ୍ଥିତ ପାଟ୍ରୋଲିଂ ପଏଣ୍ଟ ନମ୍ବର ୧୪ରେ ଗତ ସୋମବାର ଭାରତୀୟ ଯବାନ ଏବଂ ପିଏଲ୍ଏ ସୈନ୍ୟଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା। ଏଥିରେ ଜଣେ ସେନା ଅଧିକାରୀଙ୍କ ସମେତ ୨୦ ଯବାନ ଶହୀଦ ହୋଇଥିବାବେଳେ ଚାଇନାର ୪୩ ସୈନ୍ୟ ମୃତାହତ ହୋଇଥିଲେ। ଚାଇନା ସୈନ୍ୟ ୧୦ ଭାରତୀୟ ଯବାନଙ୍କୁ ନେଇଯାଇଥିଲେ ଓ ପରେ ଛାଡ଼ିଦେଇଥିଲେ। ସୂଚନାନୁସାରେ ପିଏଲ୍ଏ ପକ୍ଷରୁ ଆକ୍ରମଣ କରାଯିବାବେଳେ ଭାରତୀୟ ଯବାନମାନେ ଅସ୍ତ୍ର ବ୍ୟବହାର କରି ନ ଥିଲେ। କାରଣ ଭାରତ-ଚାଇନା ମଧ୍ୟରେ ୧୯୯୬ ଓ ୨୦୦୫ରେ ହୋଇଥିବା ଦୁଇଟି ଚୁକ୍ତି ମୁତାବକ ଏଲ୍ଏସିରେ ଅସ୍ତ୍ର ବ୍ୟବହାର ନ କରିବା ପାଇଁ ଉଭୟ ସେନା ପକ୍ଷରୁ ନିଜ ନିଜ ସୈନ୍ୟଙ୍କୁ ନିର୍ଦ୍ଦେଶ ରହିଥିଲା। ଏବେ ଭାରତ ଆର୍ଓଇରେ ପରିବର୍ତ୍ତନ ଆଣିବା ପରେ ନୂଆ ନିୟମ ଅନୁସାରେ ଏଲ୍ଏସିରେ ମୁତୟନ ହୋଇଥିବା କମାଣ୍ଡରମାନେ ଅସ୍ତ୍ରଶସ୍ତ୍ର ବ୍ୟବହାର କରିପାରିବେ। ପ୍ରତିପକ୍ଷକୁ ଜବାବ ଦେବା ପାଇଁ ଯବାନମାନଙ୍କୁ ସମ୍ପୂର୍ଣ୍ଣ ସ୍ବାଧୀନତା ଦିଆଯାଇଛି। ଇତିମଧ୍ୟରେ ସୀମାନ୍ତ ଅଞ୍ଚଳକୁ ଭାରତ ପକ୍ଷରୁ ସୁଖୋଇ ୩୦ ଏମ୍କେଆଇ ଯୁଦ୍ଧବିମାନ ସହ ଜାଗୁଆର, ମିରାଜ ଓ ଆପେଚେ ଆଟେକ୍ ହେଲିକପ୍ଟର ପଠାଯାଇଛି। ସେହିପରି ହଜାର ହଜାର ସଂଖ୍ୟାରେ ଅତିରିକ୍ତ ଯବାନଙ୍କୁ ସମ୍ପୃକ୍ତ ଅଞ୍ଚଳରେ ମୁତୟନ କରାଯାଇଛି।
ପ୍ରତିରକ୍ଷାମନ୍ତ୍ରୀ ରାଜନାଥ ସିଂଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ଜେନେରାଲ ବିପିନ ରାଓ୍ବତ, ସ୍ଥଳସେନା ମୁଖ୍ୟ ନେନେରାଲ ମନୋଜ ମୁକୁନ୍ଦ ନରଓ୍ବଣେ, ନୌସେନା ମୁଖ୍ୟ ଆଡ୍ମିରାଲ କରମବୀର ସିଂ ଓ ବାୟୁସେନା ମୁଖ୍ୟ ମାର୍ଶଲ ଆର୍କେଏସ୍ ଭଦଉରିଆ ଯୋଗଦେଇଥିଲେ। ଜଳ, ସ୍ଥଳ ଓ ବାୟୁ ସୀମାରେ ଚାଇନାର ଗତିବିଧି ଉପରେ କଡ଼ା ନଜର ରଖିବା ପାଇଁ ବରିଷ୍ଠ ସେନା ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି।
ପ୍ରକାଶ ଯେ ଏଲ୍ଏସିରେ କୌଣସି ପ୍ରକାର ଅତିକ୍ରମଣ କରାଗଲେ ଭାରତ ମୁହଁତୋଡ଼ ଜବାବ ଦେବ ବୋଲି ଶୁକ୍ରବାର ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ।