ଦାରିଙ୍ଗବାଡ଼ି,୨୨।୬(ଡି.ଏନ୍.ଏ.)- କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସୁଲୁମାହା ଘାଟିରେ ଶୁକ୍ରବାର ସଂନ୍ଧ୍ୟା ୭ଟାରେ ଟ୍ରାକ୍ଟର ଧକ୍କାରେ ବାଇକରେ ଯାଉଥିବା ଦାଦା, ପୁତୁରାଙ୍କ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଯାଇଛି। ଉକ୍ତ ଥାନା ଶ୍ରାନିକେତା ପଞ୍ଚାୟତ ଡବୁଲୁମାହା ଗ୍ରାମର ୫୯ନଂ ଜାତୀୟ ରାଜପଥକୁ ପୂର୍ବାହ୍ନ ୧୦ଟାଠାରୁ ଉତ୍ତ୍ୟକ୍ତ ଲୋକ ମୃତଦେହ ରଖି ରାସ୍ତା ଅବରୋଧ କରିଛନ୍ତି। ମୃତକଙ୍କ ପରିବାରଙ୍କୁ ୧୦ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ଦେବାକୁ ସେମାନେ ଦାବି କରିିଛନ୍ତିି। ଆନ୍ଦୋଳନକାରୀମାନେ ରାସ୍ତା ଉପରେ ବଡ଼ ବଡ଼ କାଠଗଣ୍ଡି ପକାଇ ରାସ୍ତା ଅବରୋଧ କରିଛନ୍ତି। ଫଳରେ ବ୍ରହ୍ମପୁର ଠାରୁ ଦାରିଙ୍ଗବାଡ଼ି, ସିମନବାଡ଼ି ଦେଇ ବାଲିଗୁଡ଼ା, ଫୁଲବାଣୀ, ରାଇକିଆକୁ ବସ୍ ଚଳାଚଳ ବାଧାପ୍ରାପ୍ତ ହୋଇଛି। ରାଜପଥ ଉପରେ ଶହ ଶହ ଗାଡ଼ି ମୋଟର ଠିଆ ହୋଇ ରହିବା ସହ ଯାତାୟାତ ଠପ୍ ହୋଇଯାଇଛି। ଘଟଣାସ୍ଥଳରେ ଦାରିଙ୍ଗବାଡ଼ି ଭାରପ୍ରାପ୍ତ ଥାନା ଅଧିକାରୀ ଗୋପାଳକୃଷ୍ଣ ଆଗୁପାତ୍ର, ସବଇନ୍ସପେକ୍ଟର ସୌମ୍ୟ ରଞ୍ଜନ ଜେନା, ଆର୍.ଭିମୋରାଓ ରେଡ୍ଡି ପ୍ରମୁଖ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବାକୁ ପ୍ରୟାସ କରିଛନ୍ତି। ସେହିପରି କନ୍ଧମାଳ ଏମ୍ପିଙ୍କ ପ୍ରତିନିଧି ସୁରଜ ରାୟ ଏବଂ ସାମାଜିକ କର୍ମୀ ତଥା ସଂଖ୍ୟାଲଘୁ ସଂଘର ସମ୍ପାଦକ ତିଆଡ଼ି ନାୟକ ପ୍ରମୁଖ ପ୍ରଶାସନକୁ ଫୋନ କରି ଏହାର ସମାଧାନ କରିବାକୁ ନିବେଦନ କରିଛନ୍ତି । ଖବର ଲେଖିବା ସୁଦ୍ଧା ରାସ୍ତା ଅବରୋଧ ଜାରି ରହିଛି ।
ସୁଚନାଯୋଗ୍ୟ, ଡବୁଲମାହା ଗ୍ରାମର କିଲିୟାନ ପ୍ରଧାନ ଏବଂ ତାଙ୍କ ପୁତୁରା ଶୁଭମ ଏକ ବାଇକରେ ବାଡାବାଙ୍ଗା ଅଞ୍ଚଳରୁ ଶ୍ରାନିକେତା ଦେଇ ନିଜ ଗ୍ରାମ ଡବୁଲମାହାକୁ ଆସୁଥିଲେ। ଏହି ସମୟରେ ନିଜ ଗ୍ରାମ ଠାରୁ ମାତ୍ର ୧ କି.ମି ଦୂର ୫୯ ନଂ ଜାତୀୟ ରାଜପଥର ସୁଲୁମାହା ଘାଟିରେ ଏକ ନମ୍ବର ବିହିନ ଟ୍ରାକ୍ଟର ତାଙ୍କୁ ଧକ୍କା ଦେଇଥିଲା । ଘଟଣା ସ୍ଥଳରେ ହିଁ ପୁତୁରା ଶୁଭମ୍ଙ୍କ ମୃତ୍ୟୁ ହୋଇଥିବା ବେଳେ ଦାଦା କିଲିୟାନ ଗୁରୁତର ଆହତ ହୋଇଥିଲେ। ତାଙ୍କୁ ପ୍ରଥମେ ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ ବ୍ରହ୍ମପୁର ଚିକିସ୍ବା ପାଇଁ ନିଆଯାଉଥିବା ବେଳେ ମେଡିକାଲ ପହଞ୍ଚିବା ପୁର୍ବରୁ କିଲିୟାନଙ୍କ ମୃତ୍ୟୁ ହୋଇଥିଲା । କିଲିୟାନଙ୍କ ମୃତଦେହ ବ୍ରହ୍ମପୁରରେ ବ୍ୟବଚ୍ଛେଦ ହୋଇ ଆସିବାକୁ ରହିଥିବା ବେଳେ ଶୁଭମ୍ଙ୍କ ଶନିବାର ସକାଳୁ ଦାରିଙ୍ଗବାଡ଼ି ଠାରେ ବ୍ୟବଚ୍ଛେଦ କରାଯାଇ ଗ୍ରାମରେ ପହଞ୍ଚିବା ପରେ ଉତ୍ତେଜନା ଦେଖାଯାଇ ଏହି ଅବରୋଧ ଓ ଆନ୍ଦୋଳନ ହୋଇଛି ।
