ବାରିପଦା ଅଫିସ,୨୬ା୧୦- ବାରିପଦା ସହରର ଜିଲା ପ୍ରାଣୀ ଚିକିତ୍ସାଳୟ ନିକଟରେ ଗତ ମଙ୍ଗଳବାର ରାତିରେ ଜଣେ ସୁନା ବ୍ୟବସାୟୀଙ୍କଠାରୁ ଲୁଟ ଉଦ୍ୟମ ଘଟଣାରେ ଟାଉନ ଥାନା ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତ ଜଣକ ହେଲେ ଗଞ୍ଜାମ ଜିଲା ଆସ୍କା ଥାନା ଅଞ୍ଚଳର ଫୁଲି ଗୋପାଳ। ତାଙ୍କ ନିକଟରୁ ନଗଦ ୬ ହଜାର ଟଙ୍କା, ଦେଢ଼ ଲକ୍ଷ ଟଙ୍କା ମୂଲ୍ୟର ସୁନା ଗହଣା, ଗୋଟିଏ ମୋଟରସାଇକେଲ ଓ ଗୋଟିଏ ମୋବାଇଲ ଫୋନ ପୋଲିସ ଜବତ କରିଛି। ଅଭିଯୁକ୍ତ ଫୁଲି ବାରିପଦା ଟାଉନ ଥାନାର ୨ ଟି ମାମଲା, ଉଦଳା ଥାନାର ୨ ଟି ମାମଲା, ନୀଳଗିରି ଥାନାର ୪ ଟି ମାମଲା ଓ ବାଲିଆପାଳ ଥାନାର ଗୋଟିଏ ମାମଲାରେ ସଂଶ୍ଲିଷ୍ଟ ଥିବା ପୋଲିସ ସୂଚନା ଦେଇଛି। ଏହି ଅଭିଯୁକ୍ତ ତାଙ୍କର ୪ ସହଯୋଗୀଙ୍କ ସହ ବାରିପଦା ରଘୁନାଥପୁର ଅଞ୍ଚଳରେ ଭଡାଘରେ ରହି ମୟୂରଭଞ୍ଜ ଓ ବାଲେଶ୍ୱର ଜିଲାରେ ଅପରାଧମାନ ଘଟାଇ ଥିବା ତଦନ୍ତ ବେଳେ ପୋଲିସ ଜାଣିବାକୁ ପାଇଛି। ତେବେ ଘଟଣା ଗୋଟିଏ ପ୍ରକାର ଘଟିଥିବା ବେଳେ ପୋଲିସ କିନ୍ତୁ ଅଲଗା ଦର୍ଶାଇଛି । ଫଳରେ ପୋଲିସର ଭୂମିକା ସନ୍ଦେହ ଘେରରେ ଥିବା ଜଣାପଡିଛି। ସ୍ଥାନୀୟ ଯୁବକମାନେ ଅଭିଯୁକ୍ତଙ୍କୁ ଧରି ପୋଲିସ ଜିମା ଦେଇ ଥିବା ବେଳେ ପୋଲିସ ନିଜେ ଧରି ଥିବା ଦର୍ଶାଇ ବାହା ବାହା ନେବାକୁ ଚେଷ୍ଟା କରିଛି।
ଉଲ୍ଲେଖଯୋଗ୍ୟ ଯେ, ବିଜୟ ସିଂ ନାମକ ଜଣେ ସୁନା ବ୍ୟବସାୟୀ ଗତ ମଙ୍ଗଳବାର ରାତି ପ୍ରାୟ ୧୦ ଟା ବେଳେ ରକ୍ସିରୋଡ଼ ସ୍ଥିତ ତାଙ୍କ ସୁନା ଦୋକାନ ବନ୍ଦ କରି ମଧୁବନ ସ୍ଥିତ ଘରକୁ ଯାଉଥିଲେ। ଏହି ସମୟରେ ତାଙ୍କୁ ଦୁଇ ଜଣ ଯୁବକ ଏକ ନମ୍ବର ବିହୀନ ମୋଟସାଇକେଲ ଯୋଗେ ପିଛା କରିଥିଲେ। ବିଜୁପଟ୍ଟନାୟକ ଗୋଲେଇ ନିକଟସ୍ଥ ପ୍ରାଣୀ ଚିକିତ୍ସାଳୟ ରାସ୍ତାରେ ଲୁଟେରା ଦ୍ୱୟ ତାଙ୍କଠାରୁ ସୁନା ଗହଣା ବ୍ୟାଗ ଛଡାଇ ନେଇ ଖସି ଯାଉଥିଲେ । ସୁନା ଦୋକାନୀ ଜଣକ ଲୁଟେରା ଦ୍ୱୟଙ୍କ ପଛରେ ଗୋଡ଼ାଇ ଥିଲେ। ପରେ ଚିକିତ୍ସାଳୟ ନିକଟସ୍ଥ ଏକ ଚାହା ଦୋକାନ ନିକଟରେ ଥିବା ଛାତ୍ର ବିଜେଡି ରାଜ୍ୟ ସମ୍ପାଦକ ଶେଖ ଅବଦୁଲ ହବିବ ଓ ତାଙ୍କ ସମର୍ଥକମାନେ ଏହି ଲୁଟେରା ଦ୍ୱୟଙ୍କ ମଧ୍ୟରୁ ଜଣଙ୍କୁ ଗୋଡ଼ାଇ କାବୁ କରିବା ସହ ପୋଲିସ ଜିମା ଦେଇଥିଲେ। ଅନ୍ୟ ଜଣେ ସେଠାରୁ ଖସି ଯାଇଥିଲେ।
