ନୂଆଦିଲ୍ଲୀ,୨।୫: ଲକ୍ଡାଉନ୍ରେ ଦୂରଦର୍ଶନ ପକ୍ଷରୁ ରାମାନନ୍ଦ ସାଗରଙ୍କ ଦ୍ୱାରା ନିର୍ମିତ ରାମାୟଣର ପ୍ରସାରଣ ଆରମ୍ଭ ହୋଇଥିଲା। ଏବେ ଉତ୍ତର ରାମାୟଣ ପ୍ରସାରିତ ହେଉଥିବାବେଳେ ଏହାର ଶେଷ ଏପିସୋଡ୍ ଶନିବାର ରାତ୍ର ୯ଟାରୁ ୧୧ ପର୍ଯ୍ୟନ୍ତ ପ୍ରସାରିତ ହେଉଛି। ସୀତା ନବମୀରେ ଏହାର ପ୍ରସାରଣ ଶେଷ ହେବ। ୧୪ ଦିନରେ ଦୂରଦର୍ଶନ ପକ୍ଷରୁ ଉତ୍ତର ରାମାୟଣର ୪୪ଟି ଏପିସୋଡ୍ର ପ୍ରସାରଣ କରାଯାଇଛି। ଏପ୍ରିଲ୍ ୧୯ରୁ ଉତ୍ତର ରାମାୟଣର ପ୍ରସାରଣ ଆରମ୍ଭ ହୋଇଥିଲା। ଏହାକୁ ମେ ୧୦ ପର୍ଯ୍ୟନ୍ତ ପ୍ରସାରଣ କରାଯିବାର ଯୋଜନା ଥିଲା। ତେବେ ପରବର୍ତ୍ତୀ ସମୟରେ ପ୍ରସାରଣ ସମୟସୀମା ବୃଦ୍ଧି କରାଯାଇ ଏହାକୁ ମେ ୨ରେ ଶେଷ କରିବାକୁ ନିଷ୍ପତ୍ତି ଗ୍ରହଣ କରାଯାଇଥିଲା। ସୂଚନାଯୋଗ୍ୟ, ୧୯୮୮-୮୯ରେ ଉତ୍ତର ରାମାୟଣର ସମସ୍ତ ଏପିସୋଡ୍ ପ୍ରସାରଣ ପାଇଁ ୪୪ ସପ୍ତାହ ଲାଗିଥିଲା।
