ସୋନପୁର/ବିନିକା,୧୯।୧(ନି.ପ୍ର./ଡି.ଏନ୍.ଏ.) ସୁବର୍ଣ୍ଣପୁର ଜିଲା ବିନିକା ବ୍ଲକ ସିଂଘିଯୁବା ପଞ୍ଚାୟତ ଅନ୍ତର୍ଗତ ଜାମପାଲି ଗାଁର କେନାଲ ପଡା, ଟାଙ୍ଗର ପଡା ଓ ଜଙ୍ଗଲ ପଡାରେ ବହୁ ବର୍ଷ ହେଲା ରହି ଆସୁଛନ୍ତି ସିଦ୍ରିଆ ସମାଜର ୫୦ ପରିବାର। ଏମାନଙ୍କ ସଂଖ୍ୟା ୩୦୦ରୁ ଊର୍ଦ୍ଧ୍ୱ। ଅଧିକାଂଶ ଲୋକ ଅଶିକ୍ଷିତ ଓ ଭୂମିହୀନ । ଆଉ କେତେକ ସରକାରଙ୍କଠାରୁ ପାଇଥିବା ଜମିରେ ଘର କରି ରହୁଛନ୍ତି। ନିଜର କୌଳିକ ବୃତ୍ତି ପିତ୍ତଳ, ତମ୍ବାରେ ବାସନ କୁସନ, ଦେବୀଙ୍କ ମୂର୍ତ୍ତୀ ନିର୍ମାଣ କରି ଗୁଜୁରାଣ ମେଣ୍ଟାଉଛନ୍ତି । ତେବେ ଜାତି ଓ ଗୋଷ୍ଠୀକୁ ନେଇ ସେମାନେ ଚିନ୍ତାରେ ଅଛନ୍ତି। ପ୍ରଶାସନ ପକ୍ଷରୁ ଜାତି ପ୍ରମାଣପତ୍ର ମିଳୁ ନଥିବାରୁ ଏହି ସମାଜର ପୁଅ ଝିଅ ଉଚ୍ଚଶିକ୍ଷାରୁ ବଞ୍ଚତ୍ତ ହେଉଛନ୍ତି। ସରକାରୀ ଯୋଜନାର ଲାଭ ପାଉନାହାନ୍ତି। ଏ ସମ୍ପର୍କରେ ଶନିବାର ଧରିତ୍ରୀରେ ଖବର ପ୍ରକାଶ ପାଇଥିଲା। ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା ଖବରକୁ ନେଇ ବିନିକା ତହସିଲଦାରଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ। ତହସିଲଦାର ଅଲେଖ ଗୁଟା ଅପରାହ୍ନରେ ଗ୍ରାମକୁ ଯାଇ ତଦନ୍ତ କରିଛନ୍ତି। ତହସିଲଦାରଙ୍କ କହିବା ଅନୁଯାୟୀ ଟାଙ୍ଗର ପଡା, କେନାଲପଡା ଓ ଜଙ୍ଗଲ ପଡାରେ ପ୍ରାୟ ୫୦ ପରିବାର ବସବାସ କରୁଛନ୍ତି । ସରକାରଙ୍କ ତରଫରୁ ଭୂମିହୀନ ପଟ୍ଟା ମଧ୍ୟ ଯୋଗାଇ ଦିଆଯାଇଛି। ଖତିଆନ ତଦନ୍ତରୁ ଜଣାପଡିଛି ଯେ, କେତେକ ଖତିଆନରେ ଜାତି ଝରା ଏବଂ କେତକ ଖତିଆନରେ ଜାତି ସିଦ୍ରା ଏବଂ କେତକ ଖତିଆନରେ ଜାତି ସିଦ୍ର ଲେଖାଯାଇଛି। ଉକ୍ତ ଖତିଆନଗୁଡିକ ଲିଜ୍ କେସ ନଂ ୭୪/୯୮, ୮।୧୦।୧୯୯୮ରେ ପ୍ରଦାନ କରାଯାଇଛି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ ସେମାନଙ୍କ ଜାତି ପ୍ରକୃତରେ ସିଦ୍ରିଆ। ଯାହାକି ଓଡିଶା ଜାତି ତାଲିକା ୮୪ରେ ଏସ୍ସିରେ ସ୍ଥାନିତ ହୋଇଛି। ତେଣୁ ସେମାନଙ୍କ ଅନୁରୋଧ ପ୍ରତି ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେବ ଓ ଆସନ୍ତା ୧୫ ଦିନ ମଧ୍ୟରେ ପଦକ୍ଷେପ ଗ୍ରହଣ କରାଯିବ ବୋଲି ତହସିଲଦାର କହିଛନ୍ତି। ପ୍ରତିଶ୍ରୁତି ପାଇବା ପରେ ଗ୍ରାମର ଲୋକଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି ।
