ରତ୍ନଗିରି, ୫।୫(ଡି.ଏନ୍.ଏ): ଯାଜପୁର ବରୀ ବ୍ଲକ ଅଧିନସ୍ଥ କଳାମାଟିଆ ପଞ୍ଚାୟତରେ କରୋନା ସଂକ୍ରମିତ ହୋଇଥିବା ବ୍ୟକ୍ତିଙ୍କ ଗ୍ରସ୍ତ ବିବରଣୀ ଗତ ୩ ତାରିଖରେ ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ତରଫରୁ ଜାରି କରାଯାଇଥିଲା। ତେବେ ସୋମବାର ଆଉ ୩ଜଣ ଆକ୍ରାନ୍ତ ଯଥାକ୍ରମେ ୧୫୫,୧୫୬ ଓ ୧୫୭ଙ୍କ ସବିଶେଷ ଗ୍ରସ୍ତ ବିବରଣୀ ସମ୍ପର୍କରେ ସୂଚନା ଦିଆଯାଇଛି। ସୂଚନାଯୋଗ୍ୟ ୧୫୫ ନଂ ଆକ୍ରାନ୍ତ ଜଣେ ୪୮ ବର୍ଷୀୟ ଯୁବକ ହୋଇଥିବା ବେଳେ ତାଙ୍କ ଘର ଉଦୟନାଥପୁର। ସେ କୋଲକାତାର ସିଆଲଦାରୁ ଏକ ଗାଡ଼ି ଭଡ଼ା କରି କୁଆଖିଆରେ ପହଞ୍ଚିଥିଲେ। ପରେ କୁଆଖିଆରୁ ଖବରକାଗଜ ଆସୁଥିବା ଗାଡ଼ିରେ ବରୀରେ ପହଞ୍ଚିିଥିଲେ। ୩୧ମାର୍ଚ୍ଚରେ ସେ ବରୀ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରକୁ ରକ୍ତନମୁନା ପରୀକ୍ଷା ନିମନ୍ତେ ଯାଇଥିବା ସହ ଏକ ଏକାଦଶ ଭୋଜିରେ ମଧ୍ୟ ଯୋଗାଦେଇଥିଲେ। ଏଥିସହ ନିଜ ଗ୍ରାମରେ ପିଡ଼ିଏସ ଚାଉଳ ଆଣିବା ପାଇଁ ଡିଲରଙ୍କ ପାଖକୁ ଯାଇଥିବା ଜଣାପଡ଼ିଛି। ମାର୍ଚ୍ଚ ୩୧ରେ ବରୀ ମାଉଣ୍ଡ ମାର୍କେଟରେ ବୁଲାବୁଲି କରିବା ପରେ ରତିଆଙ୍ଗର ସମ୍ପର୍କୀୟଙ୍କ ଘରକୁ ମଧ୍ୟ ଯାଇଥିଲେ। ମେ ୨ରେ ତାଙ୍କ ରିପୋର୍ଟ କରୋନା ପଜିଟିଭ ଆସିଥିଲା। ସେହିପରି ୧୫୬ନଂ ଆକ୍ରାନ୍ତ ମାର୍ଚ୍ଚ ୨୯ରେ ଘରକୁ ଫେରିଥିବା ବେଳେ ମେ ୨ ପର୍ଯ୍ୟନ୍ତ ସେ ଘରେ ରହିଥିଲେ। ଅପ୍ରିଲ୧୪ରେ ନିଜ ବନ୍ଧୁଙ୍କ ସହ ଜାରକାରେ ଥିବା ଭୂମିକା ଆୟ ହସ୍ପିଟାଲ ଯାଇଥିଲେ। ମେ ୨ରେ ତାଙ୍କର ମଧ୍ୟ ରିପୋର୍ଟରେ କରୋନା ପଜିଟିଭ ଆସିଥିଲା। ୧୫୭ ନଂ ଆକ୍ରାନ୍ତ ଏପ୍ରିଲ ୧୦ରେ କୋଲକତାରୁ ଆସିଥିଲେ। ଏପ୍ରିଲ ୧୧ରେ ସେ ସୁଜନପୁର ପିଏଚ୍ସିକୁ ଏକ ଅଟୋରେ ଯାଇ ମଧୁମେହ ପରୀକ୍ଷା କରିଥିଲେ। ଏହାପରେ ଏପ୍ରିଲ ୧୨ରୁ ମେ ୨ ପର୍ଯ୍ୟନ୍ତ ସେ ନିଜ ପରିବାର ସହିତ ଘରେ ରହିଥିଲେ। ଗତ ମେ ୨ତାରିଖରେ ଏମାନଙ୍କ ରିପୋର୍ଟରେ କରୋନା ପଜିଟିଭ ବାହାରିବା ପରେ ଜିଲା ପ୍ରଶାସନ ପକ୍ଷରୁ ଏମାନଙ୍କୁ କଳିଙ୍ଗ ନଗର କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା।
